Ads by Google Ads by Google

Molia le Tina na taumafai e ave fa’anana fualaau fa’asaina totonu Toese

Ienisei Matautia
[ata: foa'i]
ausage@samoanews.com

O le faaiuga o le vaiaso na te’a nei na pu’e fa’apagta ai e Leoleo le Tina talavou lea o loo masalomia i lona taumafai e ave fa’anana se vaega tele o le pauta fa’asaina o le aisa i totonu o le toese i Tafuna i le amataga o le masina o Aokuso na te’a nei.

 

O le aso Lua o le vaiaso nei na tula’i ai Ienisei Matautia i luma o le fa’amasinoga fa’aitumalo mo lana ulua’i iloiloga. Ua molia nei o ia i le moliaga mamafa e tasi o lona umia fa’asolitulafono lea o vaega o le fualaau fa’asaina o le pauta.

 

E $10,000 lea ua fa’atulaga e le afioga i le ali’i fa’amasino ia Fiti Sunia e totogi, ona fa’atoa mafai lea ona tatala Matautia i tua mai le toese. Afai ae mafai ona totogi lea tupe, ua fautuaina o ia e le fa’amasinoga e aua ne’i ona taumafai e fa’afesoota’i molimau a le malo, pe na te toe soliina fo’i se tulafono, a ia avea o ia ma tagatanu’u e tausi i tulafono a le malo i taimi uma.

 

O le tagi fa’asaga ia Mata’utia na alia’e mai i le faalavelave lea na tula’i mai i le vaveao o le aso 1 o Aokuso o le tausaga nei, ina ua siaki atu e ali’i Leoleo o le toese se afifi na taumafai le ua molia e avatu mo se alii pagota i totonu, ae maua ai vaega o le pauta fa’asaina o le aisa.

 

E tele ni molimau sa fesiligia e Leoleo i le taimi na latou suesueina ai lenei mataupu. O ni isi o nei molimau e aofia ai le ali’i pagota lea sa fa’amoemoe e ave aga’i i ai le afifi, atoa ai ma Leoleo sa galulue i le sifi o le taeao i le toese i Tafuna, i le taimi tonu na alia’e mai ai le fa’alavelave e pei ona molia ai Mata’utia.

 

O lo o taua e le malo e fa’apea, e tusa ai ma polokalame faataoto a le toese i Tafuna, e na o le aso Lulu lava e fa’ataga ona o atu ai aiga o pagota e momoli atu ni meaai, lavalava, poo nisi lava mea e mana’omia e pagota.

 

O lea polokalame e taua o le ‘drop off’, e amata i le itula e 8:00 i le taeao ae mae’a i le itula e 3:00 i le afiafi o le aso Lulu.

 

I le aso e pei ona tula’i mai ai le fa’alavelave, na aga’i atu ai Mata’utia e momoli atu se afifi mo se ali’i pagota o loo taofia i le toese. O lea afifi na momoli atu i le itula e 3:00 i le vaveao. O le vave tele o le taimi na momoli atu ai lea afifi na mafua ai ona masalomia e Leoleo le afifi.

 

Na ona aga’i atu lava o Mata’utia i le faitoto’a pito i luma o le falepuipui i Tafuna, ma momoli atu le afifi i se ali’i Leoleo sa tiute ai ma fa’ailoa atu i ai, o le afifi lea mo lana uo pagota. Na fa’ailoa e Matautia i le Leoleo le igoa o le ali’i pagota o loo faamoemoe e ave aga’i i ai le afifi. Na mae’a loa ona momoli le afifi, liliu loa Mata’utia ma toe alu ese.

 

O le afifi e pei ona taua i suesuega a Leoleo, o se pusa cereal sa i ai i totonu se mitiafu, o se pepa susu, ma se pepa iila o loo i ai vaega o le pauta oona o le aisa sa pito lava i lalo. Na faia e Leoleo se suega i le pauta sa maua i totonu o le afifi ma faamaonia ai, o vaega ia o le pauta oona o le aisa.

 

O le mae’a ai ona tuu atu e le ua molia i le afifi i le ali’i Leoleo sa tiute, na fa’atonuina ai loa e se Leoleo sinia sa i totonu o le Ofisa le tatau lea ona siaki le afifi. Ae ina ua siaki atu, sa maua i ai vaega o fualaau fa’asaina.

 

Na taua e le ali’i pagota lea sa fa’amoemoe na te taliaina le afifi i Leoleo ina ua fesiligia o ia, sa ia fa’atali mo se afifi mai nisi o lona aiga, ae le o le ituaiga afifi lea sa ia fa’atalitali i ai. Na taua atili e lea ali’i i Leoleo e faapea, e le masani o ia i le tama’ita’i lea na alu atu ma le afifi.

 

O lo o taofia pea Matautia i le toese e fa’atali ai lana ulua’i iloiloga lea ua fa’atulaga e faia i le vaiaso fou, e iloilo ai e le fa’amasinoga, pe lava mau a le malo e lagolagoina ai le tagi fa’asaga ia te ia.