E $400,000 le tupe lea ua tu’uaia e le malo o Amerika Samoa le tama’ita’i sa avea ma Pule o le Ofisa o le McConnell Dowell sa ia gaoia ao avea ai ma tagata faigaluega a le kamupani.

E 66 moliaga na ulua’i molia ai e le malo ia le tama’ita’i o Fonotaga Jasmine Faanu. O ia moliaga e aofia ai moliaga e 22 o le gaoi, 22 moliaga o le ave faagaoi o tupe, ma le 22 moliaga o le faia o fa’amaumau taufa’asese.

Ae i le mae’a ai o le ulua’i iloiloga o lenei mataupu i luma o le afioga i le ali’i Fa’amasino ia Fiti Sunia i le vaiaso na te’a nei, na fa’amalie ai le Fa’amasinoga, e le lava mau sa tuuina atu e le malo e lagolagoina ai moliaga e 22 o le ave faagaoi o tupe, ma faia ai loa le faaiuga ina ia solofua ia moliaga.

Ae mo moliaga e 44 o loo totoe i le pepa o tagi, na taua e le Fa’amasinoga le i ai o mau e lagolagoina ai sa soli se vaega o le tulafono, ma ua tofu atu nei moliaga ia e 44 i luma o le Fa’amasinoga Maualuga.

O le aso Faraile na te’a nei na tula’i ai Faanu i luma o le fa’amasinoga maualuga, ma ua tolopo lana mataupu e toe fofogaina i le masina o Iulai o le tausaga nei.

O lo o taofia pea Faanu i le toese i Tafuna ina ua le mafai ona ia totogi le tupe e $200,000 ua uma ona faatulaga e tatala ai o ia i tua.

ULUA’I ILOILOGA:

E to’alua molimau na valaauina e le malo i le ulua’i iloiloga sa fa’ataunu’uina i luma o le afioga i le ali’i Fa’amasino ia Sunia. O ia molimau e aofia ai Murray Holmes, o le Pule lea o le Vaega o Tupe a le kamupani a le McConnell Dowell, ma le susuga a Daniel Torreson, o se Ali’i Suesue mai Niu Sila na malaga faapitoa mai e suesue lenei mataupu.

O le ali’i loia ia Robert Morris o loo tula’i mo le malo i lenei mataupu, ae o le ali’i loia mai le ofisa loia a le RDA Law Firm ia Richard deSaulles o loo tula’i mo Fa’anu.

Na taua e Holmes i lana molimau e fa’apea, o le mataupu lenei na alia’e mai i le masina o Fepuari, ina ua logoina o ia e se sui mai le Faletupe a le ANZ Bank e fa’atatau i se siaki mai le latou kamupani e $9,980.56 sa taumafai se tagata e tala.

E ui sa le i talitonu Holmes o le siaki a le kamupani lea na taumafai se tagata e tala, ae na mafai ona ia fa’amaonia o le siaki a le kamupani, ina ua tuuina atu e le Faletupe fa’amaonia o le siaki, atoa ai ma le ta’utinoga a Fa’anu ia te ia, o ia na talaina le siaki.

Sa manatu le kamupani e na o le tasi le siaki na a’afia, mulimuli ane ina ua fa’aauau suesuega na iloa ai, e 8 siaki na tala e le ua molia e aunoa ma se fa’atanaga mai le kamupani. Mulimuli ane ina ua faagasolo suesuega na iloa ai, e 22 le aofa’i atoa o siaki na a’afia i lenei gaioiga fa’asolitulafaono.

O kopi uma o siaki e 22 sa tauaaoina atu e le loia a le malo i luma o le fa’amasinoga, ma ua mae’a ona fa’amauina o mea molimau mo lenei mataupu.

Na taua e le molimau i le fa’amasinoga, sa ta’utino atu Faanu ia te ia, e faamaonia o ia sa ia talaina siaki a le kamupani i le faletupe. O siaki e amata mai i le $4,400 e oo atu i le $9,980.56 le maualuga. Tusa lea e $400,000 le aofa’i atoa o le tupe a le kamupani na leiloa ai.

Na fesili le loia a Faanu i le molimau, pe sa i ai ni isi tagata faigaluega na latou talaina ni isi siaki e ese mai ia Faanu, na tali le molimau ioe, sa i ai isi tama’ita’i faigaluega sa la ioeina lo la talaina o isi siaki a le kamupani, ma ua mae’a fo’i ona faia faaiuga e fa’amalolo le tumau i laua nei.

Na toe fesili le loia a le ua molia i le molimau, pe sa i ai se taimi na ia faatonuina ai Faanu e alu e tala mai siaki a le kamupani i le faletupe, na tali le molimau, ioe. Na faamanino atili e Holmes i lana molimau e fa’apea, e i ai lava taimi e masani ai ona alu Faanu e tala mai siaki a le kamupani, peita’i o siaki e 22 e pei ona fesiligia, sa tala e Faanu e aunoa ma se faatonuga a le kamupani.

O siaki e 22 na tala e Faanu e pei ona taua e Holmes i lana molimau, o siaki ia sa fa’aagaaga mo le kamupani a le Pacific Energy (PE), mo le totogiina lea o le latou suauu o loo sapalai atu mo le McConnell Dowell.

E le gata e tusia ai le igoa o le kamupani i luga o le siaki, ae saini ai fo’i ma le pule i le pito i lalo. O le gaioiga sa faia e le ua molia e pei ona tu’uaia e le malo, na te tape ese le igoa o le PE, ae tusi ai lona igoa poo le upu “cash”, ona alu lea ua tala le siaki i le faletupe.

Na taua e le alii Suesue ia Torreson i lana molimau e fa’apea, ina ua ia fesiligia Faanu i le masina o Aperila na te’a nei e uiga i lenei mataupu, sa ia ta’utino atu ai lona talaina o siaki e pei ona fesiligia.

O le tupe sa ia maua mai ai na fa’aalu e toe fa’afou ai lona fale i Masefau, ae o isi tupe sa tufatufa i ni isi o ona aiga ma ana uo.