Ads by Google Ads by Google

Molia le Pule o le Aute i le umia fa’asolitulafono o fualaau fa’asaina


[ata: foa'i]
ausage@samoanews.com

Ua molia nei e le malo le Pule o le pisinisi o le Aute i lona umia fa’asolitulafono lea o vaega o fualaau fa’asaina o le aisa ma le mariuana. O ia moliaga na afua mai ina ua osofa’i e se Vaega faapitoa a le Ofisa o Leoleo le nofoaga o le Aute i le taeao po o le aso Lulu o le vaiaso na te’a ne, i lalo o se poloaiga mai le Fa’amasinoga e sailia ai le nofoaga o le Aute.

 

O le fa’alavelave lea o lo o tu’uaia ai se ali’i pagota i lona sola i tua ma fana se ali’i i Leone i le vaveao o le aso 12 o Aokuso na te’a nei, na mafua ai loa ona talosagaina e Leoleo se poloaiga a le fa’amasinoga, latou te sailia ai le nofoaga o le Aute, ina ua masalomia, o iina lea na aumai ai e le ali’i pagota na sola i tua le laau malosi e fa’atino ai le solitulafono.

 

O le aoauli o le aso Faraile na te’a nei na tula’i ai Tumuatasi Lefatia i luma o le Fa’amasinoga Fa’aitumalo. Ua molia nei o ia e le malo i moliaga mamafa e 4. O ia moliaga e aofia ai le umia fa’asolitulafono o le pauta fa’asaina o le aisa; umia faasolitulafono o le pauta fa’asaina o le aisa ma le fa’amoemoe e tulei pe fa’atau atu i isi tagata; umia fa’asolitulafono o le laau fa’asaina o le mariuana; faapea ai ma le umia fa’asolitulafono o le mariuana ma le fa’amoemoe e tulei pe fa’atau atu i isi tagata.

 

O le ali’i loia tua ia Marcellus T. Uiagalelei o lo o tula’i mo Lefatia, ae o le ali’i loia sili lagolago ia Woodrow Pengelly o loo tula’i mo le itu a le malo i lenei mataupu.

 

O le tama’ita’i Fa’amasino le Tumau ia Gwen Tauiliili-Langkilde na fofogaina le mataupu a Lefatia, o ia fo’i lea na fa’atulagaina le tupe e $100,000 e totogi ona fa’atoa mafai lea ona tatala le ua molia i tua.

 

Afai ae mafai ona totogi le tupe ua fa’atulaga e le fa’amasinoga, ua poloaina le ua molia ina ia aua ne’i ona toe taumafai e fa’afesoota’i molimau a le malo, ia avea o ia ma tagatanu’u e tausisi i tulafono a le malo i taimi uma, ma ia auai i soo se taimi e valaau ai lana mataupu. Ua fa’atonuina fo’i o ia ina ia tu’uina atu lona tusi folau e taofi e le loia a le malo, fa’atoa toe fa’afo’i atu pe afai ae mae’a lana mataupu.

 

Talu ai o lo o nofovaavaaia Lefatia i luma o le fa’amasinoga maualuga mo le 2 tausaga, ua poloaina ai o ia ina ia fa’aauau pea ona ia usitaia tuutuuga o lana nofovaavaaia na tuuina mai e le fa’amasinoga i le tausaga na te’a nei.

 

O le itula e 11 i le taeao o le aso Lulu o le vaiaso nei lea ua fa’atulaga e toe valaau ai le mataupu a Lefatia i luma o le fa’amasinoga.

 

Na fa’ailoa e Uiagalelei i le fa’amasinoga e fa’apea, o le a fa’atali le tuuina atu o sana fa’afinauga mo se avanoa e fa’aitiitia ai le tupe tatala ai le ua molia i tua, faatoa fa’aleo pe a oo i le isi iloiloga a Lefatia lea ua fa’atulaga mo le vaiaso nei. E to’atele ni isi o aiga o Lefatia sa auai i totonu o le potu fa’amasino mo le lagolagoina o lana mataupu, lea e aofia ai lona to’alua ma lona Tina.

 

OTOOTOGA O LE TAGI A LE MALO

 

E pei ona taua i le tagi a le malo e fa’apea, o lea te’a laititi o le itula e 6:00 i le taeao o le aso Lulu o le vaiaso na te’a nei, ae osofaia loa e se vaega to’atele a Leoleo le nofoaga autu o le Aute, i lalo o se poloaiga mai le fa’amasinoga. O lea poloaiga e fesoota’i lea mataupu e pei ona tu’uaia ai le ali’i pagota o Manu Lefatia, i lona sola i tua ma fana se ali’i i Leone i le vaveao o le aso 12 o Aokuso o le tausaga nei.

 

O le ali’i pagota o Manu, o le tama lea a le pule o le Aute, lea fo’i e valaau e le to’atele ia Mama.

 

E 3 fale na taua i totonu o le poloaiga mai le fa’amasinoga e sailia. O ia fale e aofia ai ma le fale lea e fa’aaoga a faia ai le ta’aloga piliaki a le Aute. O le fale o lo o fa’atinoina ai le taaloga piliaki a le Aute, e sosoo atu lava ma le fale e 3 potu moe o loo nonofo ai tagata.

 

O le taeao po o le aso Lulu e pei ona taua ae ulufale fa’afuase’i loa se vaega to’atele o Leoleo i totonu o le potu moe muamua lava o le fale, ma latou maua atu i ai se fafine matua, o ia lea o Mama, fa’atasi ai ma se tama’ita’i talavou faapea ai ma se pepe.

 

Na tula’i Lefatia i luga mai lona moega ma taumafai e fa’amaulu lona laei, ona ia talosaga lea i Leoleo mo se avanoa e aga’i atu ai i le fale taele. Ina ua mae’a, sa ta’ita’iina atu loa e Leoleo ia Lefatia fa’atasi ai ma le tama’ita’i ma le pepe i luma o le potu malolo, ma maua ai loa le avanoa e fa’ailoa ai e Leoleo ia Lefatia le mafua’aga o le osofaiga a Leoleo. Sa tuuina atu fo’i ia te ia le kopi o le poloaiga a le fa’amasinoga e sailia ai lona fale.

 

I tafatafa o le moega sa taoto ai Lefatia, sa tu ai se tama’i laulau e le mamao ese mai le tulaga o le moega. I luga o le tama’i laulau lea, sa maua ai e Leoleo se tama’i ato lanu uliuli. I totonu o le tama’i ato lanu uliuli, sa maua i ai se pepa iila o loo i ai i totonu i sikaleti mariuana se 7 ua ma’ea ona taai, fa’atasi ai ma se tupe e $70. Sa maua ai fo’i i le isi itu o le ato le isi tama’i pepa iila na maua ai i totonu sikaleti mariuana e 19 ua uma ona taai.

 

Sa maua ai fo’i i totonu o le tama’i ato lanu uliuli le isi taga pepa iila, o loo i ai i totonu tama’i pepa iila ua uma ona utu i vaega o le pauta pa’epa’e. Sa maua ai fo’i ni tama’i pepa iila se 33 e masani ona utu ai le pauta o le aisa. Ae o totonu o isi tama’ita’i pepa iila e 3, sa maua o loo totoe ai vaega laiti o le pauta pa’epa’e o le aisa.

 

Na fa’ailoa e Leoleo ia Lefatia mea sa maua i totonu o le tama’i ato lanu uliuli, ae o le fesili a Lefatia sa fai i Leoleo, “O i ai so’u igoa o pipi’i i le ato lena.” Sa maua ai fo’i e Leoleo ma se sefe u’amea e lei mafai ona tatala, ma ua auina atu nei i le Ofisa o Leoleo sei sailia se auala e mafai ai ona tatala ma sailia lea tama’i sefe.

 

Na sailia e Leoleo le isi potu o le fale ma maua i ai se tama’i pepa iila se tasi o loo i ai vaega o le pauta o le aisa. Na fa’ailoa e Leoleo ia Lefatia le pepa o loo i ai vaega o le pauta sa maua i le isi potu, peita’i sa fesili fo’i Lefatia, “Sa i ai se tagata i totonu o le potu i le taimi na maua ai lena pepa.”

 

I totonu o le potu e fai ai tagamea, sa maua i ai isi vaega o lau mamago o le mariuana, atoa ai ma se pepa sa i ai ni fatu mariuana. Na sailia totonu o le fale piliaki ma maua ai e Leoleo se ie e fusi ai le ulu (bandana) sa i luga o le laulau, o loo afifi ai ni paipa tioata se 3. O ia paipa e masani ona fa’aaoga e tagata e ula ai le pauta o le aisa.

 

O vaega uma o fualaau fa’asaina sa faia i ai se suega, ma fa’amaonia mai ai, o nei vaesga uma o vaega ia o le pauta fa’asaina o le aisa faapea ai ma le laau fa’asaina o le mariuana.

 

Ina ua fesiligia e Leoleo ia Lefatia e tusa ai o mea sa maua i lona fale, sa musu o ia e tuuina atu sana fa’amatalaga tusitusia i Leoleo. Ua taofia uma e Leoleo mau fa’amaonia sa maua mai i le osifaiga, e fesoasoani i le latou tagi fa’asaga ia Lefatia.

 

MATAUPU MUAMUA A LEFATIA

 

O le masina o Mati i le 2015 na osofaia ai fo’i e Leoleo le nofoaga o le Aute, ma maua ai fo’i le tele o vaega o fualaau fa’asaina faapea ai ma laau malosi. E le gata na pu’e fa’apagota e Leoleo ia Lefatia ma molia, ae sa pu’e fa’apagota ai fo’i ma lona tuagane ia Ah Kiong Talamoa.

 

E ui na molia Lefatia i moliaga mamafa o lona umia faasolitulafono o fualaau fa’asaina o le aisa ma le mariuana, atoa ai ma lona umia fa’asolitulafono o a’upega malolosi, ae na malie le malo e tali ioe Lefatia i le moliaga mama o le umia faasolitulafono o se aupega.

 

E tasi le tausaga na manatu le fa’amasinoga e loka ai Lefatia i le toese, peita’i na fa’amalumalu lona tuliina o lea fa’asalaga, ae faanofovaavaaia o ia mo le 2 tausaga i lalo o tuutuuga e ao ona ia usita’i i ai. O ni isi o tuutuuga o lana nofovaavaaia e aofia ai lona tuliina o aso e 90 i le toese, fa’asa ona ia toe umia faasolitulafono vaega o fualaau fa’asaina, fa’asa fo’i ona ia toe solia se tulafono a le malo.