Ads by Google Ads by Google

Molimauina soifua tautua, tausi aiga & agalelei - Utu Abraham Malae


O se nofoaga pito i tua lea sa alaalata'i ai le pa'ia o aiga o le afioga le Matua, Utu Abe Malae, ae fa'alologo i le anoanoa'i o molimau patino i le afioga le Matua ma ona faiva eseese sa galue ma aoga ai i le pa'ia o aiga, le atunu'u ma lona malo, ae maise lana ekalesia. [ata: Leua Aiono Frost]

I le sauniga e molimauina ai e le mamalu o Aiga, Uo mamae ma nisi fo'i sa galulue fa'atasi ma le afioga le Matua ia Utu Abraham Malae sa mafai ona tutula'i le to'a 12 o sui sa autova'a mai nisi mai nu'u mamao, ina ia molimauina lona soifua galue, soifua tausi aiga, ma lona soifua lima mafola i le mamalu na aofia i le Gov. Rex Lee Auditorium i Utulei i le afiafi ananafi o le aso Lulu.

 

I lea sauniga sa ta'ita'ia lea e le susuga le Toeaina Rev Fa'alevao, o le Fa'afeagaiga Taulagi lea a le afioga le Matua i lona afio'aga o Amouli. O pese ma vi'iga sa saunia lelei lea e le Aufaipese Metotisi mai Fagatogo, o se tasi o afio'aga sa latalata i ai lona ola tuputupu a'e, ma e latou te silafia lelei fo'i vi'iga e agaga i ai Utu.

 

O molimau sa tatalaina e le tama'ita'i Faipule o Amerika Samoa i le Konekeresi, Aumua Amaata. O ia fo'i sa ia faitauina le tusi fa'apitoa mai le Peresetene o Amerika, Donald Trump, o se fe'au fa'amaise fa'apitoa i le aiga o Utu.

 

E le gata i lea, ae o lana molimau i le soifua galue o Utu, ma o se tasi e matua fa'amaumau lelei mea, toe siakia e ia ana galuega ma galuega a lona Ofisa, e le masepu se mea ia te ia.

 

I le molimau a Aumua sa ia talatala ai le 25 tausaga o avea Utu ma Taitai o nisi o Matagaluega a le malo o Amerika Samoa, e pei o le Matagaluega o Galuega Lautele,  Matagaluega o Uafu ma Malaeva'alele, ae maise ai le Pulega o le Eletise ma leSuava Taumafa.

 

"I nisi o matagaluega sa tau fa'aletonu ona fa'atautaia, sa tofia Utu e faigaluega ai mo se vaitaimi, se'ia iloga ua aluga lelei ona toe taliu lea i lana galuega tumau i le ASPA.”

 

O lenei fo'i se sui, na tofusia uma lava Faigamalo ona faigaluega ai i tofiga fa'atonusili. Faigamalo a Kovana Uiafa'atali A.P.Lutali, Tauese ma le Faigamalo a Togiola, ae o lea fo'i ua toe Fa'atonu o le ASPA i le Faigamalo a Lolo.

 

Saunoa Aumua, "Ua fa'ailoa mai le agaga fa'anoanoa o le afioga le Peresetene o le Iunaite Setete i le tu'ua e Utu...o le mafutaga ma lona malo ae maise o ona tagata lautele ma le pa'ia o Aiga, ma ua ia fa'ao'o mai lenei tusi, aua o Utu fo'i o le ta'ita'ifono o le Pati Fa'aupufai o Malo a le Ripapilikana i Amerika Samoa nei, ma sa latou sapaia fo'i lona tula'i mai."

 

"O Utu o se tasi ua iloga mai e fa'amaoni i ona tiute ma e fiafia e fai mea tonu. O ia o se tasi o tagata sa tautua i le tou malo, ma e faigata ona toe suia i lona tofiga sa tula'i ai. E le faigofie fo'i ona fa'atumuina ese tasi ona se'evae sa tutula'i ma tautua ai,” o nisi na o mau sa fa'ailo i le tusi a Trump na tolaulau i le sauniga.

 

Soso'o ai ma le molimau a le ali'i o William Spitzenberg, Pule o le Suvai Taumafa a le ASPA, ma o se tasi e faia e pei o se atali'i fo'i i le afioga le Matua, i lona tuputupu a'e ma taumafai i a'oa'oga i Amerika Samoa ma fa'asolo atu i fafo.

 

"O Utu Abe Malae o se tasi e mafai ona fa'apea, o se tama ia i matou le fanau sa ia alofaina, fesoasoani i ai ma fautua i ai ina ia saoiama le taumafaiga i agava'a e aoga mo le tatou malo ma lona toe faufausia ia mautu. O se tasi e matua atamai lava ma ua fa'amanuia i ai le Atua i tomai eseese, sa ia mana'omia e fa'atino ai le tele o galuega tau atina'e i Amerika Samoa,” o se vaega lea o le molimau a le atali'i.

 

"O ia fo'i o se tasi e matua tausia lelei lona soifua maloloina i ala o fa'amalositino, tino lelei e leai se fa'ama'ima'i e te va'aia ai, ae malosi lelei ma e to'aga e ta'alo tenisi, lea e avea ai o ia ma peresetene fo'i o le latou Asosi Tenisi i Amerika Samoa."

 

"O ia o se tasi e fiafia e tapua'i i lona Atua ma e ola mata'u fo'i i lona Atua. E matua maualuga lava le leo ato o le afioga le Matua i so'o se taimi e usu ai pese o leoleo taeao i le galuega a'o le tatala atu le aufaigaluega a le ASPA i o latou tiute masani i laina o le eletise ma le suavai taumafa.”

 

"O le a misia oe, o le a matou fa'aauauina lava galuega fa'amama o le alatele e afua mai le ASPA se'ia o'o i le Malae Va'alele, ma e talosaga atu i le vasega o ta'ita'i o le Malo, fa'amolemole ia fa'aigoaina lea vaega o le alatele i le afioga le Matua, Utu Abe Malae, e fa'amauina ai pea lana auaunaga matavela i le atunu'u i le tele o ona faiva ma le ASPA."

 

O le Molimau a le susuga Gerhard ‘Gary’ Sword ma lona faletua mai le CNMI sa la'ua molimauina ai le isi vaega o le tautua a Utu e ala i le toe fa'asa'oga lelei ona fa'atula'ia o le latou Pulega o le Eletise. Na taua'aoina e i latou mea e tolu i le la'ua molimau.

 

O le fa'ailoga fa'apitoa na taua'aoina e le Pulega o le Eletise i le CNMI (Commonwealth Utilities Corp.) lea sa ia pulesili ai i tausaga ua te’a.

 

Lona lua o le Iugafono malilie fa'atasi a le Fono Faitulafono a le Malo o CNMI e taualoa ai le tautua a Utu i lea malo.  O le lona tolu o le Tusi mai e Peresetene o le Senate a le CNMI ma ua fa'ailoa ai lona lava nofo fa'anoanoa ona o le amia o lenei ta'ita'i aoga tele ia Amerika Samoa, CNMI ma isi atumotu o Amerika i le Pasefika, atoa ai ma malo tuaoi ma Amerika Samoa, Hawaii ma le Iunaite Setete atoa.

 

O isi molimau uma o aiga o le afioga le Matua, sa iloga ai le alofa fa'asalafa o Utu i nisi sa latou galulue fa'atasi, ma ua i'u lava ina faia e pei lava o ni ona aiga, po'o ni uso moni ia te ia.

 

Ina ua mae'a le molimau lea ona fa'atasia lea o le susuga Taulapapa William Sword, Gary Sword ma le faletua ma tuafafine i se latou pese aualofa sa fa'ai'u ai nei folasaga taua.

 

O lona alofa e le muta ai i ana uo na, ae ua ia asiasi fo'i i matua o na uso ma o latou aiga i Samoa pe malaga i ai. E asia e ia ona aiga i so'o se mea e malaga i ai. Afai o Hawaii ua alu i ai, e tusia le lisi o aiga uma o i ai i Honolulu ma latou tuatusi ma telefoni ina ia feso'ota'i i ai a'o i lenei a'ai. Afai fo'i o Samoa, e alu atu lava alu sa'o i aiga o i latou ua faia e pei o ona uso.

 

"E agaga o ia i ana aufaigaluega, ae maise ia i latou e vaivai le tupe maua, e maulalo totogi. E foa'i e le manatu e toe totogia se mea, e le manatu fo'i ina toe fa'afo'i mai se tupe, ae ave fua lava. Masalo o se tasi o lea ala e mafua ai ona foa'i e le Atua ia te ia le mafaufau tonu i ona tiute, ona o lo'o silafia e le Atua nei mea lelei na te faia,” o nisi na o molimau sa fa'afofogaina mai ona uso nei sa latou amata mai o galulue fa'atasi.

 

O le upu fo'i na fa'ai'u i ai le afiafi a tamali'i, na tapena i ai le susuga le Ta'ita'i Rev. Fa'alevao. "O lea ua amia nei le isi ta'ita'i iloga o si o tatou malo, ae ou te mautinoa lelei, ua lava tapena le tatou Malo i nisi fo'i ua mae'a tu'uina i ai tomai e pei lava o Abe, latou te fa'asaoina atu le folauga a Amerika Samoa i le lumana'i manuia.