Ua molia nei e le malo se ali’i Leoleo fa’atoa 15 masina talu ona avea ma Leoleo, i lona fa’atagaina lea o se ali’i pagota e sola i tua mai le falepuipui na taofia ai o ia.

O le amataga o le vaiaso na te'a nei tula’i ai i luma o le fa’amasinoga fa’aitumalo le ali’i o Tuluiga Richard Salanoa mo le ulua’i taimi. O lo o tu’uaia o ia i moliaga mamafa e lua o le fesoasoani e fa’asola se pagota, atoa ai ma lona taumafai e faia ni gaioiga e ufiufi ai se solitulafono.

E $10,000 lea ua fa’atulaga e le fa’amasinoga e tatala ai i tua Salanoa, e fa’atali ai le isi ana iloiloga lea ua fa’atulaga mo le vaiaso nei.

O le tagi fa’asaga ia Salanoa na mafua mai i le fa’alavelave lea na maua ai e Leoleo, e le o i ai le ali’i pagota o Manu Lefatia i totonu o le sela na loka ai o ia. O le ali’i pagota ia Lefatia, fa’atasi ai ma isi ali’i pagota e to’alua ia Siatiu Mua’iga poo Povi fo’i e pei ona iloa ai o ia e le to’atele ma Ioane Faimata, o lo o taofia i latou i le Falepuipui o lo o i le Ofisa autu o Leoleo i Fagatogo.

O fa’amatalaga a Faimata ma Povi na tu’uina atu i Leoleo, fa’atasi ai ma le ta’utinoga a le ali’i o Salanoa, na mafua ai loa ona faila e le malo le tagi fa’asaga i le ali’i Leoleo ua molia nei. I le tagi a le malo o lo o taua ai e fa’apea, i le po na tula’i mai ai le fa’alavelave, sa tiute ai Salanoa i le sifi po i le Ofisa autu o Leoleo i Fagatogo, ma tofia ai o ia na te vaavaaia ali’i pagota e to’atolu.

Sa galue Salanoa i le sifi na taitaia e lona Tina ia Lt. Arieta Salanoa i le aso 3 o Mati 2019. O le sifi lea e amata mai i le 6:00 i le taeao seia oo atu i le 2:00 i le aoauli, peita’i na toe fa’aauau atu ai lava ona galue Salanoa mai le sifi o le aoauli mai le itula e 2:00 seia oo atu i le itula e 10:00 i le po.

I le taeao o le aso na alia’e mai ai le fa’alavelave, na aga’i atu ai Salanoa ma tuu atu le ki o le falepuipui le tumau lea o lo o taofia ai ali’i pagota e to’atolu fa’atasi ai ma lana folafolaga, o lo o atoa uma pagota e to’atolu i totonu o le falepuipui.

Na taua e le malo i le latou tagi e fa’apea, sa tatau ona sui atu le isi sifi e tiute i le po lea, peita’i na finau Salanoa e fa’aauau pea ona galue i le isi sifi o loo sosoo ai, e ui sa fautua atu i ai se tasi o Leoleo ua tatau ona alu i le fale e malolo.

Na taua e le malo e fa’apea, ina ua toe amata le isi sifi, sa aga’i atu loa Salanoa ma isi Leoleo e to’alua i tua i le nofoaga o loo i ai le falepuipui. Ina ua latalata atu i le falepuipui, sa toe liliu mai Salanoa ma toe fo’i i le Ofisa autu, ae fa’aauau ai pea le aga’i atu o isi Leoleo e to’alua. Na siaki e Leoleo e to’alua tua i le falepuipui ma iloa ai, e na o Faimata ma Povi o loo momoe ae le o i ai Lefatia.

Na vave ona logoina Ta’ita’i o le Ofisa o Leoleo sa tiute i le po lea e tusa ai o le fa’alavelave. A o tutu Leoleo e to’alua i le faitoto’a e ulufale atu ai i totonu o le falepuipui, na fa’afuase’i ona la faalogoina se pao mai le isi pito o le falepuipui. E lei umi ae iloa atu e Leoleo ia Lefatia o loo tolotolo mai i le isi tulimanu o le pa, o lo o aga’i mai i le falepuipui

Ina ua fesiligia e Leoleo ia Lefatia poo fea sa i ai, na fa’asino le lima o Lefatia i luga o le mauga ma fa’apea, “Sa ou eva i luga o le mauga”. Na saili e Leoleo le tino o Lefatia ma maua i ai se telefoni o loo nana i le pito i lalo o lona ofuvae sa fai.

Na fesiligia e Capt. Pou Supapo ia Salanoa pe na fa’apefea ona sola ese Lefatia i lalo o lana vaavaaiga, na tali Salanoa, na ia iloaina le taimi na alu ese ai Lefatia, sa ia fa’atagaina fo’i o ia e alu e asi lana uo ona toe sau ai loa, ona ua ia alofa i lona talosaga atu ia te ia.

Na faamatala e Salanoa i Leoleo e faapea, pe tusa o le 9:00 i le po o le aso e pei ona taua, na talosaga atu ai Lefatia ia te ia pe mafai ona alu e asi lana uo teine i Fagatogo. Na taua e Salanoa e fa’apea, i lona loto alofa i le ali’i pagota, sa ia fa’atagaina ai o ia e alu ma le tu’utu’uga ia toe fo’i ane a o le i taina le itula e 10:00 i le po lava lea.

Na fiu Salanoa e fa’atali Lefatia i le taimi na fuafua e toe fo’i ane ai ua tuai ane. Sa ia viliina le telefoni a Lefatia peita’i e le i tali ane lava o ia, ona oso ai loa lea o le manatu o Salanoa, ua seu atoa e Lefatia le polokalame sa la fuafuaina.

Na taua atili e Salanoa i Leoleo e fa’apea, na mafua ona ia fa’ataga Lefatia e alu e vaai lana uo teine toe fo’i atu ai, ona ua ia le lava i le tele o le mau mea o lo o tutupu. Sa ia iloaina lelei lava e le sa’o le faaiuga ua ia faia ia Lefatia, ae sa ia faia lava ma lona manatu, e le o ia o se tagata na te fa’amasinoina fua isi tagata.

Sa ia taua fo’i lona le fiafia i le tele o taimi e fa’alumaina ai o ia e Capt. Supapo i luma o isi leoleo. Na teena e Salanoa lona taliaina o se $100 mai ia Lefatia. Na taua e Salanoa e fa’apea, sa ofa atu e Lefatia le $60 ia te ia peita’i sa ia teena lea tulaga. Sa ia taua atili fo’i tulaga fa’aletonu i le itu tau tupe a lona aiga, talu ona fo’i mai i le Army Reserve i le masina o Iuni 2018, atoa ai ma le tulaga i le le faigaluega lea o si ona to’alua.

Ina ua fesiligia pe aisea na ia fa’atagaina ai Lefatia na te umia se telefoni, na tali Salanoa, sa i ai lona manatu e le o i ai se tulaga matuia tele pe afai e i ai se telefoni ia Lefatia. Sa ia taua atili e fa’apea, e mafua ona i ai le telefoni ia Lefatia, ona e fa’aaoga e matamata ai ana ta’aloga ma ana ata tifaga.

Na fa’amatala e Salanoa i Leoleo e fa’apea, i le la talanoaga ma Lefatia, sa fa’apea atu ai le ali’i pagota ia te ia, “afai e te fesoasoani mai ia te a’u, ou te fesoasoani atu fo’i ia te oe”.

Na fesili Leoleo ia Salanoa poo le a le uiga o lea fa’amatalaga a Lefatia, ae na tali le molia, sa ia taumafai e fa’aaoga le la sootaga ma Lefatia e fesoasoani mai ai ia te ia ma le Ofisa o Leoleo i le tau sailiina o le isi ali’i pagota o loo tau sailia nei e Leoleo, le susuga lea ia Tautua Letasi, poo Fiti Kovana e pei ona iloa ai e le to’atele.

Ina ua fesiligia e Leoleo le tama’ita’i sa vaaia o mafuta ma Lefatia i nai masina ua mavae atu, sa taua ai e le tama’ita’i lea le alu atu o Lefatia i se ta’avale Rental ma piki o ia i ni isi o po, i le masina o Ianuari ma Fepuari. Na faailoa uma e le tama’ita’i lea i Leoleo a laua fetusiaiga ma Lefatia i luga o le telefoni, mo le fa’ailoaina atu o nofoaga eseese e piki ai o ia i po sa la mafuta ai.