Ads by Google Ads by Google

Molia se tamaitai i le avea fa’agaoia tupe a le NASAC

O se tamaita’i sa galue i le fa’alapotopotoga a le Native American Samoa Advisory Council (NASAC) ua ia tali ioe i moliaga o le faia o gaoioiga fa’agaoi ina ua tulai i luma o le Fa’amasinoga Maugalua i le aso Faraile ua te’a.

 

O le aso 22 Fepuari 2019, lea ua fa’atulaga e le fa’amasinoga e lau ai le fa’asalaga o Dorothy Elia ma ua taofia o ia i le toese e fa’atali ai le lauina o lana fa’asalaga.

 

E pei ona taua i fa’amaumauga a le fa’amasinoga e fa moliaga mamafa sa ulua’i molia ai Elia, 37-tausaga o lona soifuaga. O ia moliaga e aofia ai le gaoi ma le faia o gaoioiga fa’agaoi a’o galuega o ia i le NASAC.

 

I lalo o le maliliega a le malo ma le ua molia, ma ua talia foi e le fa’amasinoga, sa tali ioe Elia i le moliaga mamafa o le faia o gaoioiga fa’agaoi, ae solofua isi moliaga o lo’o totoe i le tagi a le malo. O le fa’asalaga o le moliaga mamafa ua tali ioe ai Elia, e mafai ona fa’asala se tagata i le toese i se fa’asalaga e o’o atu i le 7 tausaga ma le sala tupe e le silia ma le $5,000 - pe afai e sili atu i le $20,000 le aotelega o le tupe sa aofia i le solitulafono.

 

I le tali ioe ai a Elia i le moliaga e pei ona ta’usala ai o nia, sa ia tautino ai i luma o le fa’amasinoga e faapea i le va o le masina o Ianuari ma le masina o Oketopa i le tausaga e 2016, a o avea o ia ma tagata faigaluega i le NASAC, sa ia faia ai gaoioiga fa’asese i tupe a le fa’alapotopotoga o lo’o teu i le faletupe o le ANZ Amerika Samoa Bank. Sa ia tautino e fa’apea o lea vaega tupe sa ia fa’aaogaina mo ia lava, e aunoa ma se fa’atagana a le NASAC.

 

Sa fia malamalama le afioga i le Fa’amasino Sili ia Michael Kruse pe fia atoa le tupe sa avea fa’agaoi e le ua molia. O le ali’i loia fautua ia Michael White o lo’o tulai mo le ua molia ma sa taumafai o ia e tali le fesili a le fa’amaoniga, ae taofi atu e Kruse, ina ia fa’ailoa atu lava e Elia le aofaiga o le tupe.

 

O le tali a Elia sa tuuina atu i le fa’amasinoga, e tusa ma le $36,000 sa ia avea.