O se ali’i lea na a’afia i le to’afa lea na ta’usala i le tafanaina o le Ofisa o Leoleo i Leone i le faaiuga o le tausaga e 2014, ua toe aafia nei fo’i o ia i le tulafono, ina ua maua i ai e Leoleo vaega o le pauta fa’asaina o le aisa i totonu o lana ta’avale.

O le vaiaso na te’a nei na pu’e faapagota ai e Leoleo le susuga a Sinapati Tuufaanatu, ma tula’i ai loa o ia i luma o le Fa’amasinoga Faaitumalo mo lana ulua’i iloiloga. O le ali’i Loia Fautua lagolago ia Ryan Anderson na tula’i mo Tuufaanatu, ae o le ali’i Loia Sili lagolago ia Jason Mitchell na tula’i mo le malo i lenei mataupu.

Ua molia nei Tuufaanatu i le moliaga mamafa e tasi o le umia faasolitulafono lea o vaega o le auta faasaina o le aisa, o se solitulafono mamafa e mafai ona faasala ai se tasi i le falepuipui mo le umi e le itiiti ifo i le 5 tausaga ae le sili atu i le 10 tausaga, poo le salatupe e le itiiti ifo i le $5,000 ae le sili atu i le $20,000, poo le fa’asala fo’i i faasalaga uma ia e lua.

E $5,000 lea ua faatulaga e le afioga i le ali’i Fa’amasino ia Elvis P. Patea e tatala ai i tua Tuufaanatu.

I le taimi na tula’i ai Tuufaanatu i luma o le Fa’amasinoga mo le taimi muamua, na faailoa ai fo’i e lana loia fautua i le Fa’amasinoga, le mana’o o le ua molia e fa’aagafua le faataunuuina o lana ulua’i iloiloga ae tuu sa’o atu loa lana mataupu i le Fa’amasinoga Maualuga.

Na teena e Tuufaanatu le moliaga fa’asaga ia te ia, ina ua tula’i i luma o le Fa’amasinoga Maualuga i le taeao ananafi.

O le aso 25 o Oketopa lea ua fa’atulaga e toe valaau ai lana mataupu i luma o le afioga i le ali’i Fa’amasino Sili lagolago ia Fiti Sunia.

TAGI A LE MALO

E pei ona taua e le malo i le latou tagi faasaga ia Tuufaanatu e fa’apea, pe tusa o le itula e 10 i le taeao o le aso 2 o Setema na te’a nei, na maitauina ai e Leoleo se ta’avale na matua ova maila na aga’i atu ai i luga o le alatele ma maila faatulafonoina.

O le ta’avale e pei ona taua e le malo sa alu saoasaoa, sa faafoeina lea e le susuga a Tuufaanatu, lea e 36 maila na alu ai, ae na o le 25 maila le saoasaoa faatulagaina e mafai ona o ai ta’avale i le vaega lea o le alatele.

Na aga’i atu Leoleo ma tuliloa le ta’avale a le ua molia, ma taofia ai loa o ia ae fesiligia i le mafua’aga ua soona alu saoasaoa ai lana ta’avale. E to’alua ni ali’i sa i totou o le ta’avale i le taimi na taofi ai e Leoleo, o Tuufaanatu faapea ai ma le isi ali’i sa nofo i le nofoa o le pasese, o lona igoa Tuugatala Uiese.

Ina ua fesiligia e Leoleo ia Tuufaanatu i lona laisene ave ta’avale, sa ia faailoa i Leoleo, e leai sona laisene ave ta’avale o i ai. Na faamaonia mai e le Tali Telefoni a le Ofisa o Leoleo, o le laisene ave ta’avale a Tuufaanatu na mae’a lona aoga i le aso 17 o Setema 2017.

Talu ai e leai se laisene ave ta’avale a Tuufaanatu, na taofia ai loa e Leoleo lana ta’avale, ae loka lima o Tuufaanatu mo le puipuiga o le saogalemu o Leoleo. O le isi Leoleo na faafoeina le ta’avale a Tuufaanatu ina ua aga’i atu i le Ofisa o Leoleo i Tafuna, ae o Tuufaanatu sa nofo o ia i le nofoa o le pasese, ma ona lima o loo loka.

A o aga’i atu le ta’avale i le Ofisa o Leoleo i Tafuna, sa maitauina e Leoleo le suia o foliga vaaia o Tuufaanatu, e le gata ua fefe o ia, ae sa maitauina le gaioi solo o ona lima ma ona vae. Na i’u lava i le tago atu o Tuufaanatu ua se’i mai i tua le mea ta lefulefu o le ta’avale.

A o aga’i pea le ta’avale, na aapa Tuufaanatu i lalo o le nofoa o loo nofo ai ma toso ese mai se ato mumu o loo i ai, ma fai atu i le Leoleo e ave le ato lea ia Uiese, ona o Uiese e ana le ato. Ina ua taunu’u le ta’avale i le Ofisa o Leoleo i Tafuna, na oso i fafo le Leoleo o loo ia uuina le ato ma aga’i atu loa i le ta’avale Leoleo sa momoli atu ai Uiese ma tuu atu i ai le ato mumu.

Na fesili Uiese i le Leoleo poo le a lea ato, ae na tali le Leoleo, o le ato na avatu e Tuufaanatu fai mai o le ato a ia. Na fai Uiese i le Leoleo, e le o sana ato le ato mumu lea, o le ato lea a Tuufaanatu.

Na toe fo’i le Leoleo ma fai atu ia Tuufaanatu, fai mai Uiese e le o sana ato le ato mumu lea, ae o le ato a ia (Tuufaanatu), peita’i sa finau malosi pea Tuufaanatu i le Leoleo ma fai atu i ai, o Uiese e ana le ato ae le o ia.

A o faia felafolafoaiga poo ai e ana le ato, na fai atu ai loa le isi Leoleo ia Tuufaanatu, e avatu le ato se’i su’e pe le maua ai sona ID i totonu ina ia faamaonia ai o ia, lea fo’i sa malie i ai Tuufaanatu. Ina ua saili e Leoleo totonu o le ato, sa maua i ai ni tama’i pepa iila se 3 o lo o i ai vaega o le pauta o le aisa.

Na faia e Leoleo se suega i pauta papa’e sa maua i totonu o le ato ma faamaonia ai, o vaega ia o le pauta faasaina o le aisa.

Na taua e Uiese i Leoleo ina ua fesiligia o ia e fa’apea, o le 2 vaiaso talu ai na la fetaui ai ma Tuufaanatu i le taaloga Bingo sa faia i Leone, ma mafua ai loa iina ona la masani. O le po lava fo’i lea na fai atu ai loa Tuufaanatu ia te ia, pe mafai ona alu atu e fesoasoani i le moaina o lana vao i Nuuuli.

Na taua e Uiese i Leoleo e fa’apea, ina ua alu atu Tuufaanatu e piki mai o ia i le aso lea, sa ia vaaia le ato mumu lea i totonu o lana ta’avale. Sa la aga’i atu loa ma moa le vao a Tuufaanatu i Nuuuli. Ina ua mae’a le galuega, sa toe fai atu Tuufaanatu ia te ia, pe mafai ona la o se’i fesoasoani i le teuina o lona fanua i Aoloau.

Na taua e Uiese i Leoleo e fa’apea, ao la aga’i atu ma Tuufaanatu la te o i Aoloau, na faafuase’i ai loa ona taofia le la ta’avale e Leoleo i luma o le Kolisi Tuufaatasi, ona o le saoasaoa tele o le taavale. O le taimi lea na ia vaaia ai le tago o Tuufaanatu ua una’i mai le ato mumua sa i ona tafatafa ma tuu i lalo o le nofoa o le pasese o loo ia (Uiese) nofo ai.

Ina ua fesiligia e Leoleo ia Tuufaanatu e faatatau i le ato, sa tumau pea lona teena o le molimau a Uiese e faapea o ia e ana le ato. Na malie fo’i Tuufaanatu e faataga Leoleo latou te su’eina totonu o lana ta’avale.

I le taimi na su’e ai e Leoleo le ta’avale a Tuufaanatu, sa maua ai se paipa tioata o loo i ai vaega o le pauta o le aisa i totonu, faapea ai ma lau mariuana o loo paepae solo i le mea e tuu i ai vae o le pasese. Sa maua ai fo’i e Leoleo ni straws se 2 e fa’aaoga e asu ai le pauta o le aisa, o loo taatitia i totonu o le ta’avale.