Ads by Google Ads by Google

Nofovaavaaia le ali’i na maua i ai fualaau fa’asaina

ausage@samoanews.com

E 5 tausaga lea ua tuu atu e le Fa’amasinoga Maualuga e nofovaavaaia ai se alii e 28 tausaga le matua, ina ua fa’amaonia e le fa’amasinoga le moliaga mamafa o lona umia fa’asolitulafono o vaega o le pauta fa’asaina o le aisa sa tu’uaia ai o ia e le malo.

 

O le vaiaso na te’a nei na tuuina atu ai le fa’asalaga a le Fa’amasinoga Maualuga fa’asaga i le ali’i o Oloaluga Viliamu.

 

O le afioga i le ali’i fa’amasino sili lagolago ia Elvis P. Patea sa taulimaina le mataupu a Viliamu, ae lagolagosua i ai le afioga i fa’amasino lagolago ia Suapaia Pereira ma Satele Lili’o Satele.

 

O le ali’i loia fautua ia Ryan Anderson na tula’i mo Viliamu, ae o le ali’i loia sili lagolago ia Jason Mitchell na tula’i mo le itu a le malo.

 

Na ulua’i tu’uaia e le malo ia Viliamu i le moliaga mamafa o le umia fa’asolitulafono o vaega o le pauta fa’asaina o le aisa, o se solitulafono e mafai ona fa’asala ai se tasi i le toese mo le umi e le itiiti ifo i le 5 tausaga ae le sili atu i le 10 tausaga, pe fa’asala i le salatupe e le itiiti ifo i le $5,000 ae le silia i le $10,000.

 

Ae i lalo o se maliliega na sainia e le ua molia ma le malo, lea fo’i na talia e le fa’amasinoga maualuga, na tali ioe ai Viliamu i le moliaga o le umia faasolitulafono o vaega o le pauta oona o le aisa, o se solitulafono e mafai ona faasala ai o ia i le toese mo le umi e le sili atu i le 5 tausaga, pe fa’asala foi i le salatupe e le sili atu i le $5,000, poo le faasala foi i fa’asalaga uma ia e lua.

 

I le tali ioe ai o Viliamu i le moliaga e pei ona tausala ai o ia, sa ia ta’utino ai e fa’apea, i se taimi o le masina o Aperila o le tausaga nei, sa ia umia faasolitulafono ai vaega o le pauta faasaina o le aisa.

 

Na faatoese le ua molia i luma o le fa’amasinoga e tusa ai o lana solitulafono, ma ia talosagaina ai se isi avanoa o ia e toe fo’i atu ai e tausi lona to’alua ma lana fanau. Sa ia faailoa i le fa’amasinoga lona salamo e tusa ai o le gaioiga sa ia faia, ma ua avea le umi e lata i le 4 masina lea na taofia ai o ia i le toese, ua fai ma lesona aoga mo lona olaga i le lumana’i.

 

Na talosaga lana loia ia Anderson mo se fa’asalaga faanofovaavaaia, ma ia fa’aaoga le umi lea na taofia ai Viliamu i le toese e fai ma ana fa’asalaga i lenei mataupu. Na faailoa e Anderson i le faamasinoga e fa’apea, o Viliamu, o se Tama talavou e to’afa lana fanau, e na o ia fo’i sa faigaluega e tausi ai lona aiga i le taimi ao lei taofia o ia i le falepuipui.

 

Ina ua loka o ia e Leoleo, e to’atolu lana fanau sa i ai, i ni nai masina e lei umi atu na fanau ai loa lona atalii lona fa. E le i vaai lava Viliamu i lona atalii lea na fanau ao i ai i totonu o le falepuipui. Na finau Anderson mo se avanoa e tatala ai loa Viliamu i tua e alu e galue i lana galuega lea o loo faatali mai o ia, e tausi ai lona aiga.

 

Na lagolagoina e le loia a le malo ia Mitchell le faafinauga a Anderson, ma ia finau ai fo’i i le fa’amasinoga ina ia faasala le ua molia i se fa’asalaga faanofovaavaaia.

 

Na faailoa e Patea ia Viliamu e fa’apea, e tasi le vaega o loo fia malamalama atili i ai le fa’amasinoga e uiga i lana mataupu. Ona o lea sa ia faailoa i le Ofisa Faanofovaavaaia, na nafua ona oo i Leoleo lana mataupu, ina ua maua vaega o fualaau fa’asaina lea sa ia tuuina atu i se tasi ali’i, peita’i o loo taua i le ripoti a Leoleo, o lona to’alua lea na viliina Leoleo na mafua ai loa ona loka o ia.

 

“Tusa lava pe eseese faamatalaga ua i luma o le fa’amasinoga, e fia faailoa atu e le fa’amasinoga ia te oe, afai e te toe faia le solitulafono lenei i le lumana’i, e toe vili fo’i e lou to’alua Leoleo ma toe loka ai fo’i oe,” o le saunoaga lea a Patea ia Viliamu.

 

O ni isi o tuutuuga o le nofovaavaaia e 5 tausaga a Viliamu, o lona tuliina lea o masina e 20 i le toese, ma totogi le salatupe e $2,000. Ua faamalumalu e le fa’amasinoga le tuliina o masina e 16 o le faasalaga faa falepuipui, ae ua fa’aaoga masina e 4 lea na taofia ai Viliamu i le toese e fai ma ana fa’asalaga i lenei mataupu.

 

E 2 tausaga lea ua tuu atu e le fa’amasinoga e totogi mai ai e Viliamu lana salatupe e $2,000. Ua fautuaina fo’i o ia ina ia aua ne’i ona toe tagofia le ava malosi poo fualaau fa’asaina, ma ia saili sana galuega e tausi ai lona aiga ma totogi ai lana salatupe.