Ads by Google Ads by Google

Malo Fa'afetai Lemautu - Sailiga Taleni Musika a le Fa'asamoa Initiative


Le au siva a le Taupou Manaia i le siva o le ava Samoa i le Fa'asamoa Initiative Musica Talent Show. [ata: Leua Aiono Frost]

O le afiafi o le aso To'ona'i na te'a nei, sa fa'atumulia le Gov. Rex Lee Auditorium i  le tauva’aga taleni pese a fanau talavou, e sailia ai se tasi e malaga i New York e tauva ai i le Koneseti e fa'atautaia e Tony Black, se tasi e lauiloa i lea taleni, ma ua ia tu'ufa'atasia fo'i le tele o Koneset fa'apea i Amerika.

 

Ua manumalo le tama'ita'i o Fa'afetai Lemautu mai Lauli'i, i lana pese "A Chance to be Daddy's Little Girl" - ‘Se avanoa ia avea a'u o se Afafine Pele’ - ma sa iloga ona patipatia lea fa'aeaga e le to'atele na aofia i lea afiafi.

 

O le tama'ita'i lenei, sa amata ona ia tataina lana ukulele ma fatu ana pese i le fitu o ona tausaga. Ua 16 tasuaga o lona soifua, o le taimi muamua fo'i lenei ua ia tauva ai i lana taleni pese, ae ua vasega 12 i le A'oga Maualuga a Fagaitua.

 

O le tulaga lua o le tama'itai o Ednessjoisa Mareko, 15 tausaga le matua mai Iliili, o ia lea na toe filifili mai e avea ma se tasi o le to'asefulu ina ua i ai se isi na le mafai ona auai e tauva ona ua maliu se tasi i lona aiga.

 

O lana pese na matua ofo ai i latou na fa'amasino na fai mai ai le tama'ita'i o Margot Bingham, "O lou fa'asoaina o lau manava a'o e pese, ua iloga mai e foliga o se tasi sa fautuaina ma a'oa'o lelei i le taleni pese, ae o lea fo'i ua e iloa lelei lau sini o le afiafi lenei, e te gaoia fo'i le avanoa ua e maua. O le aso lenei, ua e amatalia ai lau taleni pese fa'afiafia, aua ne'i e fa'atamala i ai, ae to'aga e fafaga ia mautu lou fa'amoemoe i le lumana'i."

 

O nisi na o saunoaga na timaia ai lea tama'ita'i pese talavou e le vasega o fa'amasino.

 

O le tama'ita'i na tomuli i ai le po, Vasati Patu sa maua le tulaga tolu, sa ia fa'amautuina lana pese "How Great Thou Art" aua o le agaga tonu o le Samoa i ana sauniga lotu, o vi'iga o le Atua e fa'afetaia ai so'o se taumafaiga ma le tausiga o ona tagata ma ona fa'amanuiaga. O ia fo'i lea ua filifilia e avea le fa'ailoga lona tolu o le sailiga taleni i lea afiafi.

 

I le amataga o le polokalama, na tula’i ai Troy Polamalu ma fa'amalulu i le aofia ma le atunu'u o maimoa, ona ua le gafatia ona o'o mai si ona toalua ma le fanau, ona o suiga tetele o avanoa e malaga mai ai.

 

"Ina ia maua mai le fa'amoemoe, ona ua tapunia le alava'a sa matou mua'i fuafua e malaga mai ai, ua tupu le afa tete i Hawaii. Ua suia ai le malaga to'atasi ma uia mai ai Ausetalia, Niu Sila ma Samoa, ae to'ai taunu'u sa'o i le afiafai o le aso Toana’i,” o se tala lea a Troy.

 

“O lo'o momoli mai alofa'aga o Theodora ma le fanau, ae o lona fa'amoemoe maualuga, ia mafai ona filifilia le sui e sili ona agava'a o fanau a Amerika Samoa o le a tauva nei, mo le fa'amoemoe e tauva i lana taleni pese i New York,” o lana saunoaga lea.

 

Sa ia fa'ailoa fo'i ma le fiafia, "O nei galuega uma ua faia e avea ma so'u sao e toe fa'afo'i mai i lo'u atunu'u pele o Amerika Samoa, o mea uma e fuafua ma mafaufauina e Theodora, o ia o se tina e alofa ma fiafia tele e maua avanoa lelei e fanau a Amerika Samoa, e pei fo'i o isi uma fanau a le Iunaite Setete. O lo'o i ai le alofa i lona agaga mo Amerika Samoa, lo'u tupu'aga."

 

O i latou e toasefulu sa usuina latou pese filifilia mo lea tauvaga e to'atolu lava i latou o e sa tusia e i latou upu o latou pese, fati lana pese ma toe pese fo'i, peita'i e ese ai Fa'afetai Lemautu, ua ia taina fo'i lana pese i le Ukulele.

 

O le sui na muamua i le tauvaga, sa ia peseina faatuga fa'a-Country. Ua 18 ona tausaga, vasega 12 o ia i le Samoana, le ali'i talavou o Demetrius Folau. E le ela lava le piki a lea talavou i lona siufofoga malu matagofie ma sa ia mauaina fo'i nota maualalalo o lana pese.

 

O le sui na soso'o ai o le tama'ita'i o Leila Tuinei. O lona siufofoga e matua agava'a ai i pese fa'a-Opera lea e sili ona faigata ona peseina ona o le maualuluga o nota ma le umi o toso fa'aiuga o nota. Ua fa'ailoa fo'i i ai e le vasega o fa'amasino i lea afiafi, "Ua e aumaia Broadway i Amerika Samoa, e tatou te galulue fa'atasi e fa'ataunu'u le matou mau lena, e le o toe mamao."

 

O le tama'ita'i o Panimani Seiuli mai Auto, o le talavou a le LDS i Auto ua 13 tausaga o lona soifua sa ia pese ma le fiafia ma ua iloga fo'i lana taumafaiga e le'i tu'umamaina e ia lona avanoa. Ua fautuaina fo'i o ia, e fa'aauau ona pese ma ia feso'ota'i ma i latou uma i luga o laina ua fa'aauupegaina ai i latou mo avanoa lelei e avea ai i latou o nisi e pepese ma tapu'e CD pese.

 

Sa soso’o ai ma le tama'ita'i sili ona la'ititi sa tauva, Lindsay Logovi'i mai Mapusaga. O lana ekalesia fo'i o le LDS ma e auai o ia i le aufaipese a lana ekalesia. Na fetagisi uma le 'au fa'amasino ina ua pese lenei tama'ita'i ae ui ina tagi ae le tu'ua ai lana pese, sa ia fa'aauau pea ma ua iloga fo'i, ua ia pese ma ona lagona.

 

"E fa'amatalaloto lau pese i ou lagona, ma ua e peseina atoa lava lau pese. O oe o le tagata sili ona toa ua i ai i lenei maota i le afiafi lenei,” o nisi na o fautuaga mai le au fa’amasino. Mai le ali'i fatupese, fai koneseti o John Payne sa auai i le laina o fa'amasino, sa ia fa'ailoa atu ai, "Afai ua e pese fa'apenei i lena pese umi ma le faigata lona fati i le 9 tausaga o lou matua, o ai na te iloa le mea o le a e mafai ona fa'atino i le 18 ai o ou tausaga. Tatou galulue ma oe i le lumana'i ae se'i maua uma tali o lena ituaiga o fesili."

 

Sa soso'o ai le tamaitai ia Zilpher Ito mai Aua. Sa ia peseina le pese "Stand Up for Love" ua iloga ai le fa'anaunauga o tagata Samoa uma o le alofa le fa'atuaoia. Ua augani atu fo'i ali'i ma tama'ita'i faamasino, "Ia e toe pue'ina lau pese lena, ma avatu ia i matou kopi ae se'i o matou galulue mai ai i Niu Ioka ma Las Vegas e feso'ota'i nisi sili ona taua ma tumati'e i lea taleni o le pese, e mautinoa lava e maua avanoa lelei mo lou taumafai ai i le tatou taleni pese ma fa'afiafia."

 

Saunoa ia Payne, "Sa ou le manatu e fa'apea se taumafaiga o le a ou molimauina i le tauvaga lenei, ma lo'u ulua'i to'ai taunu'u mai i lenei motu matagofie, ae o lea ua ou iloa nei, e le gata ina aulelei ona tagata, matagofie tele lana agaifanua o le talimalo, laufofoga fiafia ona tagata, ae toe suamalie o latou siufofoga."

 

O le tama'ita'i na tauva i lona avanoa lona valu i le fa'asologa o le tauvaga o Dorida Fuiava, o lona tupu'aga e afua mai Ta'u Manu'a se'ia o'o i Salelologa Savaii, Samoa. O lana pese na iloga ai le malosi o lona leo, matua maulalo nota i nisi taimi ae na ia mauaina uma lava. Ua iloga e le o tu'umamaina e ia le avanoa sa ia maua, ma ua fautuaina o ia e fa’amasino, "O lo'o ia te oe le taleni pese, aua e te fa'atamala i ai, e fa'aauau pea lau taumafaiga, e te mafaia ona avatu le igoa o lou atunu'u i le tele o atunu'u o le lalolagi ona o lou leo." Fai mai Payne, "Ua ou matua iloa lelei nei, e aulelei tamaita'i pese o Amerika Samoa. Ua gau lo'u alofa aua ua e aulelei tele i lou la'ei fa'asamoa ae silisili ona ua e pese maia se pese matagofie tele.”

 

Soso’o ai i le numera 9, le ali’i o Henry Fa'apalemata mai Vaitogi. Ma sa ia tusia upu o lana pese ma fatu fo'i lana fati ae pese fa'afiafia ai e fa'ailoa lana taleni. Na matua gaualofa le vasega o tama'ita'i fa'amasino i le fa'atinoga a Henry o lana taumafaiga.17 ona tausaga ma ua a'oga fo'i i Tafuna High.

 

Ua fautuaina o ia, e feso'ota'i Margot Bingham o le a avea o ia ma tagata e fa'alauiloaina lana taumafaiga i fafo i se vaitaimi e le o toe mamao. O le a e malaga fealua'i solo e fa'afiafia, e mautinoa lea mea, aua o lea e iloa nota ana lava fatuga.

 

Na fa'afetaia i latou uma na tofusao mo le tu'ufa'atasia lea o taumafaiga, e aofia ai Bluesky Communications, GHC Reids, Pacific Islands Foundation, All Stars. O i latou na malaga mai fafo e i ai le Orphan Starfish na faafetaia aua e tolu a latou nofoaga ua manatu e fa'atuina i Amerika Samoa e aofia ai ma le tasi e fa'atuina i le Manu'atele, le motu e fa'asino i ai le suafa Polamalu.