Na avea le fa’alavelave lea na maua ai ni tamaiti aoga mai le Aoga Maualuga a Tafuna o ulaula i fualaau fa’asaina o le mariuana, ma auala na molia ai loa e le malo le ali’i o Tavita Mariota i le moliaga mamafa o le umia faasolitulafono o fualaau fa’asaina ma le fa’amoemoe e tulei ma fa’atau atu i isi tagata.

O lo o tu’uaia fo’i o ia i le moliaga mama o le faia o gaioiga e ono lamatia ai le saogalemu o fanau e laiti i lalo o le tulafono.

O le vaiaso na te’a nei na tula’i ai Mariota i luma o le fa’amasinoga fa’aitumalo, ma fa’atulaga ai loa e le afioga i le ali’i Fa’amasino ia Fiti Sunia le tupe e $10,000 e totogi, ona fa’atoa mafai lea ona tatala o ia i tua.

Afai ae mafai ona tatala o ia i tua, ua fa’asa ona ia toe taumafa e faafesootai tamaiti aoga na a’afia, poo isi fo’i molimau a le malo. Ua faasa ona ia toe taumafai e soli le tulafono, pe taumafai fo’i e tuua le atunu’u, a ia avea o ia ma tagata nu’u e usita’i i tulafono uma a le malo.

O le aso Tofi na te’a nei na tula’i ai Mariota i luma o le fa’amasinoga maualuga, ma ia teena ai moliaga fa’asaga ia te ia, ina ua le mafai ona fa’ataunu’uina lana ulua’i iloiloga lea sa fuafua e faia i luma o le Fa’amasinoga Fa’aitumalo, ona sa manatu o ia e fa’aagafua ona aia tatau, ae tu’u sa’o atu loa lana mataupu i luma o le fa’amasinoga maualuga, ma fa’atulaga ai loa se aso e faia ai lana fa’amasinoga autu.

Na taua e le malo i le latou tagi e fa’apea, o le mataupu lenei na tofu atu i le Vaega e Suesueina Fualaau Fa’asaina a le Ofisa o Leoleo, ina ua logo e se sui o le Aoga Maualuga a Tafuna le Ofisa o Leoleo mo se fesoasoani, ina ua maua ni tamaiti aoga o ulaula mariuana i se vaega o le lotoa i le masina na te’a nei.

Na taunu’u Leoleo ma maua ai loa le avanoa latou te fesiligia ai ni isi o fanau aoga na a’afia i lenei mataupu. Na taua e se tasi o fanau aoga e faapea, o mariuana sa latou ulaina, na avatu lea e Mariota ia te ia, e totogi ai lana galuega o lo o fai, o le fa’atauina lea o ana sikaleti mariuana i isi tagata.

Na taua atili e le fanau aoga lea i Leoleo e fa’apea, e masani ona avatu e Mariota ana sikaleti mariuana e alu e fa’atau, ae a mae’a, ona ia avatu lea o mariuana ia te ia, e fai ma totogi o lana galuega.

Na taua atili e le fanau aoga lea e fa’apea, e masani fo’i ona maua mai ana mariuana i le isi ali’i e igoa ia Duece, poo Lewis Lokeni fo’i e pei ona iloa tele ai o ia e tagata.

Na maua le avanoa e fesiligia ai e Leoleo ia Mariota e uiga i lenei mataupu. Na taua e Mariota e fa’apea, o mariuana sa ia tuuina atu i le fanau aoga na a’afia, na maua mai i le ali’i e igoa ia Faitele, ae le o Lokeni e pei ona taua e fanau aoga.

O ni isi o mariuana na te maua mai ia Faitele, na te fa’atauina atu se vaega i ana uo, ae o isi vaega na te foa’i fua atu i ni isi o fanau aoga.

O le ali’i o Lokeni e pei ona taua i le fa’amatalaga a fanau aoga i Leoleo, o lo o taofia fo’i o ia i le toese i le taimi nei, ona o lo o molia o ia i le moliaga o le umia faasolitulafono o le pauta oona o le aisa.

O Lokeni na molia i le fa’alavelave lea na taofia ai lona atali’i e tasi le tausaga le matua i le falema’i ina ua ‘ona i le pauta o le aisa, ae ina ua aga’i atu Leoleo e saili o ia, ae maua ai vaega o le aisa ma le mariuana i lona tino.

O Mariota ma Lokeni, na ta’usala fa’atasi i laua fa’atasi ai ma nisi o ali’i talavou e le Faamasinoga Maualuga, i le mataupu lea na latou fai’aiga ai ma se tama’ita’i e talavou i lalo o le tulafono i le 2012.

O le fa’aiuga o lea mataupu, na tuli ai e Mariota ma Lokeni le ta’i 28 masina i le toese i Tafuna, o se tasi lea o tuutuuga o le la nofovaavaaia e 7 tausaga.