Ads by Google Ads by Google

Molia se ali’i i lona umia faasolitulafono o fualaau fa’asaina

ausage@samoanews.com

O le ali’i ave ta’avale lea na taofi e Leoleo lana ta’avale ina ua ia le usitaia tulafono i luga o le alatele, ua molia nei o ia i le moliaga mamafa o lona umia faasolitulafono o fualaau fa’asaina, ina ua su’e e Leoleo totonu o lana ta’avale ae maua ai vaega o fualaau fa’asaina.

 

O moliaga ua molia ai Tavita Vui e aofia ai lona umia faasolitulafono o le pauta fa’asaina o le aisa, atoa ai ma le moliaga mamafa o lona umia fa’asolitulafono o vaega o le laau fa’asaina o le mariuana, o ia solitulafono, e mafai ona fa’asala ai se tasi i le toese mo le umi e le sili atui le 20 tausaga, pe fa’asala i le salatupe e le sili atu i le $20,000, poo le fa’asala fo’i i fa’asalaga uma ia e lua.

 

O le vaiaso na te’a nei na tula’i ai Vui i luma o le Fa’amasinoga Fa’aitumalo mo lana ulua’i iloiloga. O le ali’i Loia Sili lagolago ia Jason Mitchell na tula’i mo le malo, ae o le tama’ita’i Loia Fautua lagolago ia Anna Whiles na tula’i mo le ua molia.

 

E $5,000 le vaega tupe lea ua fa’atulaga e le afioga i le ali’i Fa’amasino ia Elvis P. Patea e totogi ona fa’atoa mafai lea ona tatala Vui i tua.

 

A mafai ona tatala o ia i tua, ua poloaina o ia ina ia usita’i i tulafono a le malo, ia tuuina atu fo’i lona tusi folau e taofi e le Loia a le malo, ma le matai fo’i ona ia toe taumafai e fa’afesoota’i molimau a le malo i soo se auala.

 

Na talosaga le loia a Vui i le Fa’amasinoga mo se avanoa e fa’aitiitia ai le tupe e tatala ai le ua molia i le $2,000, peita’i na teena e le Fa’amasinoga.

 

Na taua e le loia a Vui e fa’apea, o vaega o fualaau fa’asaina sa maua i totonu o le ta’avale a Vui, ua na o ni vaega laiti lava e fa’aaoga mo ia lava. O Vui e pei ona taua e lana loia, o se ali’i e fai lona aiga ma lana fanau, e galue malosi fo’i i le tausiga o lona aiga, ae o le solitulafono e pei ona a’afia ai o ia, o se filifiliga ua sese ona ia faia.

 

Na tete’e malosi le itu a le malo i le talosaga. Na taua e Mitchell e fa’apea, o le tupe lea ua faatulaga e le fa’amasinoga, ua tatau ma onomea mo le mamafa o le solitulafono o loo tu’uaia ai le ua molia. Sa ia taua fo’i e fa’apea, o solitulafono e 2 e pei ona molia ai Vui, e mafai ona faasala ai o ia i le salatupe e oo atui le $20,000, peita’i o lea e na o le $5,000 le tupe ua faatulaga e tatala ai o ia i tua, lona uiga, o lo o tele le fesoasoani mo ia.

 

E talitonu le malo e pei ona finau Mtichell, e ono sola ese le ua molia ma le atunu’u pe afai ae tatala o ia, ma o lo o i ai fo’i isi suesuega a Leoleo i tulaga o fualaau fa’asaina o lo o faia faasaga ia te ia.

 

Saunoa Patea e fa’apea, o le tupe ua faatulaga e tatala ai Vui i tua, ua lava ma talafeagai.

 

O le aso Lua o le vaiaso fou lea ua fa’atulaga e faia ai le ulua’i iloiloga o le mataupu a Vui, e saili ai mau faaaonia a le malo, pe lava ma totoe e lagolago ai le tagi a le malo fa’asaga ia te ia.

 

TAGI A LE MALO

 

E pei ona taua e le malo i le latou tagi e fa’apea, o le afiafi po o le aso 30 o Iulai 2019, na maua ai e Leoleo Suesue faamatalaga e fa’atatau i se ta’avale pikiapu o lo o ti’eti’e ai le tagata e suafa ia Willie Apelu, lea fo’i e iloa e le to’atele i lona igoa o WILL.

 

O Apelu, o lo o i ai se tusi saisai mai le Fa’amasinoga o lo o tau sailia ai e Leoleo o ia. Ina ua maua e Leoleo lea fa’amatalaga, na latou aga’i atu ai loa i luga o le alatele e saili le ta’avale o lo o taua o lo o tietie ai Apelu ma isi ali’i.

 

Pe tusa e 2 itula mulimuli ane ai e maua loa e Leoleo le ta’’avale pikiapu lea i se vaega o Tafuna, ma latou taofia loa. E le i maua Apelu i totonu o le ta’avale, se’i vagnaa ai ali’i e to’alua sa i ai i totonu.

 

O i latou ia e aofia ai Vui, le ali’i ua molia nei, ma lana uo ia Ieremia Tala’i. Na toe tatala e Leoleo i tua Tala’i ina ua mae’a ona fesiligia ma fa’atalanoa o ia. E leai fo’i ni moliaga ua faia fa’asaga ia Tala’i.

 

Na faailoa e Leoleo ia Vui le mafua’aga ua ala ai ona taofi lana ta’avale, atoa ai ma lona le usitaia o tulafono i luga o le alatele, e ala i lona faafoe o se ta’avale ae leai se fusipa’u.

 

E leai se laisene ave ta’avale a Vui sa i ai i le taimi lea. Na saili atili e Leoleo le ta’avale na malaga ai Vui ma lana uo o Tala’i ma iloa ai, e ese le tagata o lo o lesitala ai le ta’avale.

 

Talu ai e leai se pepa e faamaonia ai Vui poo Tala’i, toe ese fo’i le tagata o lo o lesitala ai le ta’avale, o le mafua’aga lea na taofia ai loa e Leoleo le ta’avale i le Ofisa autu i Fagatogo, se’i vagana ua alu atu le tagata e ana le ta’avale.

 

Ina ua iloa e Vui o le a taofia le ta’avale, sa ia musumusu i se tasi o Leoleo, e i ai mea’ai e fia aveese mai totonu o le ta’avale, ina ne’i manogi leaga pe a umi ona ta’atitia ai i totonu.

 

Na faataga e le Ta’ita’i Leoleo ia Vui e o ma isi Leoleo e to’alua e tatala le ta’avale ae aveese mai mea o lo o i ai i totonu.

 

Ina ua tatala e Vui le faitoto’a o le ta’avale, na vaaia e Leoleo le taumafai o Vui e nana se mea i lalo o le nofoa o le ave ta’avale. Na vave le tulioso atu o Leoleo ma taofi Vui ae toe ta’ita’i ese mai i le itu, ma faagasolo ai loa ma le sailiina e Leoleo o le ta’avale, ma maua ai fualaau fa’asaina.

 

O fualaau fa’asaina sa maua e aofia ai se pepa iila sa i ai vaega o le pauta o le aisa, o se sikaleti mariuana ua uma ona taai, faapea ai ma se paipa tioata o lo o tumu i le aisa sa i lalo o le nofoa.

 

Na faia ni suega i vaega o fualaau fa’asaina sa maua ma faamaonia ai, o vaega ia o fualaau fa’asaina o le aisa ma le mariuana.

 

Ina ua fesiligia e Leoleo ia Vui e tusa ai o mea sa maua i totonu o le ta’avale, sa ia teena malosi ai lona iloaina o nei fualaau fa’asaina. Sa ia faailoa i Leoleo, o lona uncle e ana le ta’avale, ae sa ia faanoiina le ta’avale e la’u ai ana meamata i le maketi.

 

O lo o taofia pea Vui i le toese i le taimi nei e fa’atali ai lana ulua’i iloiloga lea ua faamoemoe e faia i le vaiaso fou.