Ads by Google Ads by Google

Manava galuega fa’atonusili AS-EPA, Solialofi Ameko Pato


O nisi iloga o aiga sa auai fa'atasi ma Faatonusili o vaega eseese o le tatou malo i le toe sauniga mamalu o le susuga Solialofi Ameko Pato i le taeao o le aso Faraile ua te'a, Malumalu Katoliko i Fagatogo. [ata: Leua Aiono Frost]

O le taeao o le aso Faraile ua te’a, sa faia ai toe sauniga o le afioga le Fa'atonusili o le Ofisa e Tausia le Siomaga o Amerika Samoa, Solialofi Ameko Pato i le malumalu o le Ekalesia Katoliko o Fagatogo.

 

Na auai sui o le malo, e aofia ai Kovana Lolo Matalasi Moliga, lutena kovana Lemanu Palepoi Sialega Mauga, ma fa’atonusili o matagaluega a le malo.

 

Ae i le afiafi o le aso Tofi ua te’a, na fa'atasia ai le to'atele i le Gov. Rex Lee Auditorium mo le sauniga fa'apitoa o Pato i lona aiga, uo mamae ma e masani ma sa to'atele fo'i i latou na molimau ai.

 

I lona toe sauniga lea i le malumalu sa molimau le tina o le aiga, Dr Rosevonne  Makaiwi-Pato, sui o le Ekalesia ma le afioga i le kovana. O le sauniga sa ta'ita'ia e le afioga Epikopo Peter Brown.

 

I le toe aso o le mafutaga sa fa'ailoa ai e Dr. Pato, sa maliefua a'e le tama o le aiga i le taeao, manatu lea e alu atu e si'i i ona vae, ma sa ia fa'apea atu, "O oe o le a fa'amalosia oe e le Atua, ma e te malosi fo'i. Aua ne'i e fefe pe ete masalosalo aua o le Atua ua ia silafia lou taimi ma lo'u taimi. Ia e malamalama lelei i le fe'au a le Atua mo oe, ma ia e faia lena se'ia o'o ina mae'a ou faiva. Ou te mana'o fo'i e taofia le fa'asamoa i lo'u oti. Ou te le mana'o lava ina ia fa'atigaina se tasi ona o lo'u toe taimi ma outou, ae ou te mana'o ina ia fiafia i latou ma le fetagisi."

 

"Ua ou iloa nei le to'atele o ana uo, aua ua tofu i latou ma fe'au fa'amaise ua fa'ao'o mai i ala eseese, fa'afetai tele lava. Ia fa'atutumu e le Atua ni mea ua fa'agaogaoina ona o lo outou alolofa mo Ameko."

 

Sa ia fa'afetaia le Ekalesia ma ona ta'ita'i, ua fa'afetaia fo'i le afioga le Kovana Sili ma le auuso a fa'atonusili sa latou galulue fa'atasi. Ona ia faliu ane lea fa'afetaia aiga o Ameko mai ona itu e lua na malaga mamao mai, ae maise lona aiga Sa Lutu sa tautua ai, fa'apea fo'i le ASEPA.

 

I le matagaluega o le USEPA ma le Region 9 sa ia fa'afetaia aua o le tele o taimi o Ameko, sa naunau lava ina ia fa'ataunu'uina aiaiga uma o tulafono tau le EPA mo le atunu'u aua le lumana'i o fanau ma latou aiga.

 

Sa ia fa'afetaia fo'i ona aiga uma sa avea ma fa'amalosiau ia te ia ma le fanau. Na usuina le pese "Wind Beneath my Wings" o se pese sa ia molimana'o lava ina ia usuina e Rosevonne ma le fanau. Na lisia fo'i le tele o fa'alapotopotoga, Sosaiete ma se Komiti fa'afoe sa tautua ai lenei tama i lona soifua tautua ai i le Malo, le atunu'u ma aiga.

 

O le talaaga o Ameko, e pei ona tusia i le polokalama, o lo’o taua ai na soifua mai i ona matua o Mailo Pato Lolesia Sokimi o Vaiusu Samoa ma lona tina o Fa'aleleiaiga Lutu Samuela Niko o Faga'alu ia Ianuari 13, 1958. O lona igoa ua fa'asuafaina ai i le Akiepikopo Ameko mai Roma, ma o lona soifua atoa fo'i la o le Ekalesia Katoliko

 

Sa aoga i Matafao Elementary, soso’o ai ma Marist Brothers mai le vsega 3 se'ia o'o lava i le vasega 11, ae si'itia uma loa le latou aiga i Hawaii ma fa'aauau i le Farrington High i le 1976.

 

Na ulufale loa i le US Army lea e tele vaega sa tautua ai. O nisi o fa'ailoga sa ia mauaina mai lana lea tautua e aofia ai Army Achievement Medal, Good Conduct Medal 2nd Award, ma le Army Service Ribbon & Overseas Ribbon. Na taualoa fo'i lana  fa'amalologa mai le US Army i le 1983.

 

O lo’o umia e Ameko le AA i le Liberal Arts mai le Kolisi Tuufa’atasi a Amerika Samoa; ae maise le fa’ailoga maualuga mai le Iunivesite o Hawaii i Manoa. I Hawaii, sa ia faatula'ia se aso e filifili ai ni galuega e fia galulue ai fanau Samoa ma isi atumotu i le setete o Hawaii ma o se galuega fa'atino o lana kalapu lea sa auai ai. O lea se lagona e iloga ai le agaga o Ameko, "Ia tu'u avanoa i fanau a atumotu, aua iloga lava e tofusia fanau ma taleni aoga o lo'o agava'a ai."

 

I le amataga o le 1989 na toe foi mai ai Rosevonne ma Ameko ae ua i ai AJ ma le la'ua pepe teine o Chelei i Amerika Samoa nei ma galue o se ali’i suesue a le Ofisa Loia o Charlie Ala'ilima.

 

I le tausaga e 1993 na fa'amavae mai ai ma lana galuega lea, ae se'i nofo e fesoasoani i le fa'atautaiga o le Pisinisi o le DaMaks i Fagatogo, o le maketi o i'a a le tama o si ona to'alua.

 

O le tausaga e 1990 na fa'ae'e ai ia te ia le suafa matai o lona aiga Sa Lutu, "Solialofi."

 

I le tausaga e 1993, na toe tapoena ai fo'i i latou uma, mo se avanoa e faigaluega ai Ameko i le tofi Faia'oga, i le Northern Mariana Islands. E to'alua ona alo tama'ita'i sa maua a'o alaala ai i le atu Mariannas, le tama'ita'i o Nyrese ma Marianna.

 

I le tausaga e 2000 na toe taliu mai ai i Amerika Samoa ma sa faia'oga i le Samoana High School, i le mataupu Social Studies. Na si'itia lona tulaga i le Pule A'oga i Samoana High ma sa fa'aauau ai pea mo le isi lua tausaga 2004 o i ai pea i lena tofiga.

 

Peita'i o le fa'aiuga o le 2003 ae soso'o mai ma le maliu fo'i o le isi ona uso o Ma'oma'o Pato. Peita'i e na'o le tasi le masina e te'a ai lea maliu tiga ia te ia, ae fa'aiu'u mai loa o ia ma lona fa'ailoga MA in Administration mai le Iunivesite o Phoenix i Arizona.

 

Na toe taso'o mai isi ona fa'amanuiaga ina ia ulufale lona atali'i o AJ Pato i le US Army, ma ua iloga ai ua i ai se tasi o lana fanau e mulimulita'i i ona tulaga a'ao. Ua iloga le to'atele o fanau a'oga e fesoasoani i ai lenei Pule A'oga ma o se faia'oga fo'i e fiafia e una'ia le fanau a'oga ia maua mea latou te tausinio i ai i le olaga a'oa'oina.

 

I le tausaga 2008 na toe fa'amanuiaina ai Ameko ma Rosevonne i le la'ua ui'i o Gariel Pato. O iina loa sa va'aia ai le amatalia ona mafuli Ameko e fa'atino lona vala'auina o se tagata auauna i le Atua e ala i taulaga, ma ua iloga lona fa'amaoni e auai i sauniga uma.

 

Ua va'aia e le tina ma le fanau, lona soifua mana'o e atoatoa sefulua'i. Ua ia fa'atonuina lana fanau ma lona aiga ina ia fa'amaoni i le tupe a le Atua mai i lou totogi ma au tupe maua uma lava.