E to’aono fanau a’oga ua mae’a ausia tulaga e malaga ai e tauva i le Pacific Symposium of Science & Sustainability (PSSS) i Honolulu Hawaii ia Ianuari 2020.

O i latou nei ua mauaina le togisilia se’ia o’o i le tulaga ono, i le tauvaga sa fa’atautaia lea e le Matagaluega o A’oga vaega a le Science Symposium, lea sa faia i le USArmy Reserve i le aso Faraile ua te’a.

E 25 fanau a’oga na fa’aulu a latou galuega fa’atino ma suesuega fa’asaeanisi na fa’atautaia e i latou e tauva ai mo lenei avanoa. Peitai na filifilia mai ai e sui o le Iunivesite o faia’oga foi  le to’a 11 o nei galuega fa’atino na maualuluga togi ina ia toe faia i ai le toe filifiliga mo le to’aono maualuluga e malaga.

O le to’aono ua fa’amauina ua togia silia, o i latou na ua fa’amanuiaina mo le malaga atu e tauva i lea tauvaga fa’asaeanisi i Honolulu:

• Tulaga Muamua - Vincent Maverick Jagon o Fa’asao Marist High.

• Tulaga Lua - Osana laulu o Leone High.

• Tulaga Tolu - Avril Regis o Fa’asao High.

• Tulaga Fa - Noelle Lei Sam o le South Pacific Academy.

• Tulaga Lima - Kutori Temese o le Manumalo Academy.

• Tulaga Ono - Jodesy Fuiava o Manumalo Academy.

O isi fanau sa tauva ma sa filifili mai e aofia i le to’a 11 o folasaga sa sailia mai ai le to’a ono lea, e aofia ai le galuega numera fitu - Yasminna Sanchezo Samoana High; tulaga valu o Arianne Andrei P. Adriano o le South Pacific Academy. Tulaga iva o Lynell Mareko o Manumalo Academy ma le tulaga Seful o James Liu Kuey o Fa’asao Marist High.

O lenei tauvaga a le PSSS o se tauvaga fa’aletausaga o lo’o fa’atautaia e le Hawaii Academy of Science ma e fa’atupe e le Matagaluega a le USArmy, Navy ma le US Air Force, ina ia sogasoga ma fiafia le fanau a’oga maualuluga e suesue ma aoao i latou i mataupu fa’asaeanisi, inisinia ma matematika, e atina’e ai lo latou soifua saili i talutalufou o le olaga fa’atekonolosi.