E to’alua ni ali’i ua molia nei e le malo i le umia faasolitulafono o a’upega faasaina atoa ai ma fualaau fa’asaina, e mafua mai i le fa’alavelave lea na maua ai e Leoleo se ato o lo o i ai aupega ma fualaau fa’asaina i totonu o le ta’avale sa fa’afoeina e se tasi o i laua nei.

O i laua ua molia e aofia ai Faafetai Lefatia Jr poo “UNA BOY” e pei ona iloa ai o ia e le to’atele, ma Daisy Mareko, lea na tutula’i i luma o le Fa’amasinoga Faaitumalo i le amataga o le vaiaso nei mo le la ulua’i iloiloga.

O lo o tu’uaia e le malo i laua nei i moliaga o le umia faasolitulafono o vaega o le pauta fa’asaina o le aisa; umia faasolitulafono o aupega; atoa ai ma le moliaga mama o le umia faasolitulafono o pulufana.

E $20,000 le ua fa’atulaga e tatala ai i tua Lefatia Jr ae $10,000 lea ua fa’atulaga e tatala ai i tua Mareko.

O le vaiaso fou lea ua fa’atulaga e faia ai le ulua’i iloiloga o lenei mataupu.

TAGI A LE MALO

O lo o taua e le malo i le latou tagi e fa’apea, ao tiute ai ni Leoleo se to’alua i le itu i sisifo o le atunu’u, e aga’i atu i Futiga i Leone i luga o le alatele i le taeao o le aso 7 o Novema o le tausaga nei, na vaaia ai e Leoleo se ta’avale lanu uliuli o le ituaiga o le Hyundai, numera o le laisene 991C o lo o paka i luma o se Faleoloa i Puapua.

O le ta’avale lea 991C e pei ona taua e le malo, sa aofia i se tuliga sa faia ma Leoleo i le po o le aso 3 o Novema, lea na matua fiu Leoleo e tuli e le maua. Talu mai lava lea tuliga ta’avale a Leoleo ma le ta’avale 991C, sa galulue pea lava Leoleo e tau saili le ta’avale atoa ai ma le ave ta’avale.

Na aga’i atu Leoleo ma talanoa atu i le ave ta’avale o le ta’avale uliuli lea, ma iloa ai, o le ave ta’avale, o le susuga a Faafetai Lefatia Jr, o se tasi o lo o molia i lenei mataupu. Na faailoa e Leoleo ia Lefatia Jr le mafua’aga o le la talanoa atu, ona o le ta’avale tonu lea o loo ia faafoeina sa aofia i se tuliga ta’avale sa faia ma Leoleo i ni nai aso ua mavae atu, peita’i sa teena e Lefatia Jr lona iloaina o lea fa’alavelave, faapea ai ma lona faailoa i Leoleo, e le o ia na faafoeina le ta’avale i le po e pei tula’i mai ai le fa’alavelave.

A o talanoa Leoleo ma Lefatia Jr, sa fa’afuase’i ona vaaia se ta’avale pikiapu lanu pa’epa’e ua afe atu ma paka i le isi itu o le ta’avale i luma lava o le Faleoloa lea i Puapua, ona vaaia lea o se ali’i ua oso i fafo mai le ta’avale lea o le 7999 ma aga’i mai i le ta’avale a Lefatia Jr.

O le ali’i lea na savali mai ma talanoa atu ia Lefatia Jr o Daisy Mareko, se tasi o lo o molia i lenei mataupu, lea sa la to’alua mai ma se isi fo’i alii sa ia faafoeina mai le ta’avale 7999 lanu pa’epa’e.

Ina ua taunuu Mareko ma talanoa ma Lefatia Jr, sa faatonuina loa e Lefatia Jr ia Mareko e tago e aveese atu le fa’atau o loo i totonu o lana ta’avale (Lefatia Jr) ma ave i le ta’avale 7999, faatasi ai ma le ato lanu uliuli o loo i le nofoa pito i tua o le ta’avale.

Na fesili Leoleo ia Lefatia Jr poo ai e ana le ato lea ua alu ese atu ma Mareko, ae na tali Lefatia Jr, o le ato a Mareko. Na ona alu atu lava o Mareko tuu le fa’atau i totonu o le ta’avale, oso i totonu o le ta’avale ma la aga’i ese atu loa.

Ina ua aga’i ese atu le ta’avale a Mareko ma le ali’i o loo la to’alua, sa maitauina e Leoleo e le o faia a laua fusipa’u mo le saogalemu, o le mafua’aga lea na tuli tatao ai loa e Leoleo le taavale o loo alu atu ai Mareko ma taofi mai ai i le isi pito nu’u lava o Futiga. E leai se laisene poo se ID e mafai ai ona faamaonia Mareko ma le ali’i ave ta’avale i Leoleo, o le mafua’aga lea na taofia ai loa e Leoleo le ta’avale faatasi ai ma Mareko ma le ave ta’avale.

Ae o le taimi fo’i lea ua mae’a ai ona taofia e Leoleo ia Lefatia Jr ma ua auina atu nei o ia i le Ofisa o Leoleo i Tafuna mo suesuega.

Sa fesili Leoleo ia Mareko poo ai e ana le ato uliuli lea na ia avese mai i totonu o le ta’avale a Lefatia Jr, ae na tali Mareko, o le ato a Lefatia Jr. Na malie Mareko e su’e e Leoleo le ato, ma, i totonu o le ato, sa maua i ai fana, pulu, fualaau fa’asaina ma se tinoitupe.

E taunuu atu Leoleo sa momoliina atu Mareko ma le ali’i ave ta’avale i le Ofisa o Leoleo i Tafuna, o lo o i ai Lefatia Jr.

Na tatala e Leoleo le ato uliuli i totonu o le potu sa i ai Lefatia Jr, ae la’u uma i lalo mea sa i totonu ao molimauina fo’i e Lefatia. O mea sa maua i totonu o le ato e aofia ai fana e 2 (tasi le fana o le ituaiga o le .22 faapea ai ma le fana e tasi o le ituaiga o le .35); sa maua ai fo’i pulufana e 11 i totonu o le ato (o pulufana o le fana .22 ma le .35); sa maua ai fo’i straws e 4 ua uma ona ta tipi tulimanu ae utu ai i totonu le pauta fa’asaina o le aisa; o le tinoitupe e $2,949; e 2 isi pepa iila feololo sa maua i ai vaega o le pauta fa’asaina o le aisa; 99 pepa iila laiti e fa’aaoga e utu ai le pauta o le aisa; o telefoni faapea ai ma isi lava mea eseese na mafai ona taofia uma e Leoleo.

Ina ua maea ona faitauina e Leoleo aia tatau a i laua nei, e leai se isi o i laua na mana’o e fai sana fa’amatalaga i Leoleo.

Se’i vagana ai le ave ta’avale o le ta’avale lanu pa’epa’e lea na o atu ma Mareko na fai lana fa’amatalaga i Leoleo, ma toe tatala ai o ia i tua e aunoa ma le moliaina o ia. Na taua e lea ali’i i Leoleo e fa’apea, o ia e le malamalama i se mea na tupu, pau lana galuega sa fai o le aveina lea o le ta’avale na la malaga atu ai ma Mareko.

Sa faateia o ia ina ua paka le la ta’avale i luma o le Faleoloa, ae ona vaaia Mareko ua savali atu ma aumai le fa’atau faapea ai ma se ato lanu uliuli mai totonu o le ta’avale a Lefatia Jr. Na taua e le ave ta’avale e faapea, o laua na o atu e fa’atau mai se la sikaleti ae fetaui ai le la taunuu atu o loo paka mai ai i luma o le Faleoloa le ta’avale a ‘UNA BOY’ (Lefatia Jr).

O le susuga a Lefatia Jr o lo o faanofovaavaaia o ia mo le 12 masina e le Fa’amasinoga Faaitumalo, ina ua ta’usala o ia i moliaga mama e mataupu eseese e 3 sa faia fa’asaga ia te ia.

O le masina o Aokuso o le tausaga nei le taimi mulimuli na tula’i ai Lefatia Jr i luma o le Fa’amasinoga Faaitumalo, mo le tuuina atu o le fa’asalaga ia te ia, e mafua mai i le fa’alavelave lea na faia ai se suega i lona tino e le Ofisa Faanofovaavaaia na faamaonia ai lona fa’aaogaina o le pauta fa’asaina o le aisa.

O nisi o tuutuuga o le nofovaavaaia a Lefatia Jr, o le avea lea o ia ma tagatanu’u e tausisi i soo se tulafono a le malo, aua fo’i ne’i ona toe solia se tulafono a le malo.