Ads by Google Ads by Google

Nofovaavaaia Steven Tuato’o mo le 24 masina


[ata: SN]
ausage@samoanews.com

E 24 masina lea ua nofovaavaaia ai Steven Tuatoo, ina ua ta’usala o ia e le Fa’amasinoga i le aai o King County i Seattle, Uosigitone i le aso Faraile, 6 Iulai i le moliaga mama o lona le usitaia lea o le poloaiga a le fa’amasinoga.

 

O ni isi o tuutuuga o lana nofovaavaaia, e aofia ai lona tuliina lea o aso e 364 i totonu o le falepuipui, peita’i, ua fa’amalumalu lona tuliina o lea taimi umi, ae ua manatu le fa’amasinoga e fa’aaoga le umi e 85 aso lea na taofia ai o ia e fa’atalitali ai le faaiuga o lana fa’amasinoga, e fai ma ana fa’asalaga i lenei mataupu.

 

O Tuato’o, o se ali’i sa avea ma Leoleo o le malo o Amerika Samoa mo le tele o tausaga, na ulua’i tu’uaia o ia e le malo i le moliaga mamafa o lona le usitaia lea o tuutuuga o le poloaiga e fa’asa ai ona ia toe taumafai e fa’afeso’ota’i lona to’alua. Ae i lalo o se maliliega sa latou sainia ma le malo ma talia fo’i e le fa’amasinoga, na ia tali ioe ai i le moliaga mama e pei ona ta’usala ai o ia.

 

O le itula e 1:00 i le aoauli o le aso Faraile, aso 6 Iulai 2018 na tula’i ai Tuato’o i luma o le afioga i le ali’i Fa’amasino is Johanna Bender mo le tu’uina atu o lana fa’asalaga. Sa tulai le ali’i loia tua ia Adam Heyman mo ia i lenei mataupu.

 

A o le i tuuina atu le fa’asalaga a le fa’amasinoga, na tula’i le tuafafine a Tuato’o ma fa’aleo lana molimau e fai ai o ia ma sui o lona tuagane.

 

O ni isi o tuutuuga o le nofovaavaaia a Tuato’o, o le fa’asa lea ona ia toe taumafai e fa’afesoota’i lona to’alua i soo se auala, fa’asa ona ia toe soli se tulafono, a ia avea o ia ma se tasi e usita’i i tulafono uma a le malo.

 

O le mae’a ai o taualumaga o lana mataupu e pei ona faanofovaavaaia ai o ia e le fa’amasinoga, na solofua ai loa e le fa’amasinoga le tagi a le malo fa’asaga ia Tuatoo, e tusa ai o le mataupu e pei ona sola ese atu ai ma Amerika Samoa.

 

Na taua e se sui sooupu a le ofisa o le loia sili mai le aai o King County i le Samoa News e fa’apea, na mafua ona talosaga le malo ina ia solofua le latou tagi fa’asaga ia Tuato’o e fa’atatau i le mataupu e pei ona sola ese atu ai ma Amerika Samoa nei, ona o lea ua taunu’u atu le tusi saisai na sainia e le afioga i le ali’i Kovana ia Lolo M. Moliga, e talosagaina ai le toe fa’afo’i mai o Tuato’o i le atunu’u.

 

O lo o taofia pea le ua molia i le falepuipui e aunoa ma se tupe ua faatulaga, e fa’atali ai le taimi e toe fa’afo’i mai ai o ia i le atunu’u.

 

E le i mafai ona maua mai se fa’amatalaga mai le afioga i le ali’i Komesina o Leoleo ia Le’i Sonny Thompson, e tusa ai o feuiaiga mo le toe fa’afo’iina mai o Tuato’o i le atunu’u. Ae i se ripoti na fa’alauiloa e le alaleo o le KHJ Radio i le vaiaso na te’a nei, o lo o taua ai se fa’atalatalanoaga ma le Komesina o Leoleo e uiga i lenei mataupu.

 

I lea fa’atalatalanoaga, o lo o taua ai e Le’i le i ai o le fuafuaga ina ia toe fa’afo’i mai Tuatoo i le atunu’u. Na taua atili e Le’i i le KHJ Radio e fa’apea, o le tusi saisai lea ua taofia ai Tuatoo i le falepuipui i fafo, na auala atu i se talosaga na sainia e le ali’i kovana.

 

O Tuato’o, o se tasi lea e to’atolu i ai i latou na pu’e fa’apagota e Leoleo i le masina o Novema 2017, i lalo o poloaiga mai le Fa’amasinoga e sailia ai a latou meatotino, ona o tu’uaiga i lo latou umia fa’asolitulafono lea o fualaau fa’asaina.

 

O nofoaga na osofa’i e Leoleo i le latou gaioiga lea e aofia ai se fale i Taputimu, lea na pu’e fa’apagota mai ai Cody Wood, o se fale i Alofau, lea na pu’e fa’apagota mai ai Tuato’o, ma se taxi la’u pasese i luga o le auala i Tafuna, lea na pu’e fa’apagota mai ai Taisia Lemalie.

 

O le mae’a ai o le 48 itula na taofia ai i latou uma ia e to’atolu, na tatala ai loa i tua Tuatoo ina ua tuai ona faila e le malo le tagi fa’asaga ia te ia, ae taofia ai pea na o Wood ma Lemalie.

 

O le taimi na tatala ai Tuato’o mai le falepuipui i Tafuna, na ia tuua ai loa Amerika Samoa ae sola i aga’i i Amerika, ma aumau ai i le setete o Uosigitone.

 

O le masina o Aperila o le tausaga nei na alia’e ai le mataupu a Tuatoo ina ua loka e Leoleo o ia i lona fa’aoolima i lona to’alua, ma mafai ai loa ona toe maua o ia.