O le vaiaso na te’a nei na tuuina atu ai e le afioga i le Fa’amasino Sili ia Michael Kruse sana poloaiga i le loia a le malo ia Christy Dunn, ina ia tuuina atu i luma o le Fa’amasinoga se ripoti i le tulaga o lo o i ai mau faamaonia (evidence) o mataupu eseese o loo molia e le malo, lea o lo o i lalo o le vaavaaiga a le Ofisa o le Puipuiga o le Saogalemu Lautele.

O lea poloaiga mai ia Kruse, na tuuina atu lea ia Dunn ina ua valaau le mataupu a se ali’i o lo o tu’uaia i lona fa’apa o se fana i luma o se Fale Kalapu i le po o le Super Bowl.

O Dunn o lo o tula’i mo le malo i le mataupu fa’asaga ia Hapakuki Fotuaika, ae o le ali’i loia ia Richard deSaulles o lo o tula’i mo le ua molia, lea o lo o tatala i tua ina ua mae’a ona ia totogi le tupe e $10,000.

Ina ua valaau le mataupu a Fotuaika, na talosagaina ai loa e le malo le fa’amasinoga mo se avanoa e toe tolopo ai le iloiloina o lenei mataupu mo se isi 2 vaiaso, se’i tau fa’amautu talanoaga mo se maliliega e fa’amuta ai lenei mataupu.

Na talia e Kruse le talosaga ma fa’atulaga ai loa le mataupu a Fotuaika e toe fofogaina i le aso 15 Iuni i le itula e 9:00 i le taeao.

A o le i mae’a le mataupu, na fesili Kruse i le loia a le malo poo taofia e le malo le fana lea o lo o tu’uaia sa a’afia i le solitulafono lea ua molia ai Fotuaika. Na tali le loia a le malo ia Dunn, “O lea lava.”

O le taimi lea na tuuina atu ai loa e Kruse le poloaiga i le loia a le malo, ina ia fa’atonu le Leoleo o loo vaaia le potu o lo o teu ai mau fa’amaonia a le malo, susuga Officer Jenning, ina ia tuuina atu i luma o le fa’amasinoga se ripoti e tusa ai o mau fa’amaonia o loo i lalo o le vaavaaiga a le malo.

Saunoa Kruse e fa’apea, ua avea le mataupu a Fotuaika ma auala ua toe manatua ai e le fa’amasinoga ni isi o mau faamaonia sa maua mai e leoleo mai mataupu na aafia ai tagatanu’u i le umia faasolitulafono o fualaau fa’asaina. O mau faamaonia mai mataupu nei sa tatau ona tuuina atu i luma o le fa’amasinoga, peita’i o lea ua manino i le fa’amasinoga e leai ma ni mau fa’amaonia mai le tele o nei mataupu na tuuina atu i luma o le fa’amasinoga.

O Fotuaika o lo o tuuaia i lona fa’apa o se fana i fafo o se Fale Kalapu i le po o le Super Bowl na mavae atu nei. Na taua e le malo i le latou tagi e fa’apea, o se tama’i vevesi na tula’i mai i le va o le ua molia ma se isi tama’ita’i, na mafua ai loa ona ita le ua molia ma vaaia ai e molimau le savali i fafo mai le Fale Kalapu.

Na taua e molimau i Leoleo e fa’apea, sa aga’i sa’o atu lava le ua molia i le vaega sa paka ai lana ta’avale, aapa i totonu ma aumai le fana ma fa’apapa loa i fafo o le Fale Kalapu. Na taua atili e molimau i Leoleo e fa’apea, sa fa’aauau pea ona fa’apapa e le ua molia lana fana i le taimi na aga’i ese atu ai lana ta’avale i luga o le auala.

E pei ona taua i se ripoti a le Samoa News i le lua vaiaso talu ai e fa’apea, e ui i se poloaiga sa tuuina atu e le fa’amasinoga i le loia a le malo, ina ia tuuina atu mau faamaonia sa maua mai i le mataupu lea ua ta’usala ai le ali’i mai Saina ia Tao Liu, peita’i e le i usitaia e le malo lea poloaiga.

I le masina o Aperila, na fa’atonu ai e Kruse le loia a le malo ina ia avatu i luma o le fa’amasinoga i le taimi e lau ai le fa’asalaga a Liu mau faamaonia sa maua e leoleo mai totonu o le ta’avale a lea ali’i.

O mau faamaonia e aofia ai fualaau faasaina o le aisa ma le mariuana, o pepa iila ma straws e fa’aaoga i le utuina o le pauta o le aisa, o le fana, le ituaiga o le 45, o pulufana, o se fua e fua ai le mamafa o fualaau fa’asaina, faapea ai ma se paipa tioata e ula ai le pauta.

O mea uma ia sa maua mai e Leoleo ia Liu, peitai e leai ma mea o nei mea na tuuina atu i luma o le fa’amasinoga ina ua lau le fa’asalaga a Liu i le masina na te’a nei.

Ua poloaina e le fa’amasinoga ia Liu ina ia tuua le atunu’u ma toe fo’i atu i Saina mo le umi o lana nofovaavaaia e 7 tausaga, pe a mae’a ona tuli lana fa’asalaga fa’a falepuipui e 40  masina i le toese i Tafuna.