Ads by Google Ads by Google

Molia ni ali’i se to’alua i le fa’ao’olima i o la ta’i to’alua


[ata: SN]
ausage@samoanews.com

Ua maitauina pea le fa’atupulaia o le fa’afitauli o le sauaina o fafine e o latou ta’ito’alua, aemaise lava i le taimi e tagofia ai e tamaloloa le ‘ava malosi.

 

O le vaiaso na te’a nei na pu’e fa’apagota ai e Leoleo ni ali’i se to’alua mai le itu i Sisifo o le atunu’u, ona o tu’uaiga i lo la fa’ao’olima lea i o la ta’i to’alua. Sa tagofia uma e i laua nei le ‘ava malosi i le taimi na tula’i mai ai fa’alavelave e pei ona tu’uaia ai i laua.

 

O loo molia i laua e to’alua i moliaga mama ta’ilua o le faaoolima i le tulaga tolu ma le faatupu vevesi i totonu o laua aiga.

 

O tuutuuga ua tatala ai i laua nei e to’alua, e aofia ai le fa’asa lea ona la toe taumafai e fa’afesoota’i o la ta’i to’alua, saili se isi nofoaga e nonofo ai, ma ia aua lava ne’i o la toe tagofia le ‘ava malosi.

 

FA’ALAVELAVE I MALAEIMI

 

O le isi ali’i na taofia mai e Leoleo mai Malaeimi, ona o le fa’alavelave na ia fasi fa’amo’amo’a ai si ona to’alua ma manu’a ai foliga o le fafine. O se tagata tuaoi na ia molimauina lenei fa’alavelave, sa ia logoina se tama’ita’i Leoleo sa ofu savili i le po o le aso Sa na te’a nei, ma logo ai loa e le leoleo ofu savili le Ofisa o Leoleo i Tafuna mo se fesoasoani.

 

Na taua e le molimau sa ia logoina lenei mataupu e fa’apea, o manu’a o loo aafia ai foliga o le fafine e aofia ai unaoa i ona foliga, faapea ai lona taliga o loo i ai se ta’e laititi.

 

Na taunu’u Leoleo ma latou pu’e faapagotaina loa le ua molia ma auina atu i le ofisa o Leoleo mo suesuega. Sa latou talosagaina fo’i le fafine ina ia latou aga’i uma atu i le ofisa mo suesuega.

 

Ina ua fesiligia e Leoleo le fafine e tusa ai o le fa’alavelave, na musu le fafine e fa’ailoa i Leoleo le mea sa tupu, e le i mana’o fo’i o ia e faia se tagi fa’asaga i lona to’alua. Na faailoa e le fafine i Leoleo e fa’apea, e le mana’o e loka lona to’alua, ona o ia e fa’alagolago i ai le tausiga o le aiga. E na o lona to’alua fo’i e faigaluega i le latou aiga.

 

Talu ai popolega ina ne’i toe tula’i mai se isi fa’alavelave e sili atu ona matuia i se taimi o i luma, ae maise ai fo’i o lo o fa’asua’ava le na molia, na faia ai loa le fa’aiuga ina ia taofia o ia ma molia i le tulafono.

 

FA’ALAVELAVE I ILIILI

 

O le po o le aso Faraile na logoina ai se Tama matua le Ofisa o Leoleo i Tafuna mo se fesoasoani, ona o lona atalii ua nofo ma fasi lona to’alua ao matamata i ai le la fanau. Na aga’i atu Leoleo ma latou taumafai loa e fa’afilemu le vevesi.

 

Na taua e le Tama i Leoleo e fa’apea, e fa’alogo mai i le isi potu o e e atu le tagata, laulau vavale ma pisapisao, ae o le taimi fo’i lea o loo tau fai feei ai i luga tamaiti o loo fetagisi.

 

Ina ua oso mai i fafo o lona potu, sa ia vaaia ai lona atali’i o loo fufusu atu ma lona to’alua, ae o loo tau fai fetagisi le la fanau ma matamata atu i ai. O le fefe o lona atalii ina ua vaai atu ua ia savali atu ia te ia, na alu ai loa i le atoa i fafo, oso i totonu o lana ta’avale ma alu ese loa ma le fanua.

 

Na aga’i atu Leoleo i luga o le auala e saili le ta’avale ma latou maua ai se ta’avale o loo alu saoasaoa i luga o le alatele i Iliili. Na taofi e Leoleo le ta’avale ma latou aga’i atu loa ma le ua molia i le fale mo le fa’aauauina o le suesuega.

 

Na molimauina e Leoleo ni manu’a i foliga o le fafine. Na taua e le fafine e fa’apea, na ta tu’i e lona to’alua o ia a o ia sii lana pepe e 15 masina le matua.

 

Na taua e le ua molia i Leoleo e fa’apea, na mafua ona ia fasia lona to’alua, e le fiafia i le ituaiga olaga lea o loo ia faia.