Ads by Google Ads by Google

Molia foi le isi ave pasi i le faia o uiga mataga teineitiiti 15 tausaga


[ata: foa'i]
ausage@samoanews.com

E le i atoa se vaiaso talu ona mae’a le lauina o le fa’asalaga a se ali’i ave pasi, lea ua ta’usala i lona faia o uiga mataga i se teineititi aoga e 16 tausaga le matua, a o lea fo’i ua toe molia e le malo le isi fo’i ali’i ave pasi i lona faia lea o uiga mataga i se teineitiiti aoga e 15 tausaga le matua.

 

O le vaiaso na te’a nei na pu’e fa’apagota ai e Leoleo le ali’i o Lalomilo Raymond Taume, ma molia ai loa o ia e le malo i moliaga e 3, lea e aofia ai le moliaga mamafa e tasi o lona tagofia lea o itutinosa o se teneititi e laititi i lalo o le tulafono, atoa ai ma moliaga mama e 2 o le faaoolima i le tulaga tolu, atoa ai ma le faia o gaioiga e ono lamatia ai le saogalemu o fanau laiti.

 

Na teena e Taume moliaga ina ua tula’i i luma o le fa’amasinoga fa’aitumalo i le vaiaso na te’a nei. I lona teena ai o moliaga faasaga ia te ia, na talosagaina ai loa e lana loia fautua ia Ryan Anderson ina ia faatulaga loa se aso e faia ai le ulua’i iloiloga o lenei mataupu.

 

O le aso 6 o Setema, 2018 i le aoauli lea ua fa’atulaga e faia ai le ulua’i iloiloga o le mataupu a Taume i luma o le afioga i le ali’i Fa’amasino ia Fiti Sunia, e sailia ai pe lava mau a le malo e lagolagoina ai le latou tagi.

 

E $6,000 le tupe lea ua fa’atulaga e totogi ona fa’atoa mafai lea ona tatala Taume i tua mai le toese i Tafuna. E ui na finau malosi Anderson i le fa’amasinoga ina ia fa’aitiitia le tupe e tatala ai Taume i tua, pe tatala fo’i o ia e aunoa ma se tupe e totogi, ae na lagolagoina e le fa’amasinoga le fa’afinauga a le loia mo le malo, susuga Woodrow Pengelly, ina ia taofia pea o ia i le toese se’i vagana ua totogi le $6,000.

 

Na taua e Anderson e fa’apea, o le ulua’i taimi lenei ua molia ai e le malo ia Taume i se solitulafono, e leai fo’i ni solitulafono na ta’usala pe na molia muamua ai o ia i tausaga ua mavae. Sa ia finau e fa’apea, afai e tatala i tua Taume, e le sola ese o ia ma le atunu’u, ae o le a la galulue fa’atasi ina ia mautinoa e auai o ia i soo se taimi e valaau ai lana mataupu. Na finau atili fo’i Anderson e fa’apea, e ui i tu’uaiga fa’asaga ia Taume, ae o le mea moni e ao ona silafia e le fa’amasinoga, e le o ia o se tagata leaga e ono lamatia ai le saogalemu o tagata lautele pe afai ae tatala o ia i tua.

 

Na finau malosi Pengelly ina ia fa’atumau le tupe ua mae’a ona fa’atulaga e le fa’amasinoga, ona o puipuiga lava mo le saogalemu o fanau teine a le atunu’u. Na taua e Pengelly e fa’apea, e ui o le ulua’i taimi lenei ua tu’uaia ai Taume i se solitulafono, ae foliga mai i le siosiomaga o le mataupu e pei ona tula’i mai, e fai lava si matuia o gaioiga sa faia e le ua molia.

 

Na fa’ailoa e le loia a le malo i le fa’amasinoga e faapea, e le tatau ona tatalaina i tua le ua molia e aunoa ma se tupe e totogi, e pei ona finau mai i ai lana loia. Afai fo’i e tatala o ia i tua, e tatau ona mautinoa e le sola ese o ia ma le atunu’u.

 

O tuutuuga ua tuuina atu e tatala ai Taume i tua, o le faasa lea ona ia taumafai e faafesootai le teineititi na a’afia i soo se auala, auai i soo se taimi e valaau ai lana mataupu, ma ia tuuina atu lona tusi folau e taofi e le malo. Ua fautuaina fo’i o ia e aua ne’i ona taumafai e tuua le atunuu e aunoa ma se fa’atanaga a le fa’amasinoga.

 

O lenei mataupu na tofu atu i le Ofisa o Leoleo i Tafuna i le taeao o le aso 28 Aokuso, 2018, ina ua talosagaina e se ali’i e 20 tausaga le matua se fesoasoani a Leoleo, fa’asaga i ni uiga mataga sa taumafai le ua molia e faia i lona tuafafine e 15 tausaga le matua.

 

Na aga’i atu Leoleo i le fale o le aiga na aumai le ali’i e 20 tausaga le matua ma lona tuafafine na a’afia, ma aga’i atu loa i le Ofisa o Leoleo mo le fa’atalatalanoaina o lenei mataupu. E le i auai matua o le teineititi na a’afia ona sa faigaluega i laua.

 

Na taua e le teineititi na a’afia i Leoleo e fa’apea, na fa’ateia o ia ao taoto i lona moega i se tasi o vaveao ina ua ia faalogoina se tagata ua tago atu i lona fatafata. Sa i ai lona manatu o sana miti o loo fai, peita’i ina ua ia faalogoina le mamafa atu o le lima o le tagata i lona fatafata, na mafua ai loa ona te’i i luga, ae na fa’ateia o ia ina ua pupula atu ona mata, ae tau lana vaai i le ua molia o loo tootuli i luma o lona ulu ma tago atu i lona tafatafa.

 

Na musumusu atu le ua molia i le teineititi na a’afia ma fai atu i ai, e soia le pisa ina ne’i lagona mai laua e le latou aiga, ae sa e e i luga le teineititi i lona Tama, ma fa’afuase’i ai loa ona tu i luga le ua molia ma alu i le atoa i fafo ma le latou fale. Na vaaia e le teineititi na a’afia le aga’i atu o le ua molia ma faaola lana pasi o loo paka mai i le isi itu ma sola ese loa.

 

Na taua atili e le teineititi na a’afia i Leoleo e fa’apea, e le o se taimi muamua lea ua faia ai e le ua molia uiga mataga ia te ia, e ala i lona tago atu i ona itutinosa ma le manatu ina ia fa’amalie ai lagona tu’inanau o le tino.

 

Na taua e le tuagane o le teineititi na a’afia i Leoleo e fa’apea, i se tasi o po, na ala ai i luga ma alu e fa’aaoga le fale taele (tulou). Ina ua mae’a, sa ia aga’i atu ai loa i totonu o le latou fale, ae na matua fa’ateia o ia ina ua ia vaaia le ua molia o loo tootuli i luma o le moega a lona tuafafine.

 

Na avea le tatala e le tuagane o le teineititi o le faitoto’a o le potu a lona tuafafine ma itu na te’i ai le ua molia, ma fa’ataga tago atu ai loa i le laulau ma fa’afoliga ana gaioiga o loo saili lana CD.

 

Na taua e le ali’i lea i Leoleo e fa’apea, sa oso lava ona manatu leaga i le taimi na ia iloa ai lea vaaiga, e foliga mai sa taumafai le ua molia e fai ni uiga mataga i lona tuafafine, peita’i sa ia toe manatu ane fa’apea, ai loga e sa’o lea manatu.

 

O le mae’a ai ona fesiligia e Leoleo o le teineititi na a’afia ma lona tuagane, na aga’i atu ai loa e saili le ua molia, ma latou maua atu ai lana pasi o loo tu i le maketi i Fagatogo, ma pu’e fa’apagota mai ai loa o ia.