Ads by Google Ads by Google

Molia se fafine faipisinisi i lona taumafai e totogi tupe se Leoleo


[ata: foa'i]
ausage@samoanews.com

O le vaiaso nei na taofia faapagota ai e Leoleo se fafine faipisinisi Asia mai Atu’u, ona o tu’uaiga i lona totogi tupe o se Leoleo ina ia mafai ai ona toe tatala i tua se ali’i e faigaluega o se kuka i lona fale’aiga.

 

O le aso Lua na tula’i ai Ping Yang i luma o le Fa’amasinoga Fa’aitumalo. Ua molia nei o ia i le moliaga mamafa o lona taumafai e totogi tupe se tagata faigaluega a le malo. O le ali’i loia ia Ryan Anderson o loo tula’i mo Yang, ae o le ali’i loia sili lagolago ia Jason Mitchell o loo tula’i mo le malo.

 

E $5,000 le tupe lea ua fa’atulaga e le afioga i le ali’i fa’amasino ia Fiti Sunia e totogi ona fa’atoa mafai lea ona tatala Yang i tua mai le toese i Tafuna. Afai e mafai ona tatala o ia i  tua, ua fautuaina ina ia aua ne’i ona toe solia se tulafono, pe toe taumafai fo’i e fa’afesoota’i molimau a le malo. Ua fautuaina fo’i o ia ina ia aua ne’i ona tuua le atunu’u i soo se taimi.

 

O lo o taua e le malo i le latou tagi e fa’apea, i le aso 8 o Oketopa, 2018 ao galulue ai Leoleo i le fa’atinoina o a latou tiute masani, na latou taofia faapagota mai ai se ali’i Asia mai se fale’aiga e fa’afesaga’i ma le nofoaga tuai o le kamupani i’a a le Samoa Packing. O lea ali’i na iloa mulimuli ane lona igoa, o Ngoc Dat Pham.

 

A o pisi Leoleo i le tau faagasolo pepa mo le taofia faapagota o Pham, na fa’afuase’i ona aga’i atu i totonu o le Ofisa o Leoleo i Fagatogo ni fafine Asia se to’alua. O se tasi o i laua ia na alu atu ma fa’ailoa i Leoleo, o ia o Yang, o ia e pulea le pisinisi e aofia ai le faleoloa ma le fale’aiga o loo faigaluega ai Pham. Na te fia iloa le mafua’aga ua ala ai ona loka ia Pham.

 

Na taua e le malo i le latou tagi le manino lelei o le tautala a Yang i le gagana Faaperetania, e malamalama lelei fo’i o ia i le gagana.

 

Ina ua mae’a ona fa’amalamalama e Leoleo ia Yang le mafua’aga ua loka ai Pham, na tula’i loa Yang i luga ma savali i fafo o le ofisa o Leoleo. Pe tusa o le 5 minute talu ona aga’i atu i fafo ia Yang, ae ulufale atu loa i totonu o le Ofisa o Leoleo se ali’i Leoleo Sinia, le susuga ia Det. John Paselio ma ia fa’amatala i le Leoleo o loo autu i ai le suesueina o le mataupu a Pham, le avatu e Yang o le $60 ia te ia ma lana fa’atonuga e alu e tatala i tua ia Pham.

 

Na taua e Paselio i le Leoleo suesue e fa’apea, ina ua uma ona tu’u atu e Yang le tupe ia te ia, sa ia uu lona lima ma taumafai e tuu i totonu o le taga o lona ofu o loo fai, ma lana fa’atonuga ina ia alu loa e tatala i tua ia Pham.

 

Na aga’i atu le Leoleo o loo autu i ai le suesueina o le mataupu i fafo o le Ofisa o Leoleo, ma fa’atonu Yang e alu atu i totonu, ma fa’ailoa ai loa e Leoleo ia Yang le tulaga ua tula’i mai, i lona taumafai lea e totogi tupe le Leoleo.

 

A o fa’agasolo le talanoaga a Leoleo ma Yang, na fa’afuase’i lava ona fai atu Yang o ia e le malamalama i le gagana Faaperetania.

 

Mulimuli ane, na taofia ai loa o ia i le toese e fa’atali ai le taimi e tula’i ai luma o le fa’amasinoga.

 

MATAUPU FA’ASAGA IA PHAM

 

O le afiafi o le aso Gafua o le vaiaso nei, aso 8 o Oketopa pe tusa o le 5:30, na aga’i atu ai Leoleo e fa’atino a latou galuega masani i le itu i sisifo o le atunu’u i Atu’u. Ao aga’i atu Leoleo, sa latou molimauina se ali’i o loo ia fa’aaoga se fana e tafana ai moa o loo tata’a i tafatafa o le fale’aiga. O lea ali’i o Pham.

 

Na aga’i atu Leoleo ma latou aveese mai le fana mai ia Pham. Sa molimauina le tumu o le fana i pulu.

 

Na fesili Leoleo ia Pham pe aisea ua ia faia ai lea tulaga, na tali le ua molia, o ia sa inu ana apa pia, ae na fa’afuase’i ona oso lona fia ‘ai i se moa, o le mafua’aga lea na alu atu ai loa ma aumai lana fana ae amata ai ona tafana moa o loo tata’a i tafatafa o le fale.

 

O moliaga e 3 ua molia ai Pham e aofia ai le fa’atupu vevesi i nofoaga faitele, fa’aaoga fa’asolitulafono o se aupega e fa’asaina, atoa ai ma le umia o se fana e faasa i le atunuu.