Na fa’ai’u fa’anoanoa le tafaoga a tama ma teine aoga o le Vasega 8 a le Aoga Tulaga Muamua mai Pava’ia’i i le aso Lulu o le vaiaso lenei, ina ua malemo se tasi o teineititi aoga i le Pala Lagoon Swim Center i Tafuna ma i’u ina maliu fa’afuase’i ai o ia.

E taunu’u atu le Samoa News i le falema’i o le LBJ i le aoauli o le aso Lulu na tula’i mai ai le fa’alavelave, ua mae’a ona momoli le tino maliu o le teineititi i le Malumalu a le Falema’i (LBJ chapel), ma o lo o fa’atali ni isi o aiga aemaise ai le ali’i Faifeau mo le saunia o se sauniga lotu fa’apitoa mo le aiga.

Na vaaia e le Samoa News le Tama o le teineititi o loo punou lava i luga o foliga o lona afafine ao taoto i luga o le maota ma tagi. Sa i ai fo’i i totonu o le fale ni isi o aiga aemaise ai le Pule Aoga ma faiaoga sa malaga i le tafaoga.

Na taua e se tasi o faiaoga a le Vasega 8 na i ai i le tafaoga i le Samoa News e fa’apea, o le tafaoga sa alu a le fanau aoga, o se tasi lea o vaega mo le polokalame a le Vaega 8 a o sauni atu ai mo le latou fa’auuga.

Na taua e le faiaoga e fa’apea, e silia i le to’a 100 fanau aoga ma faiaoga e to’a 6 sa i ai i le tafaoga. Sa tuuina atu fo’i tusi e saini mai ai matua e fa’ailoa mai ai lo latou malilie e tuu atu le vaaia o alo ma fanau i faiaoga.

Sa tulaga lelei lava mea uma, ae o le tea o le 12 e aga’i atu i le 1:00 i le aoauli, na logoina atu ai loa faiaoga e fa’atatau i le teineititi ua malemo.

Na fesili le Samoa News i le faiaoga poo fea sa i ai faiaoga uma e to’a 6 i le taimi na tula’i mai ai le fa’alavelave, ae na tali le faiaoga, “sa matou i ai uma i o i le nofoaga sa faia ai le tafaoga.”

Na taua atili e le faiaoga e fa’apea, o se tasi o tagata faigaluega a le Pala Lagoon sa ia apalai le fesoasoani muamua (CPR) ina ia mafai ai ona toe fa’aola mai le teineititi, peita’i sa siliga tali i seu se fesoasoani.

Na aveese mai le tino o le teineititi i se ta’avale a le Ofisa o Aoga, ae fetaui ai loa ma le ta’avale a le EMS i le Paka Liona, ma fa’aauau mai ai loa i le falema’i i Faga’alu.

Na faamaonia mai e se sui o le Falema’i i le Samoa News, e taunu’u mai le teineititi i le falema’i ua siliga se fesoasoani mo ia.

Sa molimauina fo’i le faigata lea i matua o le teineititi ona talia le tala fa’anoanoa sa tuuina atu i ai, i le siliga lea o se fesoasoani mo si a laua tama.

E ese mai i le fa’alavelave na tula’i mai i le Pala Lagoon, na fa’anatinati atu fo’i i le falema’i i le aso lava lea se fanau aoga o le Vasega 12 a le Aoga Maualuga a Fagaitua, ona o ni manu’a na a’afia ai o ia i le taimi o le latou tafaoga sa faia i le Paka i Onesosopo.

E le i maua e le Samoa News se ripoti atoatoa e tusa ai o lenei fa’alavelave. O le mae’a ai o fa’alavelave ia e lua, na faia ai loa ma le faaiuga e fa’amuta ai tafaoga sa faia i le Onesosopo ma le Pala Lagoon i le taimi lea lava.

E le i maua mai se saunoaga mai le Faatonusili o Aoga a le malo e tusa ai o fesili a le Samoa News sa tuuina atu i ai.