E le o mafai ona malaga i le taimi nei le va’a a le malo, le MV Manu’atele, ona e manaomia se ta’ita’i inisinia ua maea pasia e le vaega o le fetarale, US Coast Guard, o i latou nei o lo’o gafa ma le vaaiga o gataifale o Amerika ma ona teritori.

O le MV Manu’atele sa muai taunu’i mai i Amerika Samoa ia Ianuari 2017 mo le fa’aleleia atili o faigamalalaga i le va o Tutuila ma le Manu’atele, ae maise malaga mo le motu o Swains Island.

Sa maua e le Samoa News fa’amatalaga i le vaiaso ua te’a, fa’apea ua le mafai ona toe fealuai i malaga masani le MV Manu’atele ona ua leai sa ta’ita’i inisiaia (chief engineer) o lea va’a a le malo.

Ina ua fesiligia le fa’atonusili o  le Matagaluega o Uafau ma Malae Va’alele, Taimalelagi Dr. Claire Poumele sa ia fa’amalamalama e fa’apea, ua le mafai ona fealuai le MV Manu’atele i le taimi nei ona o lo’o manaomia se taitai inisinia ua pasia lona laisene o le Coast Guard.

Saunoa Taimalelagi e fa’apea o le masina o Iuni o le tausaga lenei sa amata ona fa’asalalauina ai le avanoa faigaluega, e sailia se tasi mo lea galuega ae peita’i e le o mafai ona fa’atumuina lea avanoa i le taimi nei.

O le sa avea muamua ma ta’ita’i inisinia o le va’a sa fa’akonekarate talu mai Ianuari o le 2017 ae ua toe fo’i lea ali’i i Amerika i le aso 1 o Oketopa 2018.

I le taimi nei o lo’o galulue le Matagaluega ma se kamupani mai fafo a tonu e mafai ona maua i ai se tasi e mafai ona fa’atalanoaina mo lea avanoa i lenei vaiaso.

Ua le gata i lea, saunoa Taimalelagi, o lo’o galulue foi le Matagaluega ma le Coast Guard i le suia lea o se taitai inisia o se tagata e le laisene pasia e le fetarale, ae ia aua nei afaina ai tulaga lelei o le va’a ma lona saogalemu, ae maise pasese malaga.

I le fa’asalalauga o le avanoa faigaluega a le Matagaluega, lea sa muamua lomia i le Samoa News i le aso 5 o Iuni, 2018 o lo’o fa’alia mai ai agava’a e tatau ona uumia, e pei o le laisene taitai fa’apitoa e taua o le US Merchant Mariner Credential (MMC), e pei ona tauaaoina e le Coast Guard. O lo’o tau mai ai foi i lea fa’asalalauga nisi o mea e mana’omia mo lea tagata e mafai ai ona apalai i le avanoa faigaluega.

O le totogi mo le konekarate e lua tausaga e i le va o le $45,000 i le $65,000. O lo’o taua ai foi i le fa’asalalauga penefiti e maua mo le e maua lea avanoa faigaluega.

Ae talitonu le Samoa News o se tasi o mataupu tele i le Matagaluega i le fa’afaigaluega ina o se taitai inisia pasia e le Coast Guard, o le manaomia lea e i latou mai fafo, ae maise lava i latou e laisene pasia i Amerika, le maua o le totogi maualuluga e pei ona totogina ai i le Iunaite Setete.

I le taimi nei o lo’o ua fa’aaogaina le isi va’a a le malo, le MV Sili mo feoaiga i Manu’a.