Ads by Google Ads by Google

Molia ni ali’i se to’alua faia o sau’aga fa’asaga i o la ta’i to’alua


[ata: foa'i]
ausage@samoanews.com

E to’alua ni ali’i na taofia fa’apagota e Leoleo i le fa’aiuga o le vaiaso na te’a nei, ona o tu’uaiga i lo la faia lea o ni sau’aga fa’asaga i o la ta’i to’alua. E eseese nofoaga na pu’e fa’apagota mai ai e Leoleo i laua e to’alua.

 

O le isi fa’alavelave na tula’i mai i Malaeimi ae o le isi na tula’i mai i Tafuna. O nei mataupu na tutupu uma i le po o le aso Sa na te’a nei, e pei ona taua i fa’amaumauga a le fa’amasinoga.

 

Na tutula’i ali’i ua molia i luma o le Fa’amasinoga Fa’aitumalo i le aso Gafua na te’a nei, ma la teena ai moliaga ta’i lua ua tuuaia ai i laua e le malo. O le aso 18 Setema lea ua fa’atulaga e toe valaau ai a laua mataupu. Ua molia i laua e le malo i moliaga o le fa’atupu vevesi i nofoaga faitele, atoa ai ma le fa’aoolima i le tulaga tolu.

 

O le ali’i lea na pu’e fa’apagota mai e Leoleo i Malaeimi, ua toe tatala o ia i tua e aunoa ma se tupe e totogi, ae o le ali’i lea na pu’e fa’apagota mai i Tafuna, e $300 lea ua fa’atulaga e totogi ona fa’atoa mafai lea ona tatala o ia i tua.

 

O ni isi tuutuuga ua poloaina e le afioga i le ali’i Fa’amasino ia Fiti Sunia i laua nei e usita’i i ai, e aofia ai le fa’asa lea ona la toe tagofia le ‘ava malosi poo fualaau fa’asaina, fa’asa ona toe taumafai e fa’afesoota’i o la ta’ito’alua i soo se auala, a ia avea i laua ma tagatanu’u e tausisi i tulafono a le malo i taimi uma.

 

FA’ALAVELAVE I MALAEIMI

 

O le fa’alavelave lea na tula’i mai i Malaeimi, na tofu atu i le Ofisa o Leoleo ina ua logo e se tagata e tuaoi ma le fale o le ulugali’i ia Leoleo mo se fesoasoani, i le mae’a ai lea ona ia fa’alogoina o se tagata o loo malomaloa ma laulauvavale mai totonu o le fale i le po o le aso Sa.

 

E le i umi se taimi ae taunu’u Leoleo ma latou aga’i atu loa i le fale o lo o taua o lo o tula’i mai ai le fa’alavelave. E lei umi ona taunuu Leoleo ae vaaia loa le savali mai i fafo o se fafine ma talanoa ma Leoleo. O ia lea na a’afia i lenei mataupu.

 

Na taua e le fafine na a’afia i Leoleo e fa’apea, sa faia se la talatalanoaga fa’asamasamanoa ma lona to’alua i totonu o le fale, a o inu pia a lona to’alua. I le ogatotonu o le la talanoaga, na ia faia ai se tala na fa’afuase’i ona ita ai lona to’alua, ma tula’i mai ai loa se taugaupu i lo la va.

 

I le taimi o le taugaupu a le ulugali’i, na tu’uaia ai e le tamaloa lona to’alua i le faia lea o se la mafutaga fa’anunumi ma se ali’i ave pasi o le latou nu’u. Na taumafai le fafine e fa’ato’afilemu lona to’alua, ae na fa’afuase’i ina ua pasasa le tu’i muamua i lona auvae, ma sosoo atu ai loa ma isi tu’i i ona foliga, a o fa’aauau pea ona e e i luga lona to’alua ma lafo atu upu mamafa ma palauvale ia te ia.

 

Na sola ese le ua molia mai le fale ina ua ia iloa o le ta’avale Leoleo lea ua tu i luma o le latou fale. Ina ua mae’a le talanoaga a Leoleo ma le fafine na a’afia, na talosagaina ai loa e Leoleo le fafine ina ia logo vave atu le latou Ofisa pe afai ae toe fo’i atu lona to’alua i se taimi o le po.

 

Sa fa’aauau pea ona ta’amilo le ta’avale a Leoleo i le nofoaga lea mo le taumafai lava e saili pe mafai ona latou vaaia ai le ua molia. Pe tusa o le itula e 11:50 i le po lava lea, na vaaia ai e Leoleo se tagata e foliga mai o loo taumafai e lafi i tua o se togavao ina ua ia vaaia le latou ta’avale, i le nofoaga lava lea e latalata i le fale na tula’i mai ai le fa’alavelave.

 

Na aga’i atu Leoleo e siaki lea tagata, ma latou maua ai, o le ua molia lea o loo lafi i tua o se togavao. E le i toe i ai lava nisi fa’amatalaga, ae na pu’e fa’apagota loa e leoleo le ua molia ma auina atu i le ofisa mo suesuega, mulimuli ane taofia ai loa o ia i le falepuipui i le po lava lea.

 

Sa faalogoina e Leoleo le malosi o le manogi pia sa sau mai le tino ma le manava a le ua molia i le taimi na taofia ai o ia.

 

FAALAVELAVE I TAFUNA

 

O le fa’alavelave lea na tula’i mai i Tafuna, na tupu pe tusa o le itula e 7:21 i le po o le aso Sa na te’a nei. O lea fa’alavelave, o loo tuuaia ai se ali’i i lona fa’aoolima lea i lona to’alua, e mafua mai ina ua masalosalo le tamaloa, o loo i ai se isi ali’i o loo mafuta atu i ai si ona Faletua fa’aipoipo.

 

Na taua e le fafine na a’afia i Leoleo e fa’apea, o laua na aga’i mai i le la ta’avale ma le fa’amoemoe e asia se tasi o a la uo i le isi pito nu’u o Tafuna. A o aga’i mai le la ta’avale ma lona to’alua, sa fa’afuase’i ona suia le mataupu o le la talanoaga, ina ua tuuaia e lona to’alua o ia, o loo faia sana fa’anunumi ma se isi tamaloa.

 

Na fa’afuase’i ona afe le ta’avale i le vaega e paka ai ta’avale i se tasi o fale’aiga i Tafuna, ma fasi ai loa e le ua molia lona to’alua e ala i lona po ma tu’i ona foliga. O le ita o le fafine na mafua ai ona oso i fafo ma ia faafesootai loa Leoleo mo se fesoasoani.

 

Ina ua fesiligia e Leoleo le ua molia e uiga i lenei mataupu, sa ia ta’utino ai, e moni sa ia faaoolima i lona to’alua, e mafua mai i le tiga o lona loto i le le fa’amaoni o lona to’alua ia te ia.

 

Ua faasa e le fa’amasinoga le ua molia ona toe taumafai e fa’afesoota’i lona to’aolua i soo se auala, a o fa’agasolo ai taualumaga o lana mataupu.