Ads by Google Ads by Google

Nofovaavaaia Meriko Lomu mo 10 tausaga


[ata: foa'i]
ausage@samoanews.com

I le tuana’i ai i le sili ai le 9 masina o taofia se Tina talavou i le toese i Tafuna e fa’atali ai le fa’aiuga o lana fa’amasinoga, o le vaiaso nei na tatala ai i tua o ia mai le toese ae ua faanofovaavaaia mo le 10 tausaga.

 

O le aso Lua o le vaiaso nei na tula’i ai Meriko Lomu i luma o le Fa’amasinoga Maualuga mo le lauina o lana fa’asalaga. O le ali’i loia ia Marcellus Talaimalo Uiagalelei na tula’i mo ia, ae o le tama’ita’i loia sili lagolago ia Christy Dunn na tula’i mo le itu a le malo.

 

O Lomu, 24 tausaga le matua na tu’uaia e le malo i tagi eseese e 2. I le tagi muamua, na ta’usala ai o ia i le moliaga mamafa o le umia fa’asolitulafono o vaega o le laau fa’asaina o le mariuana ma le fa’amoemoe e tulei pe fa’atau atu i isi tagata, ae i le tagi lona lua, na ta’usala ai o ia i le moliaga mamafa o le umia fa’asolitulafono o vaega o le pauta fa’asaina o le aisa ma le fa’amoemoe e tulei pe fa’atau atu i isi tagata.

 

O moliaga e pei ona ta’usala ai Lomu e le fa’amasinoga, e mafai ona fa’asala ai o ia i le toese i Tafuna i le moliaga e tasi mo le umi e le sili atu i le 10 tausaga, pe fa’asala fo’i i le salatupe e le sili atu i le $20,000.

 

Ina ua amata taualumaga o lenei mataupu i luma o le fa’amasinoga, na valaau ai e le ali’i loia ia Uiagalelei le Tina o Lomu mo le tuuina atu o lana molimau e tusa ai o le la mafutaga ma le ua molia.

 

Na taua e le Tina e fa’apea, e tele lava fa’afitauli na tutupu i le mafutaga ma Lomu, ona o le ua molia, e ui o lana tama sa ia fanauina, ae na tausi mai lava e lona Tina (grandmother o Lomu) ina ua fa’atoa fanau mai o ia.

 

Sa ese le si’osi’omaga na tupu a’e ai Lomu, o se olaga e matua malupuipuia, e le mafai ona alu e faatasi atu i ana uo pe fa’ataga fo’i e alu i ni pati, e leai se avanoa e matamata ai i le Televise i le fale, ae sa malupuipuia lona olaga, ma o le tele fo’i o taimi, e fa’atonu ai lava o ia e fai ana meaaoga.

 

Na taua e le molimau e fa’apea, o fa’afitauli i le olaga o Lomu na alia’e mai ina ua maliu lona grandmother sa tausia o ia, ma amata ai loa ona vaaia fa’afitauli i le olaga o le ua molia.

 

Na fa’ailoa e le Tina a Lomu i le fa’amasinoga lona fa’anaunauga atoa o loo i ai, ia mafai ona toe fa’afo’i atu le ua molia i ona lima se’i ona taumafai e toe a’oa’o o ia ma sasa ina ia ona lagona le leaga o le le usita’i atoa ai ma le pipi’i atu i ana uo o lo o fa’atinoina solitulafono eseese.

 

Na taua atili fo’i e le Tina e fa’apea, o lo o ia tausia i le taimi nei le fanau laiti e to’alua a le ua molia, talu mai lava le taimi na taofia ai o ia e Leoleo i le toese i Tafuna. Sa ia fa’ailoa fo’i i le fa’amasinoga e fa’apea, o lana tama, o se tama’ita’i talavou e atamai i le aoga.

 

Na fa’atoese Lomu i le fa’amasinoga e tusa ai o lana solitulafono sa faia, ma ia talosagaina ai se isi avanoa se’i toe fo’i atu ai i lona aiga e fa’atino ona tiute fa’a Tina e ala i le tausiga o si ana fanau.

 

Sa ia fa’amatala i le fa’amasinoga se tala puupuu e fa’atatau i lona olaga, atoa ai ma si ana fanau e to’alua ua motusia le latou mafutaga. Na taua e le ua molia e fa’apea, sa i ai o ia i se mafutaga ma se ali’i mo se taimi umi, ma i’u ina ia fanauina ai se fanau e to’alua.

 

E lei umi ae amata ona tutupu faafitauli i lona olaga ina ua leai sana galuega, ma ua ia le mautonu fo’i i se auala e maua ai se tupe e tausi ai lana fanau. O lona olaga le mautonu sa i’u ai loa i lona soli o le tulafono, ma i’u ina pu’e ai o ia e Leoleo.

 

Sa ia fa’ailoa i le fa’amasinoga e fa’apea, e ui i le mafua’aga ua ia taua na ala ai ona ia soli le tulafono, peita’i e le o se alofaga lea mo le gaioiga sa ia faia. Sa ia fa’atoese i le fa’amasinoga i lona le fa’aaloalo i tulafono a le malo o Amerika Samoa, sa ia fa’atoese fo’i i Leoleo sa ia faia i ai ni uiga le fa’aaloalo i le taimi na latou pu’e fa’apagota ai o ia.

 

Sa ia fa’atoese fo’i isi ona Tina ma lona aiga atoa, i lona faia o uiga ua ta’uvalea ai lo latou aiga. Sa ia ta’utino i le fa’amasinoga, ua lagona lona salamo moni e tusa ai o le solitulafono, ma ua ia lagona fo’i le pologa i le silia i le 9 masina sa taofia ai o ia i le toese.

 

“Ua ou toe fia fo’i e tausi la’u fanau ma fa’atino o’u tiute fa’a Tina,” o le saunoaga lea a Lomu. Sa ia taua e fa’apea, o lana tama matua ua 3 tausaga, ma ua mae’a ona lesitala e lona Tina i le aoga Fa’a Ta’ita’i, ae o lana tama laititi e 1 le tausaga le matua, o le tele o taimi na te le iloaina ai o ia o lona Tina, e mafua mai ona o le umi o le taimi na la valavala ai.

 

Na talosaga loia a itu e lua ina ia fa’asala le ua molia i se fa’asalaga fa’a nofovaavaaia, e pei ona taua i le ripoti a le Ofisa Fa’anofovaavaaia.

 

E 10 tausaga le umi na manatu le fa’amasinoga e taofia ai Lomu i le toese peita’i ua fa’amalumalu lona tuliina o lea fa’asalaga fa’a falepuipui, ae ua faanofovaavaaia o ia mo le 10 tausaga i lalo o tuutuuga e ao ona ia usita’i i ai.

 

O ni isi o ia tuutuuga e aofia ai lona tuliina o masina e 40 i le toese, peita’i o le tuliina o lea 40 masina, fa’atoa amata ona tuli i le aso 6 o Tesema 2019, ae o le a tatala o ia i tua mai le toese i le taimi lenei, i lalo o tuutuuga e tatau ona usita’i i ai.

 

O ni isi o ia tuutuuga e aofia ai le aua ne’i ona toe tagofia le ‘ava malosi poo fualaau fa’asaina, avea o ia ma tagatanu’u lelei, o lona Tina o le a avea ma ona Pule e vaavaaia o ia ma faalogo i ai i ana fa’atonuga uma.

 

E 180 aso lea ua tuuina atu ia Lomu e saili ai sana galuega, ma lana salatupe e $2,513, lea o le a totogi mai i le tupe sa maua e Leoleo i le taimi o le latou osofaiga.

 

Na fa’ailoa e le afioga i le ali’i Fa’amasino Sili ia Michael Kruse ia Lomu e fa’apea, o le taimi lava na te le usitaia ai se tuutuuga o lana nofovaavaaia, ona ia tuliina loa lea o le 10 tausaga ua faamalumalu e le fa’amasinoga.

 

O afioga i ali’i Fa’amasino Lagolago ia Fa’amausili Pomele ma Muasau T. Tofili na lagolago i le afioga i le Fa’amasinoga Sili i le iloiloina o le fa’aiuga a Lomu.