O le vaiaso na te’a nei na pu’e fa’apagota ai e Leoleo le Pulesili o le Ofisa o Femalagaaiga a le malo o Amerika Samoa, e ala i se tusi saisai na sainia e le afioga i le Tama’ita’i Fa’amasino ia Gwen Tauiliili-Langkilde, e poloaina ai le pu’e fa’apagota o ia e tali ai i moliaga ua faila fa’asaga ia te ia.

O le mataupu e pei ona molia ai le afioga a Peseta Dennis Fuimaono, e feso’ota’i lea ma le mataupu e pei ona ta’usala ai le Ta’ita’i o le Ofisa o le afioga i le ali’i Kovana, le tofa a Fiu Johnny Saelua, e mafua mai i le fa’alavelave lea na tu’uaia ai Fiu i lona pa’i atu i le tino o se Tina ua fai lona to’alua i se auala e atagia mai ai uiga ma lagona tu’inanau.

O lo o tu’uaia Peseta i lona fa’atonuina lea o ni ali’i Ofisa a le Ofisa o Femalagaaiga ina ia aveese mai le Tina na a’afia i le mataupu a Fiu ma lona to’alua, ae auina atu i le uafu i Fagatogo i se auala fa’amalosi, e sauni ai mo le toe tipoti atu i Samoa i le va’a o le Lady Naomi ina ia le mafai ai ona fa’aauau le tagi fa’asaga ia Fiu.

O le afiafi o le Aso Tofi o le vaiaso na te’a nei na aga’i atu ai Leoleo ma fa’ataunuuina loa le poloaiga a le Fa’amasinoga e pu’e fa’apagota ai Peseta i lalo o tuutuuga e fa’atoa mafai ona tatala o ia i tua pe a totogi le tinoitupe e $15,000.

E le i umi se taimi talu ona mae’a le pu’e fa’apagota o le afioga a Peseta, ae toe tatalaina loa o ia i tua ina ua mae’a ona ia totogi le tinoitupe e $15,000.

O le taeao o le aso Faraile na sosoo ai i le vaiaso lava na te’a nei, na tula’i ai loa Peseta i luma o le Fa’amasinoga Fa’aitumalo. O le ali’i Loia Tuto’atasi ia David Vargas lea na tofia e le Fa’amasinoga na te taulimaina le mataupu a Fiu faapea ai ma le mataupu a Peseta, ae o le ali’i Loia Fautua tuto’atasi ia Bob Stuart na tula’i mo Peseta mo lana ulua’i iloiloga.

I le taimi o le ulua’i iloiloga, na fa’amanatu ai e Tauiliili-Langkilde ia Peseta, le tatau lea ona ia usitaia tuutuuga uma e pei ona tatala ai o ia.

Ua poloaina malosi fo’i Peseta a le Fa’amasinoga ina ia aua ne’i taumafai e fa’afesoota’i molimau a le malo o lo o taua o latou suafa i totonu o le tagi tusitusia, aemaise ai fo’i i latou o lo o a’afia i lenei mataupu.

Na talosaga Stuart i le Fa’amasinoga, o isi tagata e to’alua o lo o taua o laua suafa i totonu o le tagi tusitusia a le malo, e faigaleuga fa’atasi ma Peseta i le Ofisa o Femalagaaiga. Na talosaga Stuart, mo se avanoa e fesoota’i ai le ua molia ma i laua nei i mataupu tau i le galuega.

Na fa’ataga e le Tauiliili-Langkilde le mafai lea ona fesoota’i i laua ia e toalua.

O Nov. 15, 2019 lea ua fa’atulaga e le Fa’amasinoga e faia ai le ulua’i iloiloga o lenei mataupu.

E pei ona taua e le Samoa News i sana ripoti sa tuuina atu i le tausaga na te’a nei, ina ua alia’e le mataupu fa’asaga ia Fiu, na maua ai le avanoa e fesiligia ai le Tina na a’afia e tusa ai o le mafua’aga o lana tagi sa fa’aulu i le Ofisa o Leoleo.

O le masina o Oketopa 2018 na fa’ataunuuina ai lea talanoaga i le va o le Samoa News ma le Tina na a’afia, i le potu fono a le Samoa News, ina ua malie le Tina na a’afia e fa’asoa lana itu e tusa ai o lenei mataupu.

Na taua e le Tina na a’afia e fa’apea, pe tusa o le silia i le 2 vaiaso talu ona latou o ese mai ma lona to’alua ma le la fanau mai le fale o Fiu sa latou nonofo ai i Leone, i le mae’a ai lea ona alia’e mai o le mataupu e pei ona tu’uaia ai Fiu i lona tago atu i vaega o ona itutinosa i se auala e fa’ailoa ai ona lagona tu’inanau, na aga’i atu ai loa ni ali’i Faigaluega se to’alua mai le Ofisa o Femalagaaiga, ma faailoa atu ia te ia ma lona to’alua se tusi mai le la sponsor, e fa’aleaoga ai lo la nofomau i Amerika Samoa.

Sa faatonuina e sui e to’alua a le Ofisa o Femalagaaiga le ulugali’i latou te aga’i atu i le Ofisa autu o Femalagaaiga i le maota o le EOB i Utulei, ona o loo i ai se mataupu o lo o fia talanoa mai ai le la pule ia te i laua. O le Pule e pei ona taua e le Tina i lana fa’amatalaga, o le afioga lea i le Pulesili o le Ofisa o Femalagaaiga ia Peseta, le ua molia nei e le malo i lenei mataupu.

Na malilie le ulugali’i i le faatonuga a sui o le Ofisa o Femalagaaiga, ma latou aga’i atu ai loa i le ta’avale a le Ofisa o Femalagaaiga i Utulei, e aunoa ma se manatu o le a i ai se mataupu e tula’i mai i lea aso.

“A o aga’i atu le ta’avale a le Ofisa o Femalagaaiga o lo o avatu ai maua ma lo’u to’alua, sa ou faalogoina le tatagi pea o le telefoni a le isi ali’i Ofisa o Femalagaaiga. Sa ou faalogo atu i lea ali’i o lo o faapea atu i le tagata o lo o vili mai i lana telefoni, “BOSS, o lea ua matou aga’i atu i luga o le ala ma le faamoemoe e aga’i sa’o atu lava i le tatou Ofisa autu.”

Na taua e le Tina i le Samoa News e fa’apea, e le i alu le ta’avale i le Ofisa o Femalagaaiga i le maota o le EOB, ae na aga’i sa’o atu lava i le uafu i Fagatogo i le vaega e fa’aee ai pasese o le va’a a le Lady Naomi mo Samoa.

Ina ua laasia Utulei o lo o i ai le Ofisa o Femalagaaiga, na taua e le Tina le faailoa atu e sui o le Ofisa o Femalagaaiga ia te ia ma lona to’alua, ua toe sui le polokalame, o le a leai se feiloaiga e faia ma le Pulesili faapea ai le la sponsor i le Ofisa autu i Utulei, ae o le a latou feiloa’i ma talanoa i luga o le uafu i Fagatogo.

“O le taimi lea na oso mai ai loa ma manatu ma lo’u to’alua, o maua o le a Tipoti i Samoa,” o le fa’amatalaga lea a le Tina ma ona loimata.

“Ina ua ou mautinoa o maua o le a toe Tipoti i Samoa, o le mea muamua lava na oo mai i lo’u loto o si a’u fanau o loo i le fale i Leone. Sa ou popole ina ne’i Tipoti i maua ona le maua lea o se avanoa ou te toe vaai ai i la’u fanau.”

E ui i se taumafaiga e toe faafo’i le ulugali’i, ae na le mafai ona fa’ataunuuina lea fuafauga, ina ua faia e se tasi o alii Ofisa Sinia o Femalagaaiga sa galue i luga o le Uafu i le aso lea, e le mafai ona Tipoti le ulugali’i se’i vagana ua i ai se pepa e faamaonia ai le toe faafo’i atu o i laua i Samoa.