Ads by Google Ads by Google

Molia se ali’i ave taxi i le faia o uiga mataga i se tama’ita’i talavou


[ata: foa'i]
ausage@samoanews.com

E 35 tausaga o se ali’i ave taxi mai le itu i sisifo o le atunu’u ua molia nei e le malo, ona o tu’uaiga o le faia o uiga le tau pulea fa’asaga i se tama’ita’i e 13 tausaga le matua.

 

Na tula’i Vavatau Voleti i luma o le fa’amasinoga fa’aitumalo i le vaiaso nei. O lo o molia o ia i moliaga mamafa e lua o lona tagofia lea o itutinosa o se tama’ita’i e talavou i lalo o le tulafono, o le vaega D lea o solitulafono mamafa, lea e mafai ona fa’asala ai o ia i le toese mo le umi e le silia i le 5 tausaga, pe faasala i le salatupe e le silia i le $5,000, poo faasalaga uma fo’i e lua.

 

O loo molia fo’i o ia i le moliaga mama e tasi, o lona faia lea o gaioiga e lamatia ai le saogalemu o fanau laiti, o le vaega A lea o solitulafono mama, lea e mafai ona fa’asala ai o ia i le toese mo le umi e le silia i le tausaga, poo le salatupe e le silia i le $1,000, poo fa’asalaga uma fo’i ia e lua.

 

E $5,000 lea ua fa’atulaga e le fa’amasinoga e totogi ona fa’atoa mafai lea ona tatala le ua molia i tua.

 

O le tama’ita’i loia fautua ia Anna Wells lea o lo o tula’i mo le ua molia, ae o le ali’i loia sili lagolago ia Jason Mitchell o loo tula’i mo le malo.

 

TAGI A LE MALO

 

O le tagi fa’asaga ia Voleti na tofu atu i le Ofisa o Leoleo, ina ua logo e le aunty o le tamaitai na fa’afia ia Leoleo mo se fesoasoani, ma maua ai loa le avanoa e feiloa’i atu ai Leoleo i le aunty, faapea ai le tama’ita’i na a’afia ma lona Tina.

 

E tusa ai o molimau na maua e le malo, o le ali’i ua molia ia Voleti, o le uo mamae lea a le Tama o le tama’ita’i na a’afia.

 

Na taua e le aunty i Leoleo e fa’apea, o se Tina o le ekalesia sa ia fa’amatala atu ia te ia se vaaiga sa ia molimauina i le afiafi po lava o le aso 14 o Novema, i le taimi sa paka ai le ta’avale a Voleti i autafa o se faleoloa i totonu lava o le nu’u.

 

Na taua e le Tina lea i le aunty o le tama’ita’i na a’afia, ao ia vaavaai atu i le ta’avale a Voleti o loo paka mai i autafa o le faleoloa, na fa’afuase’i ona ia vaaia le matala o le faitoto’a, ma ia vaaia ai loa le tama’ita’i na a’afia ua oso mai i fafo o le taxi.

 

O le aso Sa na sosoo ai, Novema 18, na faamatala ai loa e le Tina lea o le aulotu le vaaiga sa ia iloa i le aunty o le tama’ita’i na a’afia. A o lei logoina e le aunty Leoleo, sa muamua ona ia fesoota’i i le Tina o le tama’ita’i na a’afia o loo i fafo ma le atunu’u i le taimi lea. Ina ua mae’a ona la talanoa ma le Tina o le tama’ita’i na a’afia i le telefoni, na aga’i atu ai loa le aunty ma fesiligia le tama’ita’i na a’afia i le mafua’aga na alu ai i totonu o le ta’avale a Voleti.

 

Na faailoa e le tama’ita’i na a’afia i Leoleo e fa’apea, e fetaui lava lona fo’i mai i le faleoloa i le afiafi e pei ona taua, ae sosolo atu loa ma le ta’avale a Voleti i ona autafa, ma fai atu ia te ia e oso atu i totonu o le ta’avale.

 

Na musu le tama’ita’i i le taimi muamua, mulimuli ane na malie o ia ma oso loa i totonu o le ta’avale. E lei leva ona i ai i totonu o le ta’avale ae tu’u atu loa e Voleti ia te ia le $20 ma lana talosaga, pe mafai ona la eva laititi mo sina taimi.

 

O le taimi lea e pei ona taua e le teineititi i Leoleo, na fa’afuase’i ai loa ona tago atu Voleti ia te ia, ma taumafai e mili ona ogavae, ma i’u lava i lona taumafai e tago i lona itutinosa, ae sa ia tete’e ma fai i ai e soia. Na taua atili fo’i e le tama’ita’i i Leoleo lona faalogoina o le manogi pia i totonu o le ta’avale, atoa ai ma lona vaaia o apa pia ua uma ona inu o loo ta’atitia i le nofoa pito i tua o le ta’avale.

 

Ina ua fesiligia e Leoleo ia Voleti e uiga i lenei mataupu, sa ia ioeina ai lona pikina mai o le tama’ita’i na a’afia i lana ta’avale, ae sa ia teena lona faia i ai o ni uiga mataga le taupulea.