Ads by Google Ads by Google

Molia se ali’i mai Fiti i le faia o uiga mataga tama’ita’i 16 tausaga

ausage@samoanews.com

Ua taofia nei i le toese i Tafuna se ali’i mai Fiti e 46 tausaga le matua, ona o tu’uaiga i lona faia lea o uiga mataga i se tama’ita’i e 16 tausaga le matua, o ia fo’i o se tagatanu’u o Fiti.

O lo o tu’uaia e le malo le ali’i o Manoa Niukavu i moliaga e 6, lea e aofia ai moliaga mamafa e 2 o le faia o uiga faasotoma; 2 moliaga mamafa o le tagofia o itutinosa o se tama’ita’i, o vaega B ia o solitulafono mamafa, lea e mafai ona fa’asala ai se tasi i le toese mai le 5 e oo atu i le 15 tausaga; faapea ai ma moliaga mama e 2 o le fa’ao’olima i le tulaga tolu.

O le aso Faraile na te’a nei na tula’i ai Niukavu i luma o le Fa’amasinoga Fa’aitumalo, ma fa’atulaga ai loa e le afioga i le ali’i Fa’amasino ia Fiti Sunia le tupe e $50,000 e totogi ona fa’atoa mafai lea ona tatala o ia i tua. Sa fa’aalia fo’i i fa’amaumauga a le fa’amasinoga le musu o le ua molia e saini le kopi o le tusi saisai na poloaina ai e le fa’amasinoga le pu’e fa’apagota o ia.

Afai ae mafai ona totogi e le ua molia le tupe ua fa’atulaga e tatala ai o ia, ua poloaina o ia ina ia aua ne’i ona toe taumafai e fa’afeso’ota’i le tama’ita’i na a’afia i lenei mataupu, poo isi lava fo’i molimau a le malo. Ua fa’atonuina o ia ina ia tuuina atu lona tusi folau e taofi e le itu a le malo, ua poloaina fo’i le le mafai lea ona ia tuua le atunu’u, pe taumafai fo’i e sola ese mai le atunu’u a o fa’agasolo ai taualumaga o lana fa’amasinoga.

E tusa ai ma se ripoti mai le Ofisa o Femalagaaiga sa tuuina atu i luma o le fa’amasinoga, o Niukavu, e galue o ia i le Falema’i o le LBJ i Fagaalu o se tagata e i ai le tomai faapitoa i le masini e fai ai Faata (X-Ray Tech). O lo o ia umia fo’i le ituaiga ID o le “SB” lea fa’atoa mae’a le aoga i le tausaga fou 2019.

Na fesili Sunia i le sui o le Ofisa o Femalagaaiga, poo le a lea ituaiga ID o le “SB”, ae na fa’amanino e le tama’ita’i Ofisa, o le ituaiga ID lea e fa’ailoa mai ai o le tagata mai fafo o lo o sponsor e se Pisinisi.

Na toe fesili Sunia poo ai le pisinisi o lo o sponsor ina le ua molia, ae na tali le tama’ita’i Ofisa, o le falema’i o le LBJ.

E le i muta ai fesili a le afioga i le ali’i Fa’amasino ia Sunia, ae sa ia fesiligia le tama’ita’i Ofisa i ta’iala ua fa’ataoto e le Ofisa o Femalagaaiga, atoa ai ma le Komiti Fa’afoe o Femalagaaiga, mo kilia a le tagata mai fafo o lo o talosaga mai mo se galuega i Amerika Samoa.

E le i mafai e le tama’ita’i Ofisa ona tu’uina mai se tali e tusa ai o ia fesili.

Saunoa Sunia e fa’apea, e i ai le ripoti mai le fa’amasinoga po o le Ofisa o Leoleo e tatau i le tagata mai fafo o lo o talosaga ona tuuina mai, fa’atasi ai ma lana talosaga, ina ia mafai ona iloilo ma manino ai, e le o ia o se tagata solitulafono.

“E le mana’omia i Amerika Samoa ni tagata solitulafono mai isi atunu’u. E le mama fo’i i le fa’amasinoga lenei mataupu. O tu’uaiga e pei ona tu’uaia ai lenei ali’i, atoa ai ma le ituaiga galuega o lo o galue ai o ia, e i ai ona tulaga matuia e tatau ona silasila toto’a i ai le Ofisa o Femalagaaiga,” o le saunoaga lea a Sunia.

O le mataupu lenei na tofu atu i le Ofisa autu o Leoleo i Fagatogo, ina ua aga’i atu le tama’ita’i na a’afia e 16 tausaga le matua, fa’apea ai ma lona uso matua i le aso 19 Tesema 2017, ma fa’ailoa i Leoleo uiga mataga sa faia Niukavu i le tama’ita’i na a’afia i lo latou aiga i Pava’ia’i.

E atagia mai i fa’amaumauga sa tuuina atu e le aiga i Leoleo, e nonofo fa’atasi le ua molia ma le tama’ita’i na a’afia i le fale e tasi.

Na fa’ailoa e le tama’ita’i na a’afia i Leoleo Suesue e fa’apea, i le taeao o le as 6 Tesema 2017, na ala po ai lava e auli lona toniga aoga faapea ai ma le toniga aoga a le afafine a Niukavu. A o pisi e fai le auli, na fa’ateia o ia ina ua aga’i atu Niukavu ma fusi mai o ia ma kisi atu ia te ia. Sa ia faalogoina fo’i le pa’i atu o le itutinosa o le ua molia i lona papatua.

Na vave ona logo e le ua molia i lona uso matua le gaioiga sa faia e le ua molia ia te ia, ma vili ai loa e lona uso matua le la Tina ma fa’amatala i ai le fa’alavelave sa tupu. Na fautua le Tina i lana tama na a’afia, afai loa ae toe tula’i mai lea fa’alavelave, e sili ai loa le toe fo’i atu i Fiti i lo latou aiga.

E lima aso talu ona tuana’i le fa’alavelave muamua ae tula’i mai loa fo’i le fa’alavelave lona lua i le aso 11 Tesema, 2017 i totonu lava o le fale o le aiga i Pava’ia’i. O le aso lea e pei ona taua e le tama’ita’i na a’afia i Leoleo, e le i alu ai i le aoga ona sa lagona le tiga o lona lima, ma nofo ai loa i le latou fale. Sa nofo atu ai fo’i ma Niukavu e le i alu e faigaluega.

A o ia taoto i lona moega i totonu o lona potu, sa fa’afuase’i ona alu atu le ua molia ma taoto atu i ona tafatafa, ma amata ai loa ona ia faia uiga mataga ia te ia. Na po e le na a’afia le lima o Niukavu ma fai i ai e taofi, peita’i sa fa’aauau pea ona faia e le ua molia uiga mataga ia te ia. Na taua atili e le tama’ita’i na a’afia e fa’apea, sa ia taumafai e alu ese peita’i sa faigata ia te ia, ona e malosi tele le ua molia.

A o fa’aauau pea ona faia e le ua molia nei uiga mataga, sa tagi le tama’ita’i na a’afia ona ua lagona lona fefe. Ina ua mae’a, sa fa’ataoese i ai Niukavu ma fai i ai e fa’amagalo o ia.

O le aso 12 Tesema 2017 na sosoo ai, na taumafai ai le ua molia e fa’amalosi le tama’ita’i na a’afia la te feusua’i, peita’i sa le i mafai.

Ina ua fesiligia e Leoleo le ua molia, sa ia ioeina ai lona faia o uiga mataga i le tama’ita’i na a’afia, peita’i sa ia taua i Leoleo e fa’apea, sa malie atoatoa i ai le tama’ita’i na a’afia. Na taua atili fo’i le ua molia e fa’apea, o le fa’alavelave na tula’i mai ina ua ia fofo le lima o le tama’ita’i na a’afia sa fula, ma i’u ai lava ina tula’i mai ai loa ma le fa’alavelave e pei ona la malilie uma i ai.