Ads by Google Ads by Google

Nofovaavaaia se ali’i talavou mo le 5 tausaga ile umia o fualaau fa’asaina


[ata: foa'i]
ausage@samoanews.com

E 5 tausaga lea ua nofovaavaaia ai se ali’i talavou e 23 tausaga le matua, ina ua fa’amaonia e le fa’amasinoga le moliaga mamafa o le umia fa’asolitulafono o vaega o fualaau faasaina sa tu’uaia ai o ia e le malo.

 

Na taua e le Fa’amasinoga i le taimi na lau ai le fa’asalaga a Apelu Jr Falaniko i le vaiaso na te’a nei e fa’apea, e tele naua avanoa o lo o maua e tupulaga talavou a le atunu’u e mafai ai ona fesoasoani i le atina’eina o latou aiga, ae foliga mai e le o manatu mamafa tele i latou i le fa’aaoga tatauina o latou olaga talavou.

 

Na tauae le fa’amasinoga e fa’apea, ua fai ma masani a nisi o tupulaga talavou, e oo loa i le taimi e tutula’i ai i luma o le fa’amasinoga pe afai ua ta’usala i latou i le umia o fualaau fa’asaina, ona latou talosagaina lea o se isi avanoa se’i toe fo’i atu ai i tua e tausi o latou aiga ma fai ni suiga i o latou olaga.

 

Mo Falaniko, na taua e le fa’amasinoga le tele o avanoa e mafai ona maua e lea ali’i, e pei o le ulufale atu i vaega ‘au a le malo ma saili ai sona avanoa faigaluega e tausi ai lona aiga, aua o lo o ia umia se tusi folau Amerika e faigofie ai ona malaga solo.

 

Na taua i le ripoti a le Ofisa Faanofovaavaaia e fa’apea, afai e alu ese Falaniko mai ana uo sa masani ona mafuta ai ma latou fa’atinoina le tele o solitulafono eseese e aofia ai ma le ulaina o fualaau fa’asaina, o le a mafai ona avea o ia ma tagatanu’u lelei e tausisi ma usita’i i tulafono a le malo.

 

Na ulua’i tu’uaia Falaniko i moliaga mamafa e aofia ai le umia faasolitulafono o vaega o le pauta fa’asaina o le aisa, faapea ai ma le moliaga o le gaoi.

 

Ae i lalo o se maliliega na sainia e le ua molia ma le malo, na tali ioe Falaniko i le moliaga ua toe teuteu e le malo, le moliaga o le umia faasolitulafono o vaega o le pauta fa’asaina o le aisa, o le vaega D lea o solitulafono mamafa, e mafai ona fa’asala ai se tasi i le toese mo le umi e le silia i le 5 tausaga, pe fa’asala i le salatupe e le silia i le $5,000, poo le fa’asala fo’i i fa’asalaga uma ia e lua.

 

Na ta’utino Falaniko e fa’apea, i le masina o Iuni o le tausaga na te’a, sa ia umia fa’asolitulafono ai vaega o le pauta fa’asaina o le aisa. I le taimi na osofa’i ai e Leoleo se fale tu’ufua sa tafafao ai Falaniko ma nisi o ana uo i Ottoville, sa umia e Falaniko se paipa tioata sa i ai le aisa i totonu. E le gata i lea, sa ia umia fo’i se straw ua uma ona tipi faamaai ona pito o lo o tumu i aisa.

 

Na logo e se aiga le Ofisa o Leoleo i Tafuna ina ua pisapisao ma leoleoa mai totonu o se fale tu’ufua i Ottoville. Sa taua fo’i e moilmau i Leoleo lo latou vaaia o ni ta’avale o aga’i atu i le fale tuufua lea i le leva o le po ma piki ni tama’ita’i talavou.

 

O Falaniko ma le isi ali’i na maua atu e Leoleo i le fale tuufua. O mea na maua e Leoleo e aofia ai pepa iila e utu ai le aisa o lo o paepae solo i totonu o le fale tuufua. Sa maua ai fo’i atigi fagupia, o lavalava e aofia ai lavalava o tama’ita’i, faapea ma se paipa tioata ua ta’e sa ta’atia i le tulimanu o le fale o lo o i ai le aisa i totonu.

 

O Falaniko ma Vincent Mikaele sa maua e Leoleo i totonu o le fale i le taimi na osofaia ai.

 

O lo o taofia pea i le toese i Tafuna le ali’i o Mikaele e fa’atali lana mataupu lea ua fa’atulaga e toe fofogaina i le masina fou, lea ua fuafua e sui ai lana tali tete’e i le tali ioe, i moliaga o le umia fa’asolitulafono o fualaau fa’asaina.

 

I le vaiaso na te’a nei, sa fa’atoese ai Falaniko ile faamasinoga e tusa ma lana solitulafono, ma ia talosagaina se isi avanoa e toe fo’i atu ai i tua e fa’aaoga aso o lona ola o loo totoe e tausi ai lona aiga, aemaise ona matua.

 

Na ta’utino Falaniko e faapea, o ana uo ua mafua ai ona pagatia faapea lona olaga.

 

Na tutu fa’atasi le loia a Falaniko ia Rob McNeill ma le loia a le malo ia Laura Garvey e talosaga i le fa’amasinoga maualuga mo se fa’asalaga faanofovaavaaia.

 

O nisi o tuutuuga o le faasalaga faanofovaavaaia e 5 tausaga a Falaniko, o lona tuliina lea o masina e 20 i le toese ma totogi le talatupe e $5,000. Afai ae magalo mai le toese, ua poloaina o ia ina ia aua ne’i ona toe ulufale atu i nofoaga o loo faatau ai le ‘ava malosi, pe faatasi atu fo’i i tagata o loo tagofia le ‘ava malosi ma fualaau fa’asaina, a ia avea o ia o se tagata e tausisi i tulafono uma a le malo.