Ads by Google Ads by Google

Molia se ali’i i lona faia o uiga mataga i se teineitiiti


[ata: foa'i]
ausage@samoanews.com

O le vaiaso na te’a nei na pu’e fa’apagota ai e Leoleo se ali’i e 42 tausaga le matua, ona o tu’uaiga i lona faia lea o ni uiga mataga i se teineititi e 16 tausaga le matua. O le susuga a Reupena Vaega, o se ali’i ave taxi, na tula’i i luma o le Fa’amasinoga Fa’aitumalo mo lana ulua’i iloiloga i le vaiaso na te’a nei.

 

Ua tu’uaia e le malo ia Vaega i moliaga mamafa e 2 o lona tagofia lea o itutinosa o se tama’ita’i e laititi i lalo o le tulafono, o le vaega D lea o solitulafono mamafa, faapea ai ma le moliaga mama e tasi o lona faia lea o ni gaioiga e ono lamatia ai le saogalemu o fanau laiti.

 

E $30,000 lea ua fa’atulaga e le fa’amasinoga e totogi ona fa’atoa mafai lea ona tatala Vaega i tua e fa’atalitali ai taualumaga o lana mataupu. Afai ae mafai ona tatala o ia i tua, ua i ai tuutuuga a le fa’amasinoga e tatau ona ia usitaia.

 

Ua poloaina fo’i o ia e le tatau ona ia toe taumafai e fa’afesoota’i molimau a le malo, e aofia ai le tama’ita’i o lo o a’afia ma lona aiga.

 

O le aoauli a taeao lea ua fa’atulaga e faia ai le ulua’i iloiloga o lenei mataupu, ma maua ai loa le avanoa o le fa’amasinoga e iloilo ai mau fa’amaonia a le malo e lagolago ai le latou tagi.

 

O lenei mataupu na tofu atu i le Ofisa o Leoleo i Tafuna i ni nai vaiaso e lei mamao atu, ina ua faila e le Tama o le tama’ita’i na a’afia sana tagi i le Ofisa o Leoleo, fa’asaga ia Vaega ma lana gaioiga sa faia i lona afafine.

 

O le mae’a ai ona taulimaina e Leoleo o lenei tagi, na faia ai loa le latou suesuega mo le tau sailia o mau fa’amaonia e lagolago ai moliaga fa’asaga i le ua molia.

 

E pei ona taua i le tagi a le malo, o le tama’ita’i na a’afia ma le susuga a Vaega, e nonofo uma i le pito o Ottoville i Tafuna, e leai fo’i se mamao o le vaega e tu ai le fale o le tama’ita’i na a’afia, ma le vaega o lo o i ai le fale o loo nofo ai Vaega.

 

O nisi la o aso, e masani ai lava ona piki le ta’avale a Vaega le teineititi na a’afia ma nai ona tei ma momoli i le aoga, pe afai e maua mai e Vaega le tama’ita’i na a’afia ma nai ona tei o savavali i luga o le auala e aga’i atu i le aoga.

 

O se tasi aso i le masina o Mati o le tausaga nei e pei ona taua e le malo, na piki ai e Vaega le tama’ita’i na aafia ina ua ia vaaia o ia o loo savali to’atasi i luga o le auala e aga’i atu i le latou fale.

 

O le avanoa la lea e pei ona taua e le malo i le latou tagi, na fai ai loa le ua molia i le tama’ita’i na a’afia, pe mafai ona ia pikiina o ia i le aso Toona’i o le vaiaso lava lea la te o la te tietie ma talatalanoa. Na malie i ai le tama’ita’i ma alu atu ai loa le ua molia ma piki mai o ia i le aso e pei ona atofaina, ma la aga’i atu ai loa i se tasi o nofoaga e latalata i le fale a le ua molia i Ottoville lava.

 

O le talanoaga la lea i le va o le ua molia ma le tama’ita’i na a’afia e pei ona tu’uaia e le malo i le latou tagi, na tu’u ai loa e le ua molia le $60 i le tama’ita’i na a’afia ma lana fa’aupuga, o le tupe lea e fa’atau ai se mea e mana’o i ai.

 

E lata i le 2 itula le umi o le talanoaga sa faia i totonu o le ta’avale a le ua molia. Na taua e le tama’ita’i na a’afia i Leoleo e fa’apea, a o la talanoa ma le ua molia i totonu o lana ta’avale, sa fa’afuase’i ona tago atu o ia i lona fatafata. Sa ia lagona le fefe ma le popole ma ia fai atu ai loa i le ua molia, e le tatau ona ia faia nei ituaiga amioga mataga ia te ia.

 

Na taua fo’i e le tama’ita’i na a’afia i Leoleo e fa’apea, o le fa’alavelave lona lua na tula’i mai i le vaiaso ina ua mae’a le fa’amanatuina o le Fu’a a Amerika Samoa ia Aperila o le tausaga nei, ina ua alu atu le ta’avale a le ua molia ma piki mai o ia i lona fale, ma la ti’eti’e ai fo’i lea i le nofoaga sa la talanoa muamua ai ma la toe talanoa ai fo’i lea i totonu o le ta’avale mo se taimi umi.

 

I lea talanoaga, na tu’u atu ai e le ua molia le $70 ia te ia ma lana fa’aupuga, o le tupe lea e fa’atau ai se mea e mana’o i ai. O le talanoaga lona lua fo’i lea e pei ona taua e le tama’ita’i na a’afia i Leoleo, sa folafola atu ai e le ua molia, o le a ia fa’atauina se telefoni mo ia ina ia faa faigofie ai ona la feso’ota’i.

 

O le isi vaiaso na sosoo ai na fa’atau ai loa e le ua molia le telefoni ma tu’u i le tama’ita’i ina ia mafai ai ona la fesoota’i. E le i umi ona i ai le telefoni i le tama’ita’i, ae tago loa ma foa’i i le isi ana uo tama’ita’i, ona sa popole lona loto ina ne’i te’i ua maua e ona matua le telefoni o lo o ia te ia.

 

O le fa’alavelave na mafua ai ona tofu atu i lenei mataupu i le Ofisa o Leoleo, na tula’i mai lea i le amataga o le masina nei, ina ua maua e le Tina o le tama’ita’i na a’afia se tupe i totonu o le taga o le ofu a lana tama, ma ia fesili ai loa poo fea na aumai ai lea tupe, ae na tali le tama’ita’i na a’afia, o le tupe na avatu i le ave taxi na momoliina atu o ia, lea o lo o paka lana ta’avale i luma o le auala.

 

Ina ua savali mai le Tina i luma o le auala e siaki pe faamaonia o lo o i ai se taxi o loo paka ai, ae ona vaaia ai lona to’alua o loo talanoa atu ma le ave taxi i luma o le auala.

 

Na fa’ailoa e le Tina i lona to’alua le tupe na ia maua i le ofu o le la tama teine, atoa ai ma le fa’amatalaga, o le tupe na avatu i le ali’i ave taxi o loo la talanoa.

 

Ina ua fesiligia e Leoleo le tama’ita’i na a’afia, sa ia fa’ailoa ai loa mea uma lava sa tutupu i le va o ia ma le ua molia, e pei o le tuuina atu o tupe ia te ia, o le fa’atauina o le telefoni, atoa ai ma le tago atu o le ua molia i ona itutinosa.

 

Ina ua fesiligia e Leoleo le ua molia, sa ia ioeina ai lona fa’atauina o le telefoni mo le tama’ita’i na a’afia, faapea ai ma lona tuuina atu o ni tupe ia te ia, peita’i, na teena e le ua molia lona tagofia o itutinosa o le tama’ita’i na a’afia.

 

Na taua e le ua molia i Leoleo, sa ia fai i le tama’ita’i na a’afia, na te le faia lava ni uiga mataga ia te ia i soo se taimi la te talanoa ai.

 

O lo o taofia pea Vaega i le toese se’i vagana ua ia totogia le tupe ua mae’a ona fa’atulaga ona fa’atoa mafai lea ona tatala o ia i tua.