E 35 tausaga o se ali’i mai Samoa ua tu’uaia e le malo i moliaga mamafa o le faia o uiga mataga i se teineitiiti e aiga i ai e 16 tausaga le matua.

Talu ai o le puipuiga o le tama’ita’i o lo o a’afia i lenei mataupu, o le a le mafai ai e le Samoa News ona fa’alauiloa le suafa o le ua molia i lenei mataupu.

O le ali’i ua molia, o se tagatanu’u o Samoa, na mae’a le aoga o lona pepa nofomau i le 2 tausaga talu ai, ma o lo o aumau nei o ia i le atunu’u e le tusa ai ma tulafono tau Femalagaaiga.

O le vaiaso na te’a nei na tula’i ai o ia i luma o le Fa’amasinoga Fa’aitumalo mo le ulua’i taimi. O lo o tu’uaia o ia i moliaga mamafa e 6, lea e aofia ai moliaga e 2 o le faiaiga ma se tama’ita’i e talavou i lalo o le tulafono; 2 moliaga o le tagofia o itutinosa o se tama’ita’i laititi i le tulaga muamua; faapea ai ma moliaga e 2 o lona faia o uiga mataga fa’afeusuaiga fa’asaga i se tama’ita’i e laititi i lalo o le tulafono.

E $50,000 le vaega tupe lea ua fa’atulaga e le Fa’amasinoga e totogi ona fa’atoa mafai lea ona tatala le ua molia i tua. Afai ae tatala o ia i tua, ua poloaina o ia e le Fa’amasinoga e le mafai ona ia toe nofo i le nu’u o loo nofo ai le tama’ita’i na a’afia, ae ua tatau ona saili se isi nofoaga e nofo ma aumau ai a o fa’agasolo taualumaga o lana mataupu.

E le matai fo’i ona ia taumafai e fa’afesoota’i sa’o le tama’ita’i ua a’afia i soo se auala, poo lona aiga fo’i. E le mafai fo’i ona ia fa’aaogaina ni isi tagata o lona aiga e fesoota’i atu i le tama’ita’i ua a’afia ma lona aiga mo ia.

O le aso tofi o le vaiaso nei lea ua fa’atulaga e faia ai le ulua’i iloiloga o lenei mataupu.

O lenei mataupu na tofu atu i le Ofisa o Leoleo i Tafuna i le amataga o le masina lenei, ina ua faila e le Tina o le tama’ita’i na a’afia sana tagi fa’asaga i le ua molia, ina ua masalomia le faia o se la mafutaga fa’aleulugali’i ma lana tama teine e 16 tausaga le matua.

Na taua fo’i e le Tina i Leoleo e fa’apea, o lo o masalomia fo’i le a’afia o le ua molia i le fa’atauina atu o fualaau fa’asaina e aofia ai le pauta o le aisa.

Sa tuuina atu e le Tina i Leoleo ni isi o mau e lagolagoina ai lona masalosaloga i le a’afia lea o le ua molia i le fa’atauina o fualaau fa’asaina, e pei o le pusa pepa iila laiti o lo o utu ai le pauta o le aisa ma fa’atau atu, lea sa maua i totonu o le fale a le ua molia, atoa ai ma ni paipa tioata se lua ua taei isi tulimanu, sa maua fo’i i totonu o le fale a le ua molia.

E pei ona manino i le tagi a le malo, e le mamao ese lava le fale e nofo ai le ua molia mai le fale e nofo ai le tama’ita’i o lo o a’afia i lenei mataupu.

E pei ona taua e le malo i le latou tagi e fa’apea, o le faalavelave muamua lava na tula’i mai i le po o le aso 26 o Tesema, 2018, ina ua ala i luga le tama’ita’i na a’afia ma ia vaaia ai le ua molia o loo taoto atu i ona tafatafa i totonu o lona potu moe, ma o lo o tago atu i vaega o lona tino.

Na taua e le tama’ita’i na a’afia i Leoleo lona popole i le taimi na ia maitauina ai gaioiga a le ua molia, peita’i sa ia taumafai pea e fa’ato’a lona mafaufau, ma ia fa’atonuina ai loa le ua molia e alu ese i fafo ma lona potu, peita’i sa taoto pea lava le ua molia e le i fa’alogo i lana talosaga.

Ina ua mae’a le fa’alavelave na tula’i muamua na amata ai loa iina ona taumafai le ua molia e faia ni auala e fa’atosina atu ai le tama’ita’i ia te ia, e ala i lona tu’uina i ai o tupe atoa ai ma lona fa’atauina i ai o mea’ai mo ia, e pei ona taua i le tagi a le malo.

O le fa’alavelave lona lua na tula’i mai i le po o le aso 24 o Ianuari 2019 ina ua alu atu le ua molia ma fafagu mai le tama’ita’i na a’afia mai totonu o lona potu sa moe ai, ma fai i ai la te savavali i fafo o le fale la te talanoa ai.

Na faamatala e le tama’ita’i na a’afia i Leoleo le la aga’i atu ma le ua molia i le fale o lo o nofo ai, ma fa’atino ai loa e le ua molia le solitulafono. Na taua e le tama’ita’i lona fiu e tete’e ma taofi le ua molia, peita’i sa ia finau malosi lava e fa’atino le solitulafono ua ia mana’o i ai.

Na taua atili fo’i e le tama’ita’i na a’afia e fa’apea, e le gata sa ‘ona le ua molia i le po lea, ae sa ese lava fo’i lana vaai i ai, e foliga mai sa i ai se isi aafiaga tulaga ese na a’afia ai o ia, e pei o lona tagofia lea o fualaau fa’asaina.

“Sa ou finau i le ua molia e taofi lana gaioiga o lo o faia, peita’i sa le mafai lava ona ia fa’alogo mai, ae sa ia taofi o’u lima ma fa’aauau pea le solitulafono,” o le molimau lea a le tama’ita’i na a’afia i Leoleo.

E 3 aso talu ona mae’a ona faila le tagi a le Tina o le tama’ita’i na a’afia, ae mafai loa e Leoleo ona maua le ua molia mai le fale o se tasi o ana uo sa nofo ai, ma fesiligia loa e tusa ai o lenei mataupu.

I le taimi muamua o le fa’atalatalanoaga ma Leoleo, sa pepelo ai le ua molia na te lei faia se solitulafono. Peita’i ina ua toe fesiligia fa’alua e Leoleo, sa ia ta’utino ai loa i Leoleo, e fa’amaonia fa’amatalaga e tusa ai o le gaioiga sa ia faia.

Na pau le itu na tete’e i ai le ua molia, o tu’uaiga e fa’apea o lo o ia a’afia i le fa’atauina atu o fualaau fa’asaina. Na taua e le ua molia e fa’apea, e leai ma se taimi o lona olaga na ia a’afia ai i le fa’atauina atu o ni fualaau fa’asaina i ni isi tagata.

O lo o taofia pea le ua molia i le toese i Tafuna e fa’atali ai le taimi e tatala ai o ia i tua, pe afai e mafai ona ia totogi le tupe ua mae’a ona fa’atulaga e le fa’amasinoga.