O le ali’i e 27 tausaga le matua lea na ta’usala e le Fa’amasinoga Maualuga i le masina o Iuni 2019, i lona umia fa’asolitulafono o vaega o fualaau fa’asaina o le aisa, ua poloaina o ia e le Fa’amasinoga na te tuliina aso e 180 i le toese i Tafuna, o se tasi lea o tuutuuga o lana nofovaavaaia e 5 tausaga.

O le vaiaso nei na tula’i ai le susuga a Ronald Pickering III i luma o le Fa’amasinoga Maualuga mo le tuuina atu o lana fa’asalaga. E $5,000 le tino i tupe na totogi e tatala ai Pickering i tua e fa’atalitali ai se faaiuga o lana mataupu.

O le ali’i Loia Fautua lagolago ia Rob McNeill na tula’i mo le ua molia, ae o le tama’ita’i Loia Sili lagolago ia Christy Dunn na tula’i mo le itu a le malo.

Na ulua’i tu’uaia Pickering i le moliaga mamafa o le umia faasolitulafono o vaega o le pauta fa’asaina o le aisa, ae i lalo o se maliliega na sainia e le ua molia ma le malo, lea fo’i na talia e le Fa’amasinoga, na malie ai le ua molia e tali ioe i le moliaga na toe teuteu e le malo, le moliaga mamafa o le umia faasolitulafono o fualaau fa’asaina, lea e mafai ona faasala ai se tasi i le toese mo le umi e le sili atu i le 5 tausaga, pe faasala i le salatupe e le sili atu i le $5,000, poo le faasala foi i faasalaga uma ia e lua.

I le tali ioe ai o Pickering, sa ia ta’utino ai e fa’apea, i se taimi o le aso 13 o Tesema 2018, sa ia umia faasolitulafono ai vaega o le pauta faasaina o le aisa e aunoa ma se fa’atanaga faaletulafono.

Ina ua tuuina atu le avanoa ia Pickering mo sana faamatalaga faai’u a o le i tuuina atu le faaiuga a le Fa’amasinoga, na muamua talosaga lana loia fautua mo se faasalaga mama mo le ua molia, ina ia maua ai pea lona avanoa e faigaluega ma tausi ai lona to’alua ma lona atali’i e to’atasi.

Na taua e McNeill e fa’apea, o le susuga a Pickering o se Tama talavou ua sese lana filifiliga sa fai. O ia o se ali’i e galue malosi mo le manuia o lona aiga, e faalagolago fo’i ia te ia le tausiga o lona aiga.

“E le tele se vaega o fualaau fa’asaina na maua i totonu o lana ta’avale, e na o le paipa tioata lava sa i ai vaega o le pauta o le aisa na maua e Leoleo. Sa fesoasoani malosi fo’i o ia i Leoleo i le taimi o le latou suesuega, ma ua lagona fo’i lona salamo e tusa ai o lana solitulafono sa faia,” o le saunoaga lea a McNeill i le Fa’amasinoga.

Na talosaga McNeill i le fa’amasinoga ina ia faamama se faasalaga mo lenei ali’i talavou, ma ia talia le fautuaga a le Ofisa Faanofovaavaaia, ina ia faasala le ua molia i se fa’asalaga faa falepuipui e aunoa ma le tuuina atu i ai o se isi taimi na te tuliina i le toese.

Na famanino atili fo’i e McNeill e faapea, o fualaau faasaina sa maua ia Pickering, o mea lava e fa’aaoga mo ia lava, ae leai se faamoemoe e tulei pe faatau atu i nisi tagata.

Ina ua maua le avanoa o Pickering mai le fa’amasinoga, sa ia faatoese ai loa i le fa’amasinoga e tusa ai o lana solitulafono sa faia, ma ia talosagaina ai se isi avanoa se tasi mo ia e fa’aauau ai pea lana tautua mo lona to’alua ma le la tama e to’atasi.

Na faailoa manino e Pickering i le fa’amasinoga lona manaoga o loo i ai, e le toe fia oo i le falepuipui, ina ua ia iloa e le o se nofoaga lelei lea mo ia. Sa ia faailoa fo’i i le faamasinoga lona faanaunauga ina ia faasala o ia i se faasalaga faanofovaavaaia, ina ia maua ai le avanoa e alu ai e asi lona aiga i fafo.

Na fesili le afioga i le ali’i Fa’masino Sili ia Michael Kruse ia Pickering, poo fea o fafo o loo i ai lona aiga. Na tali le ua molia, o ona matua o loo i ai i le setete o Hawaii, ma o lo o mana’o e alu i ai i se taimi e asi i laua ona toe fo’i mai ai lea i le atunu’u.

Na fa’ailoa e Kruse ia Pickering, afai e faasala o ia e le fa’amasinoga i se fa’asalaga faanofovaavaaia, e le mafai ona ia alu e asi ona matua toe sau ai.

Na tali le ua molia, o loo malamalama lelei lona mafaufau i le tulaga lea, ae o le uiga moni o lana talosaga, e sili ai le faanofovaavaaia o ia nai lo le alu i le falepuipui. E le gata fo’i i lea, e mafai ona alu i fafo e asi ona matua pe afai ae mae’a lana faasalaga faanofovaavaaia.

Saunoa Kruse e fa’apea, o se tasi o mataupu o loo mafaufau loloto ai pea le fa’amasinoga, o le faafinauga fai mai o fualaau faasaina sa maua ia Pickering, e mea e fa’aaoga mo ia lava.

Na taua e Kruse e fa’apea, tusa lava poo le tulaga lea e faatatau i fualaau faasaina sa maua i le ua molia, o le itu e pito sili ona matuia ai, e le gata o loo aafia ai le olaga o le tagata na te fa’aaogaina fualaau fa’asaina, ae sili ai ona aafia olaga o i latou uma o lo o faalagolago atu ia te ia.

A o le i tuuina mai le faaiuga a le fa’amasinoga, na faamanino e Kruse nisi o fa’amatalaga e uiga i lenei mataupu.

Sa ia faamanino e fa’apea, e i ai le faafitauli a le ua molia i le faaaogaina o fualaau fa’asaina. E mafua lea manatu o le Faamasinoga, ona sa faatonuina le ua molia e aua ne’i ona toe fa’aaogaina fualaau fa’asaina ina ua tatala i tua o ia e faatali ai se faaiuga o lana mataupu.

Ae i le masina o Fepuari 2019, na faia ai se suega i le tino o le ua molia ma faamaonia ai, sa ia faaaogaina fualaau fa’asaina.

O le mataupu faasaga i lenei ali’i e pei ona taua e le Fa’amasinoga, na alia’e mai ina ua taofi e Leoleo lana ta’avale i le aso 13 o Tesema 2018, e mafua mai i lona le usitaia o tulafono i luga o le alatele, e ala i lona le faia o lona fusipa’u a o ia faafoe le ta’avale.

Na saili e Leoleo le ta’avale ma maua ai se paipa tioata o lo o i ai fualaau fa’asaina o le aisa. Ae talu ai e lei i ai se pepa e faamaonia ai le igoa atoa o le ua molia, o le mafua’aga lea na taofia ai loa o ia e Leoleo e faatali ai le taimi e tula’i ai o iai luma o le Fa’amasinoga mo le fa’amaninoina poo ai o ia.

Saunoa atili Kruse e fa’apea, i ni nai tausaga e le i mamao atu, sa ta’usala ai e le Faamasinoga faaitumalo le ua molia i le moliaga mama o le ave ta’avale a o ia tagofia le ‘ava malosi. Peita’i e foliga mai o lea ua matuia atu le laasaga ua oo i ai, ina ua maua o ia o loo ia faafoeina le ta’avale a o ia umia se paipa tioata o lo o i ai vaega o le pauta faasaina o le aisa.

O nisi o tuutuuga o le nofovaavaaia e 5 tausaga a le ua molia, o lona totogi lea o le salatupe e $2,000 ma ia tuli masina e 20 i le toese i Tafuna. Ua faamalumalu e le fa’amasinoga le tuliina e le ua molia o masina e 20 i le taimi e tasi, ae ua faatonuina o ia, e tuli na o aso e 180 i le toese i le taimi nei, tusa lea e 6 masina, a mae’a, ona tatala lea o ia i tua.

O masina o lo o totoe ai o lana fa’asalaga faa falepuipui e 20 masina, faatoa tuli pe a faatonu atu e le Fa’amasinoga.

E le gata ua faasa ona ia toe tagofia le ‘ava malosi poo fualaau faasaina, ae o le a faia fo’i ni suega i lona tino ina ia mautinoa ai o lo o ia tausisia poloaiga a le fa’amasinoga.

O lea la ua taofia nei Pickering i le toese mo le tuliina o lana fa’asalaga e 6 masina.