Naunau Kovana e saili ni auala foia ai fa’afitauli fualaau fa’asaina i AS
O le faatupulaia ai o le fa’afitauli o fualaau fa’asaina atoa ai ma a’upega mata’utia i totonu o le teritori, ua naunau ai le afioga i le ali’i Kovana ia Lolo Matalasi Moliga e tau saili ni auala e mafai ai ona foia le fa’atupulaia o lenei fa’afitauli i totonu o le atunu’u.
I lana saunoaga i le tatala aloaiaina o le Nofoaiga lona 36 a le Fono Faitulafono i le masina na te’a nei, na aofia ai le mataupu i le tau sailiina o ni auala e foia ai le ulufale mai o fa’afitauli i le atunu’u, i le saunoaga a Lolo na fa’aautu i le Mataupu o le “Puipuia o Tuaoi o le atunuu atoa ai ma Galuega mo le Puipuiga o le Saogalemu Lautele”.
I fa’amaumauga mai le Ofisa o Leoleo, na taua ai le silia i le 20 osofaiga sa latou fa’atinoina i le tausaga na te’a nei, mo le sailia lea o fualaau fa’asaina ma a’upega i totonu o le atunu’u.
“O le saogalemu o nai o tatou tagata atoa ai ma le puipuia o tatou tuaoi mai le ulufale mai ai o fualaau fa’asaina, o le itu taua lea e sili ona maualuga i la’u vaai,” o se vaega lea o le saunoaga a le ali’i Kovana.
Saunoa Lolo e fa’apea, e le o se galuega faigofie sa fa’atinoina e le Matagaluega o Leoleo a le malo, i le fa’atinoina lea o osofaiga mo le fa’amoemoe e sailia ai fualaau fa’asaina o lo o aumau fa’anana i totonu o le atunu’u. Sa ia taua fo’i e fa’apea, o le popolega i lona loto, ina ne’i avea fualaau fa’asaina nei ma auala e a’afia ai le soifua saogalemu o tagatanu’u.
O le saunoaga a le ali’i kovana, sa fa’avae mai lea i se ripoti na tuuina atu i le Matagaluega o Leoleo, e fa’atatau ia latou osofaiga ma suesuega e fa’atatau i fualaau fa’asaina.
I lea ripoti mai le Matagaluega o Leoleo sa taua ai i le saunoaga a le Kovana e fa’apea, mai osofaiga e 25 sa fa’atinoina e Leoleo i le tausaga na te’a nei, e le gata sa latou maua ai a’upega malolosi i soo se ituaiga, ae sa mafai fo’i ona maua ai ma fualaau fa’asaina o le aisa ma mariuana i le tau e lata i le miliona tala lona tau aofa’i.
Na taua e Lolo e fa’apea, o le Komisi Faapitoa na tofia e Galulue mo le Fa’aitiitia o Fualaau Fa’asaina i le atunu’u, o le latou tiute auau, o le taumafai lea ina ia sailia auala e foia ai le fa’atupulaia o le ulufale mai o fualaau fa’asaina atoa ai ma a’upega i totonu o Amerika Samoa.
Sa aofia i le saunoaga a le ali’i Kovana le masini na fa’atau mai e le malo i le aitalafu o le Pone i le 2015 (scanner), lea ua matua fesoasoani malosi i le sailia o fualaau fa’asaina atoa ai ma a’upega e fa’aulufale fa’asolitulafono mai i totonu o le atunu’u.
Sa ia taua fo’i le tulaga e fa’atatau ia Amerika Samoa ma lona va feagai ai ma le puipuiga fa’a feterale, lea e aofia ai le puipuiga o ona ogasami tuaoi, e mana’omia ai le fesoasoani mai o le feterale ina ia mautinoa e saogalemu tulaga uma mo le saogalemu atoa ai ma le malupuipuia o tagatanu’u o le atunu’u.
Ae pei ona fa’ailoa atu e le Samoa News, o le puipuiga o le siosiomaga o Amerika Samoa e aofia ai laufanua ma ogasami, o lo o fa’atautaia lava lea e le malo o Amerika Samoa.
Sa aofia fo’i i le saunoaga a le ali’i Kovana le fonotaga tele a le a le Ta’ita’i Leoleo o le Pasefika (Pacific Islands Chiefs of Polic - PICP), lea ua fa’amoemoe e talimalo ai Amerika Samoa mo le ulua’i taimi i le aso 21-23 o Aokuso 2019.
O le fa’anaunauga o le ali’i Kovana e pei ona ia taua i lana saunoaga, e tatau ona fa’atulaga lelei e Amerika Samoa auala uma e mafai ai ona puipuia le ulufale mai o fualaau i totonu o le atunu’u, atoa ai ma a’upega, faapea ai ma isi lava mea fa’asaina e oo fo’i i le aumaia fa’asolitulafono o tagata e galulue ma fai i ai faiga faapologa, ina ia mautinoa e le a’afia ai tulafono a le malo i ituaiga gaioiga faapenei.
“O ituaiga gaioiga faasolitulafono faapenei, e le tatau lava ona toe tuu aunoaina, ae tatau lava ona mata’itu ina ia mautinoa e le toe avea ma tulaga e pagatia ai le malo aemaise tagatanu’u,” o se vaega lea o le saunoaga a le ali’i Kovana.
E ese mai i taumafaiga a le malo e pei ona fa’atinoina ai e le Matagaluega o Leoleo la latou tiute fa’atino, na aofia fo’i i le saunoaga a le Kovana le galuega fai fai pea a Pulega a Ali’i ma Faipule o afioaga taitasi i le atunu’u, ina ia mafai ona fa’amalosia faasalaga mo i latou o lo o alala i totonu o afioaga taitasi o loo faia nei ituaiga gaioiga, atoa ai ma le faailoaina atu i le Ofisa o le Loia Sili ina ia mafai ai ona fa’aauau le galuega faamalosi tulafono.
Na talosagaina e le afioga i le ali’i faipule ia Larry Sanitoa mai le Itumalo o Tuala-uta i le iloiloga a le Komiti o le Puipuiga o le Saogalemu Lautele a le Maota o Sui sa faia, le tatau lea i le malo ona toe silasila toto’a i le ata faataoto a le malo ua mae’a ona fa’atulaga e foia ai le fa’afitauli i fualaau fa’asaina.
Saunoa Sanitoa e fa’apea, toeititi lava o aso uma e fa’alogoina ai ripoti mai le vaega fa’asalalau e fa’atatau i solitulafono eseese e mafua mai ona o fualaau fa’asaina. Ae o se itu e sili ai ona fa’anoanoa, o le aofia ai i ripoti le tulaga e fa’apea, o nisi o tagata faigaluega a le malo o lo o aofia ai i latou i nei faiga fa’asolitulafono.
Sa taua e Sanitoa i le Samoa News e fa’apea, ua mae’a ona faapipii masini e su’e ai uta ma oloa mai fafo, e aofia ai ma le sailia o fualaau fa’asaina, peita’i, e le o manino mai lava se ripoti e fa’atatau i le aofa’i o ni fualaau fa’asaina ua mafai ona maua i masini nei talu ona amataina lea auaunaga fou.
Na lagolagoina e le Fofoga Fetalai ia Savali Talavou Ale le finagalo o Sanitoa, ma ua fa’atulaga ai loa le isi iloiloga mo le Komiti o le Puipuiga o le Saogalemu Lotoifale ma le Ofisa o Leoleo a le maota o sui i se taimi o i luma.