Ua taofia nei i le toese i Tafuna se ali’i e 32 tausaga le matua, ona o tu’uaiga i lona faia lea o uiga mataga i se tama’ita’i e 16 tausaga le matua, e ala i lona tagofia o ona itutinosa.

O le tama’ita’i laititi o lo o a’afia i lenei mataupu e pei ona taua e le malo, o le tei (niece) lea o le uo tama’ita’i a le ua molia.

Na aga’i atu le susuga a Été Aumua e saini i luga o le Ofisa Faanofovaavaaia i le aso Lulu na te’a nei, ae pu’e fa’apagota ai loa ma ia i totonu o le Fale Fa’amasino Fa’aitumalo, ona o se tusi saisai o lo o i ai e fa’atatau i lenei mataupu.

O le taeao lava fo’i lea o le aso Lulu na tula’i ai loa o ia i luma o le Fa’amasinoga Fa’aitumalo mo le taimi muamua, ma ia teena ai tu’uaiga fa’asaga ia te ia.

O lo o tu’uaia e le malo ia Aumua i moliaga mamafa e 2 e aofia ai le faia o uiga faasotoma, o le vaega B lea o solitulafono mamafa, lea e mafai ona fa’asala ai se tasi i le toese mai le 5 e oo atu i le 15 tausaga, faapea ai ma le moliaga o lona tagofia lea o itutinosa o se tama’ita’i e laititi i lalo o le tulafono i le tulaga muamua, o le vaega D lea o solitulafono mamafa, lea e mafai ona fa’asala ai se tasi i le toese mo le umi e le sili atu i le 5 tausaga, pe fa’asala fo’i i le salatupe e le sili atu i le $5,000, poo le fa’asala fo’i i fa’asalaga uma ia e lua.

E $10,000 le vaega tupe lea ua fa’atulaga e le afioga i le ali’i Fa’amasino ia Elvis P. Patea e tatala ai i tua Aumua. Afai ae mafai ona totogi lea vaega tupe, ua fautuaina o ia ina ia aua ne’i ona toe taumafai e fa’afesoota’i molimau a le malo e aofia ai ma le tama’ita’i o lo o a’afia i lenei mataupu i soo se auala.

O le itula e 10:30 i le taeao a taeao lea ua fa’atulaga e faia ai le ulua’i iloiloga o le mataupu a Aumua i luma o le afioga i le ali’i Fa’amasino ia Patea.

O le mataupu lenei na tofu atu i le Ofisa o Leoleo i Tafuna, ina ua aga’i sa’o atu le tama’ita’i e 16 tausaga le matua na a’afia i le aso 10 o Iuni, 2019 ma faila lana tagi fa’asaga ia Aumua, i lona faia lea o uiga mataga ia te ia i le po ua mavae i totonu o le latou fale i Iliili.

Na faamatala e le tama’ita’i na a’afia i Leoleo e fa’apea, o Aumua, o le uo tama lea a lona aunty o loo latou nonofo faatasi i le latou aiga.

Na faamatala e le tama’ita’i na a’afia i se latou faatalatalanoagama Leoleo e fa’apea, i le po o le aso 9 o Iuni ao moe i luga o lona moega i totonu o lona potu, sa ia fa’alogoina lona aunty o loo misa ma Aumua i totonu o le potu malolo.

Na avea le misa a Aumua ma lona aunty ma itu na ala ai loa le tama’ita’i na a’afia mo sina taimi, fa’atoa toe taoto ai loa i lona moega ma moe. A o moe, sa ia faalogoina le pao atu o se tagata i totonu o lona potu, ma ia iloa ai, o lona aunty lea o loo tau su’e ona seevae i lalo o lona moega.

Sa ia vaaia lona aunty ua tui ona seevae koleni ma savali ese atu loa i fafo ma le fale, ma aga’i ese atu, ae tuua ai na o ia ma Aumua i totonu o le fale. A o moe i lona moega, sa ia faalogoina Aumua o valaau ane i lona igoa peita’i e le i tali i ai. Sa ia toe faalogoina fo’i Aumua ua toe valaau atu i lona igoa, ma tauanau o ia e alu atu i luma o le potu malolo la te talatalanoa ai, peita’i, sa faataliga tuli pea i ai e aunoa ma sona tali atu i le valaau a Aumua.

Na taua e le tama’ita’i na a’afia le faateia o ia i se taimi ao moe i luga o lona moega, ina ua ia faalogoina se tagata ua tago atu i lona itutinosa faapea ai ma lona fatafata. Sa pupula ona mata ma ia iloa ai Aumua o loo taoto atu i ona luga, ma ona lima o loo tago atu i lona fatafata ma lona itutinosa.

O le taimi lea na ia ee ai loa i luga ma ia tuli ese Aumua mai totonu o le potu, peita’i e le i alu ese Aumua, ae sa faaauau pea ona taoto atu i ona tafatafa ma tago atu pea i lona tino.

I se taimi mulimuli ane, na mafai ai loa e le tama’ita’i na a’afia ona una’i ese Aumua mai luga o le moega, ma tu ai loa i luga ma savali i fafo ma lona potu ma aga’i atu ai lava i fafo o le fale e saili lona aunty poo fea ua alu aga’i i ai.

A o aga’i ese atu le tama’ita’i ma le potu, na tamo’e atu Aumua ma taumafai e taofi mai lona lima, i se taumafaiga e taofi ai o ia mai lona alu ese atu ma le fale, peita’i sa mafai lava e le tama’ita’i na a’afia ona alu ese.

Na maua atu e le tama’ita’i na a’afia lona aunty o loo nofonofo mai i luma o le latou Fale Su’isu’i, ma ia fesili ai loa i le mafua’aga ua ala ai ona ia alu ese. O le taimi lea na faamatala ai loa e le tama’ita’i na a’afia i lona aunty le gaioiga sa faia e Aumua ia te ia.

A o fa’amatala e le tama’ita’i na a’afia le mea na tupu, o le taimi fo’i lea na la vaaia ai loa Aumua ua aga’i atu i le pito o loo la talanoa ai. Na fesili le aunty o le tama’ita’i na a’afia ia Aumua, pe aisea ua ia faia ai lenei mea mataga i lona niece, peita’i na tete’e Aumua ma faapea atu, e leai se mea leaga na ia faia.

Sa faapea fo’i ona fesili atu le tama’ita’i na a’afia ia Aumua e tusa ai o lana gaioiga sa faia ia te ia i totonu o le fale, ae sa fa’aauau pea ona tete’e i ai Aumua ma ia taua, e leai se mea leaga na ia faia.

I le taeao na sosoo ai, na aga’i atu ai loa le tama’ita’i na a’afia ma faila lana tagi i le Ofisa o Leoleo i Tafuna.  Na faamatala uma e le tama’ita’i na a’afia le mea atoa sa tupu i Leoleo.

Na ia taua atili fo’i i Leoleo e fa’apea, e le o se taimi muamua lea ua faia ai e le ua molia uiga mataga nei ia te ia. I le 2 vaiaso talu ai, na faia ai fo’i e le ua molia uiga mataga nei ia te ia, e ala i lona tagofia atu i vaega o lona tino i totonu o le fale.

Ina ua fesiligia e Leoleo ia Aumua e tusa ai o lenei mataupu, sa ia teena ai lona faia o ni uiga mataga i le tama’ita’i na a’afia. Peita’i a o fa’agasolo pea le talanoaga ma Leoleo, na ioeina ai loa e Aumua tuuaiga uma fa’asaga ia te ia.

E le gata sa ia ioeina i Leoleo lona alu i totonu o le potu o le tama’ita’i na a’afia i le po ao moe o ia, ae sa ia ioeina fo’i lona tagofia o ona itutinosa. Na pau le itu na tete’e i ai Aumua, o tu’uaiga faapea sa una’i ese e le tama’ita’i na a’afia o ia atoa ai ma lona ee i luga ina ua ia vaaia o ia i totonu o le potu.

Na taua e Aumua e fa’apea, e lei ee le tama’ita’i na a’afia ina ua ia tago atu i ai, ae sa malie lava i ai o ia i ana gaioiga uma sa faia.