O le ali’i e 46 tausaga le matua lea na taumafai e faaoo manu’a tuga i lona to’alua, atoa ai ma lona folafola o le fasiotia o ia e lafoa’i lona tino i le sami, ua molia nei o ia e le malo i moliaga mamafa e 2 o le fa’aoolima i le tulaga lua atoa ai ma le taofia faapagota o se tagata i se auala fa’amalosi.

Talu ai o lenei mataupu o lo o a’afia ai sau’aga fa’asaga i le Tina, o le a le mafai ai e le Samoa News ona faalauiloa le suafa o le ua molia i lenei mataupu.

O le 3 vaiaso talu ai na mua’i pu’e fa’apagota ai e Leoleo le ua molia i le mae’a ai lea ona su’esu’eina e Leoleo o lenei mataupu, ma faila ai loa moliaga fa’asaga i lenei ali’i. Peita’i na solofua e le Fa’amasinoga Faaitumalo le tagi a le malo fa’asaga i le ua molia i le vaiaso na te’a nei, ina ua le mafai e le malo ona valaau le latou molimau i le taimi o le ulua’i Iloiloga o lenei mataupu.

O le vaiaso lava na te’a nei na toe faila ai loa e le malo le latou tagi fa’asaga i le ua molia, ma maua ai loa le avanoa e fa’atulaga ai le ulua’i iloiloga o lenei mataupu i le aso Lua o le vaiaso nei, ma faia ai loa e le afioga i le ali’i Fa’amasino ia Elvis P. Patea le faaiuga e tuuina atu ai lenei mataupu e fa’aauau i luma o le Fa’amasinoga Maualuga, ina ua fa’amalieina le Fa’amasinoga i mau fa’amaonia sa folasia e le malo e lagolago ai le latou tagi fa’asaga i le ua molia.

O lo o taofia pea i le toese i Tafuna le ua molia ina ua le mafai ona ia totogi le tupe e $10,000 e tatala ai o ia i tua.

Na teena e le ua molia le tagi a le malo ina ua tula’i i luma o le afioga i le ali’i Fa’amasino Sili ia Michael Kruse. Na teena e le Fa’amasinoga le talosaga a le malo, mo se avanoa e fa’aleaoga ai le tuutuuga lea e fa’asa ai ona fesoota’i le ua molia ma lona to’alua.

Poloaina e Kruse loia a itu e lua ina ia mautinoa, e le mafai lava ona fesoota’i le ua molia ma lona to’alua se’i vagana ua tuuina atu se poloaiga a le Fa’amasinoga.

ULUA’I ILOILOGA

E to’atasi le molimau na valaau e le malo i le taimi o le ulua’i iloiloga, o le tama’ita’i Leoleo Suesue lea ia Tulutuluitao Taliga, o ia fo’i lea sa autu i ai le suesueina o lenei mataupu.

Na taua e le molimau a le malo e fa’apea, o le po o le aso 9 o Setema na logoina ai o ia na te suesueina se mataupu e fa’atatau i sau’aga i totonu o aiga o lo o tula’i mai i Leone. Na aga’i atu le Leoleo Suesue ma amata loa le faatalatalanoaina o le Tina na a’afia i le Ofisa o Leoleo i Leone.

I le taimi o le fa’atalatalanoaga, sa vaaia ai e le Leoleo Suesue foliga popole toe fefe o le Tina na a’afia. Sa vaaia fo’i ona foliga le mautonu atoa ai ma le gatete o lona tino i le taimi o le fa’atalatalanoaga.

Na taua e le Tina na a’afia i le Leoleo Suesue e fa’apea, i le po e pei ona taua, na la aga’i atu ai ma lona to’alua e momoli nisi o le latou aiga i le ta’aloga Bingo sa faia i Fagaima. Ina ua mae’a ona momoli le au Bingo, na la toe aga’i atu ai loa ma lona to’alua i le Fale.

O le aiga e nonofo i Nu’uuuli, peita’i sa ui le la ta’avale i le auala e aga’i atu i le Malae Tapolo, ma aga’i atu ai lava i le Magatolu i Futuiga. Sa manatu le Tina o le a aga’i le la ta’avale i le itu e alu i Nu’uuli, peita’i sa ia vaaia ua aga’i le la ta’avale i le itu e aga’i i Leone.

Sa vaaia e le Tina le alu saoasaoa o le ta’avale a lona to’alua (le ua molia), o lea na ia fesili atu ai loa i lona to’alua poo fea la te o i ai, peita’i sa leai lava se tala a lona to’alua ae ua atili ai ona alu saoasaoa le ta’avale.

E lei umi ae amata loa ona talanoa atu lona to’alua ia te ia e fa’atatau i tala o loo salalau solo, e uiga i le la faigauo ma se ali’i ave pasi. Na fai le Tina na a’afia i lona to’alua, e le moni tala o loo ia fa’alogo ai, e leai fo’i se la faigauo ma se ave pasi.

Na taua e le Tina i le Leoleo Suesue, sa ‘ona lona to’alua i le po lea, o le mafua’aga fo’i lena na matua ia popole ai, ina ne’i lavea le la ta’avale. O nisi taimi e tipi ta’i 2 pe ta’i 3 fo’i e le ua molia isi ta’avale i luga o le alatele, a o la aga’i atu pea i Leone.

Sa toe fesili le Tina na a’afia i lona to’alua poo fea la te o i ai, ae na tali le ua molia e fa’apea, “soia e te fesili soo, tau lava o lou nofo ma vaai i le mea o le a ou faia ia te oe. O le a ou fasia oe faatigaina, fasioti oe ae lafoa’i lou tino i le sami ina ia le toe mafai ai ona maua e se isi.”

A o aga’i le ta’avale, na taua e le Tina na a’afia i le Leoleo Suesue le oso a’e o ona lagona fefe ma le palaai. O le taimi lava na alu lemu ai le la ta’avale i se tasi o vaega o le alatelei Leone, na tatala ai loa e le Tina le ta’avale ae oso i fafo.

Sa i ai se ta’avale na sau mai tua na iloa maia le fa’alavelave, ma tu ai loa le ta’avale ao taumafai le Tina na a’afia e sulu atu i le ave ta’avale o le ta’avale lea mo se fesoasoani. O le itu e laki ai e pei ona taua e le Tina, na te iloaina lelei lava le ave ta’avale o le ta’avale lea na mulimuli atu i o la tua, o lea na ia valaau ai loa i le igoa o le Fafine ma maua ai loa le fesoasoani mo ia.

A o sulu atu le Tina na a’afia i le ave ta’avale o le ta’avale na mulimuli atu i o la tua mo se fesoasoani, sa vaaia le savali atu o lona to’alua ma fa’atonu o ia e oso i totonu o le la ta’avale la te o, peita’i sa musu le Tina, o lea na toe savali ai loa le ua molia ma oso i totonu o lana ta’avale ma alu ese loa.

O le Fafine la lea na ia momoli le Tina na a’afia i le Ofisa o Leoleo i Leone mo se fesoasoani.Na fesili le loia a le ua molia i le Molimau, pe sa i ai se taimi na fa’aoolima ai le ua molia i lona to’alua, na tali le Leoleo Suesue, “e leai”.

Sa toe fesili le loia a le ua molia, pe sa i ai ni manu’a tuga i le tino o le Tina na a’afia i le taimi na ia fesiligia ai o ia, na tali le Leoleo Suesue, “e leai”.I le mae’a ai ona fa’afofoga o le Fa’amasinoga i mau sa folasia e le malo, na saunoa ai loa Patea e fa’apea, ua lava ma totoe mau e lagolagoina ai le tagi fa’asaga i le ua molia.

O le aso 6 o Tesema i le itula e 9:00 i le taeao lea ua fa’atulaga e toe tula’i ai le ua molia i luma o le Fa’amasinoga Maualuga.