E 20 tausaga o se tama’ita’i talavou na pu’e fa’apagota e Leoleo i le fa’aiuga o le vaiaso na te’a nei, ona o tu’uaiga i lona umia fa’asolitulafono o vaega o fualaau fa’asaina o le aisa ma le mariuana.

O le taeao o le aso Lua o le vaiaso nei na tulai ai Olotele Pouesi, poo Julia foi e pei ona iloa ai o ia e isi tagata i luma o le Fa’amasinoga Fa’aitumalo, ona o le moliaga tau ta’avale afi sa tu’uaia ai o ia e le malo.

Ina ua valaau lana mataupu, sa fa’atonu e le afioga i le ali’i Fa’amasino ia Fiti Sunia o ia e toe oo atu i luma o le fa’amasinoga i le taeao e sosoo ai, o le taeao lea o le aso Lulu na te’a nei mo le isi ana iloiloga faapitoa.

Ina ua toe aga’i atu Pouesi i le fale fa’amasino i le aso na sosoo ai, na tauaao aloaia atu ai loa ia te ia le kopi o le tagi fou a le malo fa’asaga ia te ia, e mafua mai i fualaau fa’asaina ia o loo tu’uaia sa maua i totonu o le ta’avale sa ia fa’afoeina i le po o le aso Sa ua mavae, aso 11 o Novema.

E $5,000 le tupe lea ua fa’atulaga e le fa’amasinoga e totogi ona fa’atoa mafai lea ona tatala o ia i tua.

Afai e tatala o ia i tua, ua fautuaina o ia ina ia aua ne’i ona toe solia se tulafono a le malo, fa’asa ona taumafai e sola ese ma le atunu’u, ma ia tuuina atu lona tusi folau e taofi e le malo. Ua fautuaina fo’i o ia e aua ne’i taumafai e fa’afesoota’i molimau a le malo i soo se taimi.

Ua molia e le malo ia Pouesi i le moliaga o le umia faasolitulafono o le pauta o le aisa, faapea fo’i ma le umia faasolitulafono o vaega o le laau fa’asaina o le mariuana.

O le mataupu e pei ona molia ai Pouesi na tula’i mai ia Novema 11 i le 6:00 i le afiafi, ina ua maua e Leoleo Suesue o le Vaega e Suesueina Fualaau Fa’asaina se fa’amatalaga, o le ta’avale mau totogi (rental car) numera R313 o loo i luga o le alatele i le taimi lea, o loo ti’eti’e atu ai le tagata e suafa ia Tautua Letasi, o ia lea o loo tau sailia e Leoleo ona o se tusi saisai sa tuuina mai e le fa’amasinoga.

Na saili e Leoleo le ta’avale ma maua ai i Pago Pago, ma taofi ai loa e Leoleo le ta’avale mo a latou su’esu’ega. Ina ua sailia totonu o le ta’avale, e lei maua ai Letasi, se’i vagana ai ni tama’ita’i se to’alua, o i laua ia o Pouesi, lea sa fa’afoeina le ta’avale, ma le isi tama’ita’i o Julie Uiese.

I suesuega a Leoleo na maua ai, e leai uma ni laisene ave ta’avale a Pouesi ma Uiese, o le mafuaga lea na faia ai loa le faaiuga e toso e Leoleo le ta’avale i le Ofisa o Leoleo, fa’atasi ai ma tama’ita’i nei e to’alua.

Ina ua fa’ailoa ia Pouesi o le a taofia le ta’avale i le Ofisa o Leoleo, o le taimi lea na musumusu ai loa Pouesi i se tasi o tama’ita’i Leoleo, o loo i ai mariuana i totonu o le ta’avale. Na saili e Leoleo totonu o le ta’avale ma maua ai fualaau fa’asiana.

Sa maua e Leoleo i totonu o se ato tupe se sikaleti mariuana faapea ai ma se pepa iila o loo i ai vaega o le pauta faasaina o le aisa. Sa faapea fo’i ona maua i totonu o se ato tupe tama’ita’i se paipa o loo i ai vaega o le pauta o le aisa. Sa faia ni suega i fualaau fa’asaina sa maua ma faamaonia ai, o vaega ia o le laau faasaina o le mariuana faapea ai ma le pauta o le aisa.

Ina ua fesiligia e Leoleo ia Pouesi e uiga i fualaau fa’asaina, sa ia ioeina ai, o ia e ana le sikaleti mariuana ae na te le iloa poo ai e ana le pepa iila ma le paipa o loo i ai vaega o le pauta o le aisa. Mulimuli ane ao fa’agasolo le fa’atalatalanoaga ma Leoleo, na toe suia ai le tali a Pouesi ma ia fa’apea atu i Leoleo, na te le iloa poo ai e ana fualaau fa’asaina sa maua i totonu o le ta’avale.

E le i mana’o le tama’ita’i o Uiese e fai sana fa’amatalaga i Leoleo e tusa ai o mea sa maua i totonu o le ta’avale.

Na taofia uma i laua i le toese i Tafuna i le po lea o le aso Sa, e fa’atali ai le taimi e tutula’i ai i laua i luma o le fa’amasinoga i le aso Lua o le vaiaso nei.

I luma o le fa’amasinoga, e na o Pouesi na valaau lona igoa, ae lei valaauina le igoa o Uiese. O le mae’a ai o taualumaga a le fa’amasinoga i le aso lea, na toe tatala ai loa i tua Uiese.