Ads by Google Ads by Google

Molia se ali’i i lona faia o uiga mataga i lona niece e 15 tausaga

ausage@samoanews.com

O le 2 vaiaso talu ai na pu’e faapagota ai e Leoleo se ali’i e 46 tausaga le matua mai le afioaga o Pago Pago, ona o tu’uaiga i lona faia lea o uiga mataga i lona niece e 15 tausaga le matua.

 

E pei ona taua e le malo i le latou tagi e fa’apea, na amata ona faia mai e le ua molia uiga matga nei i lona niece i le taimi ao 14 ona tausaga, tusa lea o le tausaga na te’a nei, lea lava ua oo mai i le tausaga lenei ua atoa i ai le 15 tausaga le matua o le tama’ita’i na a’afia, ae o lo o fa’aauau pea ona faia e le ua molia nei uiga mataga ia te ia.

 

O le vaiaso la na te’a nei na tula’i ai loa i luma o le Fa’amasinoga Fa’aitumalo le ali’i ua molia, ma ia teena ai le tagi a le malo fa’asaga ia te ia.

 

Talu ai le puipuia o le o loo aafia i lenei mataupu mai le faigofie lea ona silafia o ia e tagata lautele, o le a le mafai ai e le Samoa News ona fa’alauiloa le igoa o le ali’i o loo molia i lenei mataupu.

 

O loo tu’uaia e le malo le ua molia i moliaga mamafa e aofia ai le moliaga e tasi o le faiaiga fa’amalosi ma se tama’ita’i e laititi i lalo o le tulafono; 2 moliaga o le faia o amioga mataga faasotoma, o le vaega B lea o solitulafono mamafa, lea e mafia ona fa’asala ai se tasi i le toese mai le 5 e oo atu i le 15 tausaga, pe faasala fo’i i le salatupe e mafai ona oo atu i le $5,000; faapea ai ma moliaga mamafa o le tagofia lea o itutinosa o se tama’ita’i e le faaipoipo i ai, o le vaega D lea o solitulafono mamafa, lea e mafai ona fa’asala ai se tasi mo le umi e le silia i le 5 tausaga, pe fa’asala i le salatupe e le silia i le $5,000, poo le fa’asala fo’i i fa’asalaga uma ia e lua.

 

E ese mai i moliaga mamafa, e 2 moliaga mama o le faia o amioga mataga e ono lepeti ai le manuia ma le saogalemu o fanau laiti, o le vaega A lea o solitulafono mama, lea e mafai ona fa’asala ai se tasi i le toese mo le umi e le silia i le tausaga, pe fa’asala fo’i i le salatupe e le silia i le $1,000, poo le fa’asala fo’i i fa’asalaga uma ia e lua.

 

E $25,000 le tupe lea ua fa’atulaga e le Fa’amasinoga e totogi ona fa’atoa mafai lea ona tatala le ua molia i tua mai le toese i Tafuna.

 

Afai ae mafai ona tatala o ia i tua, ua fautuaina o ia ina ia saili se isi nofoaga e nofo ai, e le mafai fo’i ona ia toe taumafai e fa’afesoota’i le teineititi na a’afia poo nisi o lona aiga i soo se auala.

 

Na teena e le Fa’amasinoga le talosaga na faaulu e le loia a le ua molia, le susuga a Bob Stuart, mo se avanoa e fa’aitiitia ai le tupe e tatala ai le ua molia i le $5,000. Na taua e Stuart e fa’apea, e ui i le matuia o tusitusiga o loo taua i le tagi a le malo, peita’i e ao ona silafia e le Fa’amasinoga, o le tagi ua faasaga i le ua molia, ua na o ni tu’uaiga lava e le o mafai ona fa’amaonia.

 

Sa taua e Stuart e fa’apea, o le ua molia, o se ali’i sa usita’i i tuutuuga o lana nofovaavaaia ua mae’a ona tuliina i luma o le Fa’amasinoga, sa ia auai fo’i i aoaoga fa’a faufautua uma sa tuuina atu e le Fa’amasinoga ia te ia.

 

Na tetee malosi le loia a le malo ia Jason Mitchell i le talosaga a Stuart. Na taua e Mitchell e fa’apea, e ui e le o faamaonia le tagi fa’asaga i le ali’i ua molia, peita’i o tu’uaiga fa’asaga ia te ia e matua matuia lava, e le tatau fo’i ona manatu mama le Fa’amasinoga i lenei alii.

 

I le mae’a ai ona fa’afofoga o le Fa’amasinoga i faafinauga a itu e lua, na faia ai loa le faaiuga e teena le talosaga e faaitiitia ai le tupe e tatala ai le ua molia.

 

O le vaiaso nei lea ua fa’atulaga e faia ai le ulua’i iloiloga o lenei mataupu i luma o le Fa’amasinoga Fa’aitumalo, e iloilo ai mau a le malo pe lava ma totoe e lagolago ai le latou tagi ua faaulu faasaga i le ua molia

 

TAGI A LE MALO

 

O lenei mataupu e pei ona taua e le malo i le latou tagi, na tofu atu i le Ofisa o Leoleo i Fagatogo, ina ua talosagaina e le grandmother o le tama’ita’i na a’afia se fesoasoani e uiga i lenei mataupu.

 

E pei ona taua e le malo, o le ua molia, o lona aunty le grandmother lea na logoina le Ofisa o Leoleo, ae o lona tausoga le Tina o le tama’ita’i o loo aafia i lenei mataupu. O ona lava tino i latou o loo aafia i lenei mataupu.

 

Na taua e le grandmother i Leoleo e fa’apea, e le o se taimi muamua lenei ua tula’i mai ai lenei faalavelave i lo latou aiga, o le faia lea e lona nephew (le ua molia) o uiga mataga i lona grandaughter, ae mafua ona musu e logo ia le Ofisa o Leoleo, o lona musu e aliali nei mea mataga ma ta’uvalea atu ai le aiga.

 

Na taua e le grandmother e fa’apea, e fa’a 2 ona maua e le tuagane laititi o le tama’ita’i na a’afia le ua molia o loo ia faia uiga mataga i lona tuafafine i tua o le umukuka faapea ai ma totonu o le potu.

 

O le ulua’i fa’alavelave lava e pei ona taua e le grandmother i Leoleo na tula’i mai i le masina o Tesema o le tausaga na te’a nei, i le taimi a o vasega 8 le tama’ita’i na a’afia, lea na maua atu ai e se tasi o tama’ita’i o le aiga le ua molia o loo tu i tafatafa o le moega o loo moe ai le tama’ita’i na a’afia ma ia faia ni uiga faasotoma e ala i le pule o le ua molia i lona lava tino.

 

Na maua le avanoa e fesiligia ai e Leoleo le tama’ita’i na a’afia e uiga i lenei mataupu, ma ia faamatalaina ai i Leoleo mea uma lava e pei ona taua e lona grandmother.

 

Na taua e le tama’ita’i na a’afia i Leoleo e fa’apea, i se tasi o vaveao ao alu atu i le umukuka e aumai sana mea’ai, na faateia o ia ina ua alu atu o loo nofo mai ai le ua molia (lona uncle). Sa ia faamalo atu i ai ma lona manatu e leai se mea e tupu, ae na fa’ateia o ia ina ua savali mai le ua molia ma poloka le faitoto’a, ae tago ua una’i o ia i luga o le nofoa ae faatino ai uiga mataga ia te ia.

 

A o faia e le ua molia uiga mataga ia te ia, na faateia o ia ina ua ia vaaia lona tuagane laititi o loo savali atu, ma ia maua lelei atu lava uiga mataga o loo faia ia te ia.

 

Ina ua mae’a ona faia e le ua molia uiga mataga nei ia te ia, sa ia tula’i ma savali ese, e pei lava e leai se mea sa tupu.

 

O le isi po i le masina o Tesema o le tausaga na te’a nei e pei ona taua e le tama’ita’i na a’afia i Leoleo, sa ia faia ai fo’i e le ua molia uiga mataga ia te ia, e ala i lona ulufale atu i totonu o lona potu ma faamalosi o ia la te momoe ma fai’aiga. Sa ia taumafai malosi e una’i ese peita’i sa matua malosi lava taumafaiga a le ua molia e ato ese ona lima, ae faamalosi o ia i luga o lona moega.

 

Na maua le avanoa e fesiligia ai e Leoleo le tuagane a le tama’ita’i na a’afia, ma ia faamaonia ai i Leoleo lona mauaina o le ua molia o loo ia faia uiga mataga i lona tuafafine, e ala i lona faasaofa’i o lona tuafafine i luga o le nofoa ae fai i ai uiga mataga.

 

Ina ua fesiligia e Leoleo le ua molia e uiga i lenei mataupu, sa ia ta’utino ai i Leoleo e tusa ai o le mea sa tupu ma ia fa’apea atu, “Faamalie atu ia oulua susuga malu o le malo, e leai se mea e koe mafai ova tai ua kupu le mea, ae ou ke ka’u sa’o aku, o le kama’ika’i ga a’afia lava le mafua’aga o mea uma, o ia ga malie ma ke faia kulaga faafeusuaiga. Sa ou fai i ai e loka ai a’u ae le mafai lava le keige.”

 

Na taua atili e sui o le aiga o le tama’ita’i na a’afia i Leoleo e fa’apea, e mafua ona alu atu le ua molia fale o le tama’ita’i na aafia, e alu atu e fesoasoani i le faiga o feau, peita’i, na fa’aaoga e le ua molia lea avanoa na te faia ai uiga mataga nei i lenei tama’ita’i.