Ads by Google Ads by Google

Molia ni ali’i se to’atolu umia fa’asolitulafono o fualaau fa’asaina


[ata: foa'i]
ausage@samoanews.com

E to’atolu ni ali’i ua molia nei e le malo i le umia fa’asolitulafono o fualaau fa’asaina, e mafua mai i le fa’alavelave lea na maua ai e Leoleo se vaega o fualaau fa’asaina i se fale i Iliili i le masina o Aperila na te’a nei.

 

O i latou ua molia e aofia ai Sefulu Mika Kelemete, Allen Snow ma Faainu Tuavale.

 

O lo o tu’uaia uma i latou nei i le moliaga o le umia fa’asolitulafono o vaega o le laau fa’asaina o le mariuana, o le vaega D lea o solitulafono mamafa, lea e mafai ona fa’asala ai se tasi i le toese mo le umi e le i lalo o le 5 tausaga ae le sili atu fo’i ma le 10 tausaga, poo le fa’asala i le salatupe e le itiiti ifo i le $5,000 ae le silia i le $20,000, poo le fa’asala fo’i i fa’asalaga uma ia e lua.

 

O le tama’ita’i loia fautua lagolago ia Hannah Whyle o lo o tula’i mo Kelemete ma Snow, ae o le ali’i loia tua ia Marcellus Talaimalo Uiagalelei o lo o tula’i mo Tuavale. Ae o le tama’ita’i loia sili lagolago ia Laura Garvey o lo o tula’i mo le malo.

 

Ua tatala uma i tua i latou nei ina ua mae’a ona totogi le tupe e ta’i $5,000 a le tagata sa fa’atulaga e le fa’amasinoga. O tuutuuga faapitoa mai le fa’amasinoga o lo o tatala ai i tua i latou nei, e aofia ai le fa’asa lea ona latou toe solia se tulafono, fa’asa ona latou toe tagofie ni vaega o fualaau fa’asaina, fa’asa fo’i ona latou toe taumafai e fa’afesoota’i molimau a le malo.

 

O le vaiaso na te’a nei na tutula’i uma ai i latou nei i luma o le Fa’amasinoga Maualuga, ma latou teena ai moliaga fa’asaga ia te i latou.

 

O le aso 5 o Iulai 2019 lea ua fa’atulaga e le afioga i le Fa’amasino Sili ia Michael Kruse e toe faia ai le isi iloiloga.

 

Na tuuina atu fo’i e Kruse le isi tuutuuga faapitoa e tatala ai i latou nei, o le saini lea o latou suafa i le Ofisa o le loia o lo o tula’i mo i latou.

 

Mo Kelemete ma Snow, ua poloaina i laua ina ia saini i le ofisa o le Loia Fautua ia le silia ma le itula e 10 i le taeao o le aso Lulu o vaiaso ta’itasi. Ae mo Tuavale, ua poloaina o ia ina ia saini i le Ofisa o le ali’i Loia ia Uiagalelei, ia le silia ma le itula e 10 i le taeao o aso Faraile o vaiaso ta’itasi.

 

Ua poloaina fo’i e Kruse i latou nei ina ia tuuina atu o latou tagata e faia i ai ni suega e Leoleo poo se sui o le Ofisa Faanofovaavaaia i soo se taimi, ina ia mautinoa o lo o latou usitaia le tuutuuga e faasa ai ona latou toe tagofia pe fa’aaogaina fualaau fa’asaina.

 

Ua faatonuina fo’i e Kruse loia o lo o tutula’i mo i latou ua molia, ina ia mautinoa lo latou tuli matai o le poloaiga e saini ai i latou nei i vaiaso taitasi, ina ia mautinoa o loo latou usitaia lea poloaiga a le fa’amasinoga.

 

ULUA’I ILOILOGA

 

O le vaiaso na te’a nei na faia ai le ulua’i iloiloga o lenei mataupu i luma o le Fa’amasinoga Fa’aitumalo, e iloilo ai mau a le malo ua folasia, pe lava ma totoe ia mau.

 

O le mae’a ai o le iloiloga sa fa’atautaia i luma o le afioga i le ali’i Fa’amasino ia Elvis P. Patea, na tofu atu ai loa lenei mataupu i luma o le Fa’amasinoga Maualuga, ina ua fa’amalieina Patea i mau sa folasia e le malo e lagolago ai lenei mataupu.

 

O le tama’ita’i Leoleo Suesue ia Det. Samantha Lam Yuen, o ia fo’i lea na autu i ai le suesueina o lenei mataupu na valaau e le malo e fai ma latou molimau i le ulua’i iloiloga o lenei mataupu.

 

Na taua e Lam Yuen i lana molimau e fa’apea, o le aso 6 o Aperila 2019 na maua ai e le Ofisa o Leoleo i Tafuna se telefoni mai se tagata i Iliili, e fa’atatau i ni tagata o loo faatupuina le vevesi i se tasi o fale i Iiliili, e ala i le leo tetele ma pisapisao.

 

E to’atolu Leoleo na tali atu i lea valaau, o Lam Yuen faapea ai ma isi ali’i Leoleo e to’alua o Det. Justin Thomsen ma Det. Tavake Foma’i, o sui uma ia o le Vaega o le Vice & Narcotics Units a le Ofisa o Leoleo.

 

A o aga’i atu le ta’avale Leoleo na malaga atu ai Leoleo e to’atolu i le auala e aga’i atu i le fale o lo o masalomia le tula’i mai ai le pisapisao ma le vevesi, na iloa mamao atu e Leoleo ni ali’i se to’alua o lo o saofafa’i mai i luga o se laulau i totonu o le fale.

 

Na tu le ta’avale i luma o le fale ma vaaia ai loa e Leoleo le aga’i mai o se ali’i i le ta’avale Leoleo. O ia lea o Kelemete. Na fesili Kelemete i Leoleo i le mafua’aga ua afea ai lona fanua, ae na fa’ailoa i ai e Leoleo, o latou na malaga atu e suesue le mataupu e faatatau i tagata o lo o faatupuina le pisa i le latou nofoaga.

 

Na fai Kelemete i Leoleo, e leai se aia latou te solia ai fua lona fanua, e le mafai fo’i ona latou sailia lona fanua ma lona fale.

 

Ae na toe faailoa e Leoleo ia Kelemete, latou te le o taumafai e saili lona fale ma lona fanua, pau le mafua’aga na latou oo atu ai, o le asia lea o le nofoaga e pei ona mafua atu ai le fa’asea mai aiga tuaoi i le pisa ma le vavao.

 

A o faia le talanoaga i le va o Leoleo ma Kelemete, sa fa’alogoina e Leoleo le malosi o le manogi mariuana o lo o sau mai totonu o le fale, o lea sa talosaga atu loa le ali’i Leoleo ia Thomsen ia Kelemete, mo se avanoa se’i o latou ta’amilo atu ai i tua ma autafa o lona fale.

 

O le taimi lava na fai atu ai le ali’i Leoleo ia Thomsen ia Kelemete mo se avanoa e ta’amilo atu ai i tua o lona fale, o le taimi lea na faliu ai loa Kelemete ma valaau i ali’i e to’alua o loo i luga o le laulau, ina ia vaai fa’alelei mea o loo i luga o le laulau.

 

Na vave gaioiga a Leoleo ma latou maua atu ai fualaau i luga o le laulau. O vaega sa maua i ai e pei ona taua e Lam Yuen i lana molimau e aofia ai fatu mariuana, faapea ai ma se apa uga (plastic container) o lo o i ai se pepa iila i totonu o loo tumu i lau mamago lanu meamata.

 

Sa ave lau mamago nei ma faia i ai le suega ma faamaonia ai, o lau ia o le laau fa’asaina o le mariuana.

 

Na ave e Leoleo fualaau faasaina faapea ai ma i latou e to’atolu sa i ai i le fale, ma auina atu loa i le Ofisa o Leoleo i Tafuna mo isi suesuega. Mulimuli ane taofia uma i le toese i Tafuna i le aso lava lea, e fa’atali ai le taimi e tutula’i ai i luma o le Fa’amasinoga Faaitumalo.