E 18 tausaga le matua o se ali’i sa fai ma sui o Amerika Samoa i ta’aloga fusu i nisi o Taamilosaga Faavaomalo ua taofia nei i le toese i Tafuna, ona o tu’uaiga i lona faaoolima lea i se tama’ita’i aoga e 17 tausaga le matua, faapea ai ma lona taumafai e ave faamalosi lea tama’ita’i i totonu o se ta’avale.

O le vaiaso na te’a nei na pu’e fa’apagota ai e Leoleo le ali’i o Jeffrey Tago, i lalo o se poloaiga mai le Fa’amasinoga, ma tula’i ai loa o ia i luma o le Fa’amasinoga Faaitumalo mo lana ulua’i iloiloga.

O lo o taofia pea i le toese i Tafuna se’i vagana ua totogi le $50,000 ona fa’atoa mafai lea ona tatala o ia i tua.

Afai ae tatala Tago i tua, ua fautuaina o ia e le afioga i le ali’i Fa’amasino ia Elvis P. Patea  e aua ne’i ona taumafai e faafesoota’i molimau a le malo, e aofia ai ma le tama’ita’i na a’afia i lenei mataupu.

O le vaiaso nei lea ua faatulaga e faia ai le ulua’i iloiloga a Tago i luma o le fa’amasinoga,

E pei ona taua i le tagi a le malo e fa’apea, o le taeao o le aso 29 o Oketopa na te’a nei, na logoina ai e se Faiaoga mai le Aoga Maualuga a Tafuna le Ofisa o Leoleo i Tafuna mo se fesoasoani, i le maua ai lea o ni ripoti mai isi tamaiti aoga, e faatatau i se tama’ita’i aoga e 17 tausaga le matua na faaoolima i ai  Tago.

E taunu’u atu Leoleo i le ofisa a le aoga i Tafuna, ae o le taimi lea ua o ese mai ai le tama’ita’i na a’afia ma se tasi o ona tausoga e faila le tagi i le Ofisa o Leoleo.

Na taua e le Faiaoga na ripotia le mataupu i Leoleo e fa’apea, e tusa ai ma ripoti a tamaiti aoga sa i ai i le taimi o le fa’alavelave, na faafuase’i ona latou vaaia le aga’i atu o Tago i totonu o le lotoa ma tau saili le tama’ita’i na a’afia. E le i umi ae latou vaaia le savali atu o Tago ma uu mai le lima o le tama’ita’i na a’afia, ma taumafai e toso faatata o ia i totonu o se ta’avale.

Ae na avea le fesoasoani mai a isi tamaiti aoga e ala i lo latou tauai o le ta’avale i ma’a ma itu na mafai ai ona toe sao mai i fafo o le ta’avale le tama’ita’i na a’afia, ma le mafai ai e Tago ona ave fa’amalosi o ia. Na taua fo’i e le Faiaoga i Leoleo le fa’aoolima o Tago i le tama’ita’i na a’afia, atoa ai ma lona sasae ese o ona lavalava.

E tusa ai o le fa’amatalaga a le tama’ita’i na a’afia na tuuina atu i Leoleo, sa ia taua ai le faateia o ia ina ua tula’i mai le fa’alavelave e pei ona a’afia ai o ia ma le ali’i o Tago.

Na taua e le tama’ita’i na a’afia e fa’apea, e le i umi lava ona momoli atu i laua ma lona uso laititi e lo la Tina i le aoga, ae alu atu loa lona uso laititi ma fai atu ia te ia, ua leva ona tau saili o ia e Tago i le taeao o le aso lea. Sa le i manatu mamafa le tama’ita’i na a’afia i le tala a lona uso laititi sa fai atu, peita’i, na fa’atoa amanaia e lona mafaufau ina ua ia vaaia le savali atu o Tago ma talanoa atu ia te ia i se leo malosi ma leotele.

A o la talanoa ma Tago, na faafuase’i ona tago atu Tago ua uu lona lima ma taumafai e toso faamalosi o ia i totonu o se taavale o lo o aveina e lana uo e igoa ia Jameson.

Na taumafai malosi le tama’ita’i na a’afia e tete’e atu Tago ma lana gaioiga o lo o faia, peita’i sa fai lava si malosi o Tago ma mafai ai ona sii le tama’ita’i ma amo i totonu o le ta’avale. Sa taumafai malosi pea le tama’ita’i na a’afia e tete’e atu ia Tago peita’i sa vaaia le malosi tele o lenei ali’i.

Ina ua taunuu i totonu o le ta’avale, sa amata loa ona fasi e Tago le tama’ita’i na a’afia e ala i lona titina o lona ua ma lulu solo o ia i le itu taumatau ma le itu agavale. Na tafiti le tama’ita’i na a’afia ma taumafai e tu i luga peita’i na oomi e Tago i lalo ma toso i lalo ina ia le mafai ai ona tu i luga pe sola ese fo’i ma le ta’avale.

Sa taumafai tamaiti aoga o loo laulaututu i fafo e tatala le faitotoa peita’i sa le mafai, ona sa loka atu i totonu o le faitoto’a o le ta’avale.

Na taua e le tama’ita’i na a’afia i Leoleo lona faalogoina o Tago o valaau atu i le ave ta’avale, e alu ese le ta’avale ona o lea ua amata ona tauai mai e tamaiti aoga. O le taimi lava fo’i lea na mafai ai ona mamulu ese le tama’ita’i na a’afia mai lima o Tago, ma alu ese mai ai loa mai totonu o le ta’avale ma aga’i atu i le Ofisa ma faailoa i ai le mataupu.

Na maua le avanoa e fesiligia ai e Leoleo le uso laititi o le tama’ita’i na a’afia e tusa ai o lenei fa’alavelave.

Na taua e le uso laititi o le tama’ita’i na a’afia e fa’apea, na faateia o ia ina ua ia vaaia le savali atu o Tago ma toso faamalosi ese mai lona uso mai totonu o le lotoa a le aoga, ma taumafai e toso i totonu o le ta’avale na ave atu e Jameson (uo a Tago).

Na taua e le molimau lona le manatu mamafa i gaioiga a Tago o loo faia, ona sa ata lava ma fai ana gaioiga e foliga mai o loo fia malie, peita’i na faateia o ia ina ua toso faamalosi e Tago lona uso matua ma taumafai e toso aga’i i totonu o le ta’avale.

O le taimi lea na la fetagofi atu ai loa ma lana uo i ma’a ma tauai ai le ta’avale. Sa la vaaia le minoi laititi o le ta’avale, e foliga mai o le a alu ese, ae na avea le la tauaiina o le ta’avale i ma’a ma itu na tu ai loa le ta’avale, ae oso mai i fafo le ave ta’avale ia Jameson ma taumafai e tuli ese i laua.

O le taimi lea na ia tamo’e atu ai loa ma tatala le faitoto’a o le ta’avale, ma maua ai loa le avanoa o lona uso e sao mai ai i fafo ma sola ese loa mai lima o Tago.

Ina ua matala le faitoto’a, na taua e le molimau i Leoleo lona vaaia o Tago o loo ia taofi lona uso i lalo e ala i lona titina o lona ua, ae o fa’aauau pea ona ia faaoolima ia te ia.

E tusa ai o le fa’amatalaga a le molimau i Leoleo, e le o se taimi muamua lenei ua tula’i mai ai se faalavelave faapea i le va o lona uso ma Tago, ae o le fa’alavelave lea na tula’i mai, o le fa’alavelave pito sili lea ona matuia atu nai lo isi uma fa’alavelave na tutupu muamua.

Na taua e le molimau e fa’apea, e i ai taimi na te vaaia ai una’oa i le tino o lona uso, ona ia fesili lea i ai poo ai na una’oa ai lona tino, ae tali mai o ia, o Tago.

O manu’a na maua i le tino o le tama’ita’i na a’afia e aofia ai una’oa i lona tino, lima ma lona papatua, sa faapea fo’i ona i ai ni maosia i lona ua ma lona fatafata.