Ads by Google Ads by Google

Molia se ali’i i lona faia o uiga mataga i lona niece e 16 tausaga


[ata: foa'i]
ausage@samoanews.com

E 46 tausaga o se ali’i ave taxi na pu’e fa’apagota e Leoleo i le vaiaso na te’a nei, ona o tu’uaiga i lona faia lea o uiga mataga i lona niece e 16 tausaga le matua. O le ali’i ua molia, e uso lona Tama ma le ali’i e ana le afafine lea na a’afia i lenei fa’alavelave, e pei ona taua i fa’amaumauga a Leoleo.

 

Talu ai puipuiga i le ono mafai lea ona silafia e le lautele o le atunu’u le tama’ita’i na a’afia, o le a le mafai ai e le Samoa News ona fa’ailoa le suafa o le ua molia i lenei mataupu.

 

O le vaiaso na te’a nei na tula’i ai le ua molia i luma o le Fa’amasinoga Fa’aitumalo mo lana ulua’i iloiloga. O le ali’i loia fautua mo tagata lautele ia Ryan Anderson na tulai mo ia, ae o le ali’i loia sili lagolago ia Jason Mitchell na tula’i mo le malo i lenei mataupu.

 

O le ua molia, o se Tama e to’alima lana fanau o loo tu’uaia i moliaga mamafa e 5 e aofia ai moliaga e 2 o le tagofia o itutinosa o se tama’ita’i e laititi i lalo o le tulafono; 2 moliaga o le faiaiga ma se tama’ita’i e laititi i lalo o le tulafono; faapea ai ma le moliaga e 1 o le faia o uiga mataga fa’asotoma. O loo tu’uaia fo’i o ia i le moliaga mama e tasi o lona faia lea o ni gaioiga e lepeti ai le saogalemu o fanau laiti.

 

E $50,000 le vaega tupe lea ua fa’atulaga e le fa’amasinoga e totogi ona fa’atoa mafai lea ona tatala le ua molia i tua, e fa’atalitali ai taualumaga o lana fa’amasinoga.

 

Afai ae mafai ona tatala o ia i tua, ua fautuaina o ia ina ia aua ne’i ona toe taumafai e faafesoota’i le teineititi o lo o a’afia i lenei mataupu i soo se auala, pe taumafai fo’i e fa’afesoota’i nisi o lona aiga. Ua fautuaina o ia ina ia aua ne’i ona toe solia se tulafono, pe taumafai fo’i e sola ese ma le atunu’u, a ia tuuina atu lona tusi folau e taofi e le loia a le malo, ma ia auai i soo se taimi e valaau ai lana mataupu.

 

TAGI A LE MALO

 

O lenei mataupu na tofu atu i le Ofisa o Leoleo i Tafuna, ina ua faila e le Tama o le teineititi na a’afia sana tagi fa’asaga i le ali’i ua molia. O le mae’a ai ona fa’agasolo o suesuega a Leoleo e uiga i lenei mataupu, na latou talosagaina ai loa se poloaiga mai le fa’amasinoga e pu’e fa’apagota ai lenei ali’i.

 

Na taua e le malo i le latou tagi e fa’apea, o le ua molia, e galue o ia o se ave taxi, ma o lana galuega i le tele o aso, o le momoliina lea o tagata lautele i nofoaga e fia malaga i ai, e aofia ai ma le teineititi na a’afia ma nai ona tei. O le tele o taeao, e valaau ai e le aiga o le teineititi na aafia le taxi a le ua molia, ona alu atu lea e piki mai le ua a’afia ma nai ona tei laiti  ma momoli i le aoga. E i ai fo’i aso e toe piki ai e le ua molia le teineititi na a’afia ma nai ona tei ma toe momoli i le fale pe a tuua le aoga, aemaise lava pe afai e leaga le tau ma timuga.

 

I le fa’aiuga o le masina o Setema na te’a nei, na tula’i mai ai se fa’alavelave i Kokoland, ina ua aga’i atu le Tama o le teineiteiti na a’afia e fa’atino sa latou galuega kamuta ma ni isi o le latou aufaigaluega, ae tau atu ai le Tama i le taxi a le ua molia o loo paka i se vaega e latalata i le nofoaga o loo latou nonofo ai.

 

E nonofo fa’atasi le aiga o le teineititi ma le aiga o le ua molia i le fanua e tasi i se vaega o Tafuna.

 

Na avea le masalosalo o le Tama o le teineititi i le fa’afuase’i lea ona paka le taxi a le ua molia i le vaega lea o le alatele e latalata i le latou fale ae le masani ai, na mafua ai loa ona ia talosaga i le ave ta’avale o le pikiapu o loo malaga ai, e taofi le ta’avale ae se’i alu e siaki le taxi poo ai o loo alu atu ai.

 

E le i iloa mai e le ua molia le aga’i atu o le Tama o le teineititi i lana ta’avale, na te lei manatu fo’i o le a aga’i atu le Tama o le teineititi i lana ta’avale i lea taimi o le aso. E latalata atu loa le Tama o le teineititi i le vaega o loo paka ai le taxi, ae ona vaaia loa le matala o le faitotoa i le itu o le pasese, ma ia vaaia ai lona afafine ua oso mai i fafo ma le ta’avale.

 

Na sola ese le ta’avale a le ua molia i le taimi lea ina ua ia faalogo i le leo o le Tama o le teineititi. Ae ina ua fesiligia e le Tama lona afafine, sa ia fa’amatala uma i ai tulaga e pei ona tula’i mai, ma mafua ai loa ona tofu atu lenei mataupu i Leoleo.

 

Na taua e le teineititi i Leoleo e fa’apea, o le masina o Novema o le tausaga na te’a nei na fai atu ai le ua molia ia te ia, mo se avanoa e alu atu ai e piki o ia pe a tuua le aoga, ona o loo fia talanoa ia te ia. O iina na amata mai ai le la masaniga faaleuo, seia oo lava ina le fa’atinoina tulaga faaleulugali’i.

 

Na taua e le teineititi i Leoleo le tu’u atu e le ua molia o tupe ia te ia e fa’atau ai mea e mana’o ai.

 

Na teena e le ua molia tu’uaiga fa’asaga ia te ia ina ua fesiligia o ia e Leoleo i le taimi muamua, ae ina ua fa’aauau pea le fa’atalatalanoaga, na ia ioeina ai loa lona tuuina atu o tupe i le teineititi e fa’atau ai mea e mana’o ai e pei o lavalava, ma seevae, ona e lima vaivai lona aiga. Na taua fo’i e le ua molia lona fa’atau o se telefoni ma tuu i le teineititi, ina ia fa’a faigofie ai ona la fesoota’i.

 

Na ioe le ua molia i le la mafutaga faaleuo ma le teineititi, peita’i sa ia teena lona faia i ai o uiga mataga faafeusuaiga. E le i mana’o le ua molia e tuuina atu sana fa’amatalaga tusitusia i Leoleo, ona sa manatu o ia, ua lava lana faamatalaga tuu gutu e fa’ailoa atu ai i Leoleo le mea atoa sa tupu.