O le vaiaso na te’a nei na fa’ataunu’uina ai e Leoleo ni osofaiga se lua i le itu i sisifo o le atunu’u, mo le sailia lea o fualaau fa’asaina mai ni nofoaga se 2 sa fa’atagaina e le Fa’amasinoga, e ala i ni poloaiga e sailia ai nei nofoaga.

O le fa’aiuga o ia osofaiga a Leoleo, e lei maua ni fualaau fa’asaina i le fale na muamua osofa’i e Leoleo, se’i vagana ai le fale na aofia i le osofaiga lona lua na maua i ai fualaau fa’asaina ma a’upega. Ua molia nei e Leoleo le ali’i e ana le fale lea na maua i ai fualaau fa’asaina ma a’upega.

O le osofaiga muamua na fa’ataunu’uina lea i le aso Lua o le vaiaso ua te’a, ma le osofaiga lona lua na fa’ataunu’uina lea i le aso Lulu na sosoo ai lava.

OSOFAIGA MUAMUA

O le osofaiga muamua na aga’i atu lea i le nofoaga e taua o Logotala, le nofoaga o loo i ai le fale o le ali’i o Tautua Letasi, lea fo’i e valaau e isi tagata ia “Fiti” poo “Govaga”. O lea osofaiga na afua mai i le mataupu lea na tau sailia ai e Leoleo se tama’ita’i e 21 tausaga le matua, e fa’apea ripoti na gaoia e Letasi se ta’avale rental ma ave fa’amalosi atu ai lava ma lea tama’ita’i a o i ai i totonu o le ta’avale.

E le i i ai Letasi i lona fale i le taimi na fa’ataunu’u ai e Leoleo le osofaiga.

A o le i fa’atinoina le osofaiga a Leoleo i le fale o Letasi, e tele ni fa’amatalaga na mafai ona maua e Leoleo e fa’atatau i le aofia lea o lenei ali’i i le umia fa’asolitulafono o fualaau fa’asaina, atoa ai ma ma le taumafai e tulei ma fa’atau atu i isi tagata.

O nei fa’amatalaga na amata maua mai e Leoleo i le tausaga na te’a nei, ma fa’asolo mai ai lava seia aulia mai le masina o Oketopa na te’a nei.

Na faamaonia mai e ni molimau se to’alua i le Samoa News, e leai ni fualaau fa’asaina na maua i le fale o Letasi i Logotala i le taimi o le osofaiga a Leoleo.

E pei ona silafia, na fa’aleaoga e le afioga i le Fa’amasino Sili ia Michael Kruse le fa’amasinoga autu a Letasi lea sa faia i ni nai masina ua mavae atu, ina ua le mafai e le vaega iloilo iuga ona latou ausia se faaiuga autasi.

O le aso 17 o le masina fou o Tesema lea ua fa’atulaga e toe faia ai le isi fa’amasinoga autu a Letasi.

OSOFAIGA LONA LUA

O le osofaiga lona 2 a Leoleo na fa’ataunu’uina fo’i lea i se tasi o nofoaga i le itu lava i Sisifo o le motu nei, ma tu’uaia le maua ai o fualaau fa’asaina atoa ai ma fana.

O lea iuga o lea osofaiga, ua molia ai nei e le malo le ali’i o Samuel Gaisoa, lea o lo o tu’uaia, o ia e a na le fale na maua i ai vaega e pei ona taua.

O le aso Faraile na te’a nei na tula’i ai Gaisoa i luma o le Fa’amasinoga Fa’aitumalo mo le ulua’i taimi. O le tama’ita’i Fa’amasino le tumau ia Gwen Tauiliili-Langkilde na taulimaina le mataupu a Gaisoa.

Sa tula’i mo Gaisoa le ali’i loia tua ia Marcellus T. Uiagalelei, ae o le tama’ita’i loia sili lagolago ia Christy Dunn sa tulai mo le itu a le malo. E 11 moliaga o lo o tu’uaia ai e le malo ia Gaisoa, lea e aofia ai moliaga o le umia fa’asolitulafono o fualaau fa’asaina faapea ai ma moliaga o le umia fa’asolitulafono o a’upega malolosi.

E $50,000 le tupe lea ua fa’atulaga e le Fa’amasinoga e tatala ai i tua ia Gaisoa. Afai ae tatala o ia i tua, ua fautuaina ina ia avea o ia ma tagatanu’u lelei e tausisi i tulafono a le malo i taimi muamua, aua ne’i taumafai e tuua le atunuu, ia tu’uina atu lona tusi folau e taofia e le malo, ma ia fesoota’i vavalalata ma lana loia fautua.

Ua fautuaina fo’i o ia ina ia aua ne’i ona taumafai e fa’afesoota’i molimau a le malo i soo se auala lava, e aofia ai ma Leoleo sa latou fa’atinoina le osofaiga.

Na finau le ali’i loia ia Uiagalelei i le fa’amasinoga ina ia fa’aitiitia le tupe e tatala ai Gaisoa i le $30,000. Na taua e Uiagalelei e faapea, o le taimi lava na taunu’u mai ai Gaisoa mai Hawaii i le po o le aso Tofi na te’a nei, na aga’i sa’o atu ai loa ma tuuina atu o ia i lima o Leoleo, e aunoa ma le tau sailia o ia e Leoleo.

O lea gaioiga e pei ona finau Uiagalelei, o se ata vaaia lea e faamaonia ai, e le o Gaisoa o se tagata e ono sola ese ma le atunu’u, e le o ia fo’i o se tagata e ono lamatia ai le saogalemu o tagata lautele.

O a’upega fo’i o loo finau mai le malo sa maua i le fale o Gaisoa, ua mae’a ona taulimaina e Leoleo, ma ua le toe mafai fo’i e Gaisoa ona toe oo i ai sona malosi.

Na tete’e malosi le loia a le malo i le talosaga a Uiagalelei. E ui e moni le faafinauga sa tuuina atu lava e Gaisoa o ia i lima o Leoleo, peita’i na finau Dunn e fa’apea, o mea sa maua i le fale e atagia mai ai, o ia o se tagata e ono lamatia ai le saogalemu o tagata lautele. Na finau Dunn ina ia fa’atumau pea le tupe e tatala ai i tua le ua molia i le $50,000.

Na lagolagoina e le tama’ita’i fa’amasino ia Tauiliili-Langkilde le fa’afinauga tete’e a le malo, ma ia fa’atumauina ai loa le tupe ua mae’a ona fa’atulaga e tatala ai i tua Gaisoa.

O le itula e 9:00 i le taeao nei lea ua fa’atulaga e faia ai le ulua’i iloiloga a Gaisoa i luma o le Fa’amasinoga.