Ads by Google Ads by Google

Masalomia taumafai o se Leoleo e ufiufi sola i tua a le pagota

ausage@samoanews.com

O le mataupu e pei ona molia ai se ali’i pagota i lona sola i tua mai le falepuipui i le 2 vaiaso talu ai ma fa’aoo manu’a i se ali’i i Leone, ua mapuna a’e ai ma ni isi o ripoti mai su’esu’ega a Leoleo o lo o fa’agasolo, le taumafai lea o se Leoleo sa avea ma Ta’ita’i Uati e ufiufi le sola i tua o le ali’i pagota.

 

O le vaiaso nei lea na tula’i ai le ali’i o Manu Lefatia i luma o le fa’amasinoga fa’aitumalo, i le mae’a ai lea ona faila e le malo o le latou tagi faasaga ia te ia. O loo molia Lefatia i moliaga e 7, lea e aofia ai moliaga mamafa e 2 o le faaoolima i le tulaga muamua; tasi le moliaga o le taumafai e fasioti se tagata; 2 moliaga o le faaaoga faasolitulafono o se a’upega; tasi le moliaga o le sola i tua mai le toese, ma le moliaga mama e tasi o le umia faasolitulafono o se fana.

 

E $65,000 le tupe lea ua fa’atulaga e le afioga i le ali’i fa’amasino ia Fiti Sunia e totogi, ona fa’atoa mafai lea ona tatala Lefatia i tua.

 

O le ali’i loia fautua ia Ryan Anderson o loo tula’i mo Lefatia, ae o Woodrow Pengelly o loo tula’i mo le malo o Amerika Samoa.

 

I le tagi a le malo o loo taua ai e fa’apea, pe tusa o le itula e 4:40 i le vaveao o le aso 12 Aokuso, 2018, na logoina ai e se Leoleo sinia mai le Ofisa o Leoleo le i ai o se fa’alavelave na tula’i mai i Leone, fa’asaga i se ali’i na manu’a i ni pulufana. O se Leoleo su’esu’e mai le Vaega o le Vice & Narcotics Unit a le Ofisa o Leoleo na tofia loa e fa’auluulu i ai le suesuega.

 

O faamatalaga na maua e Leoleo, e to’alua i laua sa vaai tino i le tagata na fa’apaina le fana. O i laua fo’i ia o se au uso. O le uso laititi na manu’a i le pulu fana ma taofia ai i le falema’i, ae sao ai lona uso matua e lei lavea.

 

O le taumafaiga muamua lava a Leoleo na fai, o le auina atu lea o le uso matua e vaavaai i pagota o le toese, ina ia saili mai ai poo ai le tagata o loo masalomia na faapaina le fana. Na faasino e le uso matua i Leoleo, o Lefatia na ia faapaina le fana. E oo fo’i i le uso laititi o loo manu’a, sa ia faamaonia i Leoleo, o Lefatia na faapaina le fana lea na mafua ai ona ia manu’a.

 

Na taua e le uso matua i Leoleo e fa’apea, e to’alua tagata sa o atu i le fale o lona uso laititi i le taimi o le fa’alavelave. O lavalava na faailoa e le molimau i Leoleo na oofu ai alii e to’alua na vaaia i le taimi o le fa’alavelave, na maua e Leoleo i lalo o le moega a Lefatia i totonu o le sela o loo loka ai o ia ina ua saili e Leoleo lona potu, i le tuana’i ai o le 2 itula talu ona mae’a le fa’alavelave.

 

Na taua e le uso matua i Leoleo e fa’apea, pe tusa o le itula e 3:00 i le vaveao o le aso na tula’i mai ai le fa’alavelave, na ia faalogoina ai le pisapisao o ta’ifau i fafo o lona fale. Sa ia tula’i e vaai poo ai, ae ona iloa atu ai se alii o loo tu i luma o le fale o lona uso lea ua lavea, e le mamao ese lava ma lona fale.

 

Sa ia savali atu ma fesili i le alii o loo tu i fafo poo ai o ia, ae sau lana tali, “O a’u o Ano mai le Falepuipui”. Sa ia toe fesili pe i ai se mea e mana’o ai, ae toe tali le ali’i lea, “Na ma o mai e vaai Sopi.” O le taimi lea na vaaia ai e le uso matua le isi alii o loo tolotolo lemu ane i tafatafa o le vaega o loo paka ai le ta’avale i fafo o le fale o lona uso. Sa ia manatu, ai o ni uo masani a lona uso.

 

Na vili e le uso matua le telefoni a lona uso laititi ma faailoa i ai, e i ai pagota o loo i fafo o lona fale na o mai e vaai o ia. E lei umi, ae vaaia loa e le uso matua le matala o le faitoto’a o le fale a lona uso, ua sau i fafo lona uso.

 

O le taimi lea na fa’afuase’i ai loa ona ia vaaia le tagata lea sa tolotolo i tafatafa o le ta’avale ua tu sasa’o i luga ma faapea atu i lona uso laititi, “Ua a lii Sopi”. Na ona uma atu lava o le tala lea a le tagata lea, tuu loa i luga ma le fana ae fana lona uso. O le taimi lea na manino ai le vaai a le uso matua, o Lefatia lea o loo ia faapaina le fana aga’i i lona uso. Na uma ona fana le uso laititi, faasaga atu Lefatia ta’i ma le fana i le uso matua, peita’i na vave le alu i le atoa o le uso matua i totonu o lona fale. O le taimi lea na toe aga’i ese ai loa Lefatia ma le ali’i na la to’alua i se ta’avale lanu siliva.

 

O loo tau sailia pea e Leoleo le tagata na to’alua ma Lefatia i lenei fa’alavelave, aemaise ai le a’upega lea na fa’aaoga e fa’atino ai le solitulafono.

 

O le tau aao ai e Leoleo o le ripoti e fa’atatau i le fa’alavelave, na logoina ai loa le Falepuipui, o Lefatia lea o loo masalomia i le fa’alavelave. O le itula e 3:30 i le vaveao lava lea na saili ai e Leoleo le sela o loo loka ai Lefatia, ma iloa ai, e le o i ai o ia i totonu o lona sela.

 

Ae tusa ai ma ripoti a Leoleo sa tiute i le po lea i le falepuipui, sa faatonuina i latou e le latou Ta’ita’i Uati, ina ia taumafai e tausisi i le latou tali e tasi, ma faailoa i Leoleo, sa i ai lava Lefatia i totonu o lona sela i le po atoa.

 

Ae ina ua fesiligia e Leoleo su’esu’e ia leoleo e to’afa mai le Falepuipui, na suia ai loa le latou tali ma latou faailoa le mea moni, e lei i ai Lefatia i totonu o le sela i le taimi na latou sailia ai o ia. Ae talu ai le maliliega na tuuina atu e le latou Ta’ita’i Uati, o le mafua’aga lea o le latou pepelo i Leoleo i le taimi muamua.