Ads by Google Ads by Google

Molia se Tina talavou i le umia faasolitulafono o fualaau fa’asaina

ausage@samoanews.com

O le vaiaso na te’a nei na taofia faapagota ai e Leoleo i le Falepuipui i Tafuna se Tina talavou, ona o tu’uaiga i lona umia fa’asolitulafono lea o vaega o fualaau fa’asaina o le aisa.

 

O le mae’a ai ona taofia e Leoleo o Julie Uiese i le toese, na tula’i ai loa o ia i luma o le afioga i le ali’i Fa’amasino ia Elvis P. Patea mo le taimi muamua. O le tama’ita’i Loia Fautua lagolago ia Anna Whiles sa tula’i mo Uiese i le taimi o lana ulua’i iloiloga.

 

O loo tu’uaia le ua molia i le moliaga mamafa o le umia faasolitulafono o vaega o le pauta faasaina o le aisa, o se solitulafono mamafa e mafai ona faasala ai se tasi i le toese mai le 5 e oo atu i le 10 tausaga, poo le faasala i le salatupe e i le va o le $5,000 ma le $20,000, poo le faasala fo’i i fa’asalaga uma ia e lua.

 

E $10,000 le tupe lea ua fa’atulaga e le fa’amasinoga e tatala ai Uiese i tua. O le taeao nei lea ua fa’atulaga e faia ai le ulua’i iloiloga a Uiese i luma o le afioga i le ali’i faamasino ia Patea.

 

E pei ona taua e le malo i le latou tagi e fa’apea, e le o se taimi muamua lenei ua a’afia ai Uiese i le tulafono. O Novema 2018 na na taofia ai fo’i o ia e Leoleo, ina ua maua i totonu o le ta’avale sa la malaga ai ma se isi tama’ita’i vaega o fualaau fa’asaina.

 

Na taua e le malo i le latou tagi e fa’apea, i le taeao o le aso 25 o Iuni 2019 na aga’i atu ai se Tina ma faila lana tagi i le Ofisa o Leoleo i Tafuna fa’asaga ia Uiese, i lona gaoia lea o lana ta’avale mautotogi.

 

Na taua e le Tina lea i Leoleo e fa’apea, na alu atu Uiese e aumai lana ta’avale Mautotogi na te fa’aaogaina mo aso e 3 ma le fa’amoemoe a mae’a ona fa’aaoga ona toe fa’afo’i atu lea. Na mae’a aso e 3 peita’i ua le toe alu atu e fa’afo’i atu le ta’avale.

 

E 3 aso o taumafai Leoleo e saili le ta’avale Mautotogi numera 4889 i luga o le alatele e le maua lava, ae o le taeao o le aso 29 o Iuni, na vaaia ai e Leoleo le ta’avale Mautotogi lea o loo paka i autafa o le auala i Futiga, e foliga mai o loo talanoa ma le ave ta’avale o le ta’avale Mautotogi ma le ave ta’avale o le isi ta’avale o loo la la tutu fa’atasi.

 

E to’alua Leoleo sa i totonu o le ta’avale Leoleo lea na vaaia le ta’avale Mautotogi o loo paka i se auala i Futiga. Na aga’i atu se tasi o Leoleo ma talanoa i le ave ta’avale o le ta’avale Mautotogi, ma faailoa i ai le mafua’aga ua ala ai ona latou sailia le ta’avale o loo ia fa’afoeina.

 

O le ave ta’avale o le ta’avale Mautotogi, o ia le ao Uiese. A o talanoa atu le ali’i Leoleo ia Uiese, sa vaaia ona foliga popole ma le le mautonu, sa vaaia fo’i le autilo solo o Uiese i ona autafa e foliga mai o loo i ai se mea o loo ia tau mafai e autilo.

 

Na faatonu e le Leoleo ia Uiese ina ia alu ese mai i totonu o le ta’avale, ina ia mautinoa ai lona tulaga saogalemu aemaise ai fo’i le saogaleo o Leoleo. A o tu Uiese i fafo o le ta’avale, sa ia toe augani i le ali’i Leoleo, pe mafai ona alu atu e ave ana meatotino o loo i totonu o le ta’avale Mautotogi sa ia fa’afoeina i le ta’avale a le ali’i lea sa la talanoa, lea o loo paka mai i le isi itu.

 

Na ioe le ali’i Leoleo ma vaaia loa le aga’i atu o Uiese ma aveese mai ana meatotino sa i totonu o le ta’avale sa ia fa’afoina, ae avatu i totonu o le ta’avale a le ali’i lea sa la talanoa, lea o loo paka lana ta’avale i tafatafa atu lava o le ta’avale a Uiese.

 

O le taimi lava na tuu atu ai e Uiese ana meatotino i totonu o le ta’avale a le ali’i sa la talanoa, na vaaia ai loa e se tasi o Leoleo se paipa tioata e fa’aaoga e ula ai le aisa faapea ai ma se straw e tipi le tulimanu o loo i ai aisa i totonu o loo nana atu ai. O le taimi lava lea na taofi ai loa e le Leoleo ia Uiese ma fa’atonu o ia e toe aveese atu ana meatotino ua i totonu o le ta’avale a le ali’i sa la talanoa, ae taofia loa Uiese i totonu o le ta’avale a Leoleo.

 

Na aveese mai e Leoleo vaega o fualaau fa’asaina atoa ai ma meatotino uma a Uiese sa tuuina atu i totonu o le isi ta’avale, ma latou aga’i atu loa i le Ofisa o Leoleo i Tafuna mo le faia o suesuega. Sa faatonuina fo’i e Leoleo le ali’i lea sa talanoa ma Uiese ina ia latou aga’i atu i le Ofisa o Leoleo i Tafuna.

 

Ina taunu’u Uiese ma Leoleo faatasi ai ma le ali’i sa la talanoa i le Ofisa o Leoleo i Tafuna, sa tofia ai loa Leoleo Suesue mai le Vaega e Taulimaina mataupu tau Fualaau fa’asaina latou te iloiloina ma fesiligia lenei mataupu.

 

Na taua e le ali’i sa talanoa ma Uiese i Leoleo ina ua fesiligia o ia, e le o ia e ana fualaau fa’asaina sa taumafai Uiese e tuu atu i totonu o lana ta’avale. Na taua e le ali’i lea e fa’apea, pe tusa o le 4 aso talu ai, na fa’ateia ai o ia ina ua alu atu Uiese i se ta’avale Mautotogi i lona fale ma lana fa’aupuga, o loo tau saili se mea e lafi ai ona o loo saili e Leoleo o ia i lona gaoia o le ta’avale Mautotogi.

 

Na taua e le ali’i lea i Leoleo lona le mana’o e nofo Uiese i lona fale, o lea na ia fai ai loa ia Uiese e sili pe a saili se isi nofoaga e nofo ai, ona e le mana’o e iloa e lona Tina lona nofo ai i lo latou fale.

 

O le taeao e pei ona tula’i mai ai le fa’alavelave, na taua ai e le ali’i lea lona maua atu o le ta’avale a Uiese i luga o le auala, o lea na ia taofia ai loa le ta’avale a Uiese ae talanoa i ai e sili pe a saili se isi nofoaga e nofo ai.

A o la talanoa ma Uiese, na fa’afuase’i ona ia vaaia se ta’avale a Leoleo ua aga’i atu i le itu tonu o loo la talanoa ai ma Uiese. O mea totino fo’i a Uiese sa ia taumafai e tuuina atu i totonu o lana ta’avale, na te lei iloaina o loo nunumi atu ai ma vaega o fualaau fa’asaina.

 

O le mae’a ai ona fesiligia e Leoleo o le ali’i sa talanoa ma Uiese, na toe tatala ai loa o ia i tua e aunoa ma ni moliaga na faila fa’asaga ia te ia. Ae ina ua mae’a ona fautuaina Uiese e tusa ai o ona aia tatau, sa ia fa’aalia ai loa i Leoleo lona le mana’o e faia sana fa’amatalaga e uiga i lenei mataupu.