Ads by Google Ads by Google

Molia se ali’i ave ta’avale i lona umia fualaau fa’asaina o le aisa

Blue police car graphic.
[ata: foa'i]
ausage@samoanews.com

Ua molia nei e le malo le ave ta’avale o le pikiapu apu lea na maua i ai e Leoleo vaega o le pauta fa’asaina o le aisa, i moliaga mamafa e 2 o le umia fa’asolitulafono o vaega o le pauta fa’asaina o le aisa, atoa ai ma le moliaga o le umia fa’asolitulafono o le pauta o le aisa ma le fa’amoemoe e tulei pe fa’atau atu i isi tagata.

 

O moliaga fa’asaga i le susuga a Suilefaiga Toala, na alia’e mai ina ua taofi e se ali’i Leoleo lana ta’avale i luga o le alatele i Iliili i le po o le aso Lulu o le vaiaso na te’a nei, ina ua molimauina e sese le laisene o loo faapipi’i i le pito i tua o lana ta’avale.

 

E to’atolu ali’i sa i totonu o le ta’avale a Toala ina ua taofi e le ali’i Leoleo. O isi ali’i e to’alua e aofia ai Foketi Misi Siua ma Pio Atonio. Ina ua mae’a ona fesiligia e Leoleo i latou nei e to’atolu, na toe tatala ai loa i tua Siua ma Atonio ae vagana ai Toala na taofia ma molia i lona umia fa’asolitulafono o fualaau fa’asaina.

 

I le vaiaso na te’a nei na tula’i ai Toala i luma o le Fa’amasinoga Fa’aitumalo, ma ua fa’amoemoe o le itula e 10:30 i le taeao nei lea ua fa’atulaga e faia ai lana ulua’i iloiloga i luma o le afioga i le ali’i Fa’amasino ia Fiti Sunia.

 

I le mae’a ai ona taofi e le ali’i Leoleo o le ta’avale a Toala, na ia aga’i atu ai loa ma siaki le laisene o lo o i le pito i tua o le ta’avale. Na molimauina e le ali’i Leoleo, e le tutusa le numera 5024 o le laisene o le ta’avale, ma le numera 5204 o le sticker o loo pipi’i i le laisene. Na maua mulimuli ane, o le laisene o le ta’avale na mae’a lona aoga i le 2016.

 

E le gata na tuuina atu e le Leoleo le pepa sala ia Toala e tusa ai o lona fa’afoeina o se ta’avale i luga o le alatele a le malo ua mae’a le aoga, ae na toso fo’i le ta’avale a le ua molia i le Ofisa o Leoleo i Tafuna ma fa’aauau ai isi suesuega.

 

Na saili e Leoleo le ta’avale ma maua ai i lalo o le nofoa o le pasese se ato lanumoana. I totonu o lea ato sa maua ai se pepa iila o lo o i ai se vaega tele o le pauta pa’epa’e, e tusa ma le 8 kalama (g) lona mamafa. I totonu lava o le ato sa maua ai e Leoleo isi mea e fa’aaoga e i latou e tuleiina fualaau fa’asaina e pei o le paipa tioata o loo i ai isi vaega o le pauta pa’epa’e; straw ua uma ona tipi tulimanu, o se fua e fua ai le mamafa, ma pepa iila laiti e utu ai le pauta.

 

Na saili e Leoleo le tino o Toala ma maua ai i le taga o lona ofu se pepa iila o lo o i ai fo’i i totonu vaega o le pauta pa’epa’e.

 

Na faia se suega i le pauta pa’epa’e ma fa’amaonia ai, o vaega ia o le pauta oona o le aisa.

 

Ina ua fesiligia e Leoleo ia Toala e uiga i mea ua tuuaia sa maua ia te ia, sa ia fa’ailoa ai i Leoleo e fa’apea, e le o ia e ana le ato sa i lalo o le nofoa o le ta’avale, e le o ia fo’i e ana fualaau fa’asaina sa maua ai i totonu.

 

Na taua e Toala e fa’apea, na alu i Vaitogi e momoli le afafine o lona uso, ae fo’i mai ai ma piki mai Misi ma Atonio i le auala.

 

Na fesili Leoleo pe sa ia vaaia o uu mai e se isi o Siua poo Atonio se ato, na tali le ua molia e leai. O le ato o loo tuuaia na maua ai fualaau fa’asaina, sa i lalo o le nofoa o le pasese lea na nofo ai Atonio.

 

O lo o taofia pea Toala i le toese i Tafuna, se’i vagana ua totogi le $20,000 ona fa’atoa mafai lea ona tatala o ia i tua.