E 31 tausaga o se ali’i ua molia e le malo i le fa’alavelave lea na ‘ona ai se tamaititi e 1 le tausaga le matua i le pauta oona o le aisa.

E tusa ai ma ripoti mai le malo, o se tamaititi e tasi le tausaga le matua, lea o lo o fa’apea mai le ripoti, o le atali’i lea o le susuga a Lewis Lokeni, na taofia i le falema’i i Fagaalu i le masina na te’a nei, ina ua ‘ona o ia i le pauta oona o le aisa.

O le mae’a ai ona fa’amaonia i ripoti a le foma’i sa togafitiina lea tamaititi i suesuega le fa’alavelave sa tula’i mai, na tuuina atu ai loa le ripoti i Leoleo mo a latou suesuega. O le mae’a ai o suesuega a Leoleo, na sainia ai loa e le Fa’amasinoga i le aso 1 Iuni o le tausaga nei se poloaiga e ala i se tusi saisai, ina ia pu’e fa’apagota mai ai Lokeni e tali i le moliaga mama o le faia o ni gaioiga e o no lepeti ai le saogalemu o fanau laiti.

O le aso Lua o le vaiaso nei na pu’e fa’apagota ai loa e Leoleo ia Lokeni e ala i le tusi saisai mai le Fa’amasinoga, ma tula’i ai loa o ia i luma o le Fa’amasinoga Fa’aitumalo i le taeao o le aso Lulu na sosoo ai.

E pei ona taua i fa’amaumauga a le fa’amasinoga, e 2 tagi eseese ua faila e le malo fa’asaga ia Lokeni. O le tagi muamua, o lo o molia ai Lokeni i le moliaga mama, ma ua fa’atulaga ai fo’i e le afioga i le tama’ita’i fa’amasino ia Gwen Tauiliili-Langkilde le tinoitupe e $1,000 e tatala ai le ua molia i tua.

O le tagi lona lua, o loo molia ai Lokeni i moliaga mamafa e 2 o le umia faasolitulafono o le mariuana, atoa ai ma le umia faasolitulafono o le aisa. E $5,000 le tupe lea ua faatulaga e le fa’amasinoga e totogi ona fa’atoa mafai ai fo’i lea ona tatala o ia i tua.

O le itula e 10:30 i le taeao nei lea ua fa’atulaga e toe tula’i ai Lokeni i luma o le fa’amasinoga fa’aitumalo, mo le fa’atulagaina o le aso e faia ai lana ulua’i iloiloga.

E pei ona taua e le malo i le latou tagi e fa’apea, pe tusa o le itula e 11:55 i le taeao o le aso Lua o le vaiaso nei, a o taumafai pea Leoleo e tau saili le ua molia, na fa’afuase’i ai ona vaaia o ia o loo nofonofo i luma o se faleoloa i Fagaima, ma latou pu’e fa’apagota ai loa o ia.

Ina ua mae’a ona loka lima o Lokeni, sa faia muamua i ai e Leoleo se suega i lona tino ina ia mautinoa ai, na te le o tauaveina ni a’upega e ono a’afia ai se soifua o Leoleo. I le taimi o lea suega, sa maua ai e Leoleo se sikaleti mariuana ua uma ona taai i le taga o lona ofu, faapea ai ma se paipa tioata e ula ai le pauta o le aisa.

I totonu o le paipa tioata, sa maua i ai e Leoleo vaega o le aisa o loo totoe ai. Sa faia se suega i le sikaleti ma le pauta sa i totonu o le paipa tioata ma faamaonia ai, o le mariuana ma le aisa mea ia na maua i le tino o le ua molia.

Na musu Lokeni e fai sana fa’amatalaga i Leoleo ina ua fesiligia o ia. Pau lana tala sa tuuina atu i Leoleo, “O le a le aoga e koe fai ai se kala, ua maua a’u.”

Na finau le loia a Lokeni ia Ryan Anderson i le fa’amasinoga mo se avanoa e fa’aitiitia ai le tupe e tatala ai o ia i tua i le $2,000, peita’i na teena e le afioga a Tauiliili-Langkilde, ona e talitonu le tama’ita’i fa’amasino, o le vaega tupe lea ua fa’atulaga e tatala ai le ua molia i tua, ua talafeagai lelei ma le matuia o solitulafono o lo o tu’uaia ai o ia.

E le o se taimi muamua lenei ua tula’i ai Lokeni i luma o le fa’amasinoga. I le tausaga e 2013, na fa’asala ai e le Fa’amasinoga Maualuga ia Lokeni ma isi ali’i e to’atolu e taofia i le falepuipui mo le umi e ta’i 28 masina, e mafua mai ina ua ta’usala i latou e le fa’amasinoga i le moliaga o le faia o uiga mataga faafeusuaiga fa’asaga i se tama’ita’i e 13 tausaga le matua.