Ads by Google Ads by Google

Mae'a lipea va'a fagota Ofu - sami loa "Tauvaga Faifaiva"


O le ali'i Tautai ma lana auva'a mai Ofu lea ua tautai a'e mai i le aso lona lua o le tauvaga. Malo le fai o le faiva i le tai. [ata: foa'i DMWR]

O le galuega fa'akonekarate a le ali'i fauva'a o Maselino Ioane, ia toe fausia lelei Va'a Fagota i Manu'a. Ua mae'a la ona fa'aleleia uma va'a fagota o le Luanu'u - Ofu, Olosega ma Sili a'o le'i mae'a le tausaga 2018.

 

A'e loa se finagalo o le Faleluaanu'u Fishermen's Co-Op, po'o le Asosi a Au Faifaiva a le Luanu'u, o le a faia se latou Tauvaga Faigafaiva e sami ai lea fa'amoemoe ua mae'a tino mai i le vaiaso a'o lumana'i le Kerisimasi 2018.

 

Ina ua talia lea fanoga lelei e le Matagaluega o Le Vaomatua ma le Gataifale, lea e ona le poloketi fa'apitoa na toe fa'atupe ai le fa'aleleiga o Va'a Fagota o le Manu'atele, na le tu'ua ai loa lea fa'amoemoe lelei mai le fa'atino loa mo le lua aso atoatoa.

 

Na fa'atulaga le faigafaiva fa'atauva lea i le aso 20 ma le aso 21 Tesema, 2018. Amata le aso muamua i le itula e tasi, ona sa vala'aulia fa'apitoa fo'i ma va'a fagota o lelei pea a le Asosi Faifaiva a Ta'u ma Faleasao, ae sa feagai i latou nei ma le la'uina o le uta a le MV Sili sa malaga atu ma fa'amomoli o le Kerisimasi i le Motusa.

 

Na tu'ua e le aufaifaiva le Uafu i le itula e tasi i le ulua'i aso, ae toe taliu ane e fua a latou fagotaga i le itula e 6:00 i le afiafi lava lea, ma toe amata fo'i i le itula e 5:00 i le vaveao o le aso e soso'o ai, ae tatau ona taliu ane mo le fuaina ma fa'amae'a le fa'amoemoe i le itula e 3:00 ma fua ai toe faia ma le aotelega o fa'amaumauga ia mautinoa o Tautai Matapalapala o lea fa'amoemoe.

 

O le aofa'iga o Va'a Fagota na tauva e valu. E ono va'a mai Ofu, tasi le va'a mai Ta'u ae tasi fo'i le va'a na malaga mamao atu mai Tutuila o le Taiaopo, lea sa malaga ai ma le Ali'i Fauva'a o Maselino Ioane. O va'a uma lava a'o le'i tu'ua le uafu mo le tauvaga, e muamua savali le fa'atonu o le DMWR Va'amua Henry Sesepasara mo lana asiasiga, pe le o i ai nisi i'a o i le ana, ae pe ua i ai uma fo'i mea fa'atulafonoina mo le saogalemu o le au faifaiva fa'atasi ma le Sa fagota o le a malaga i le tai.

 

O se aso ese lea aso i le fa'amoemoe o Tautai, aua sa i ai fo'i nisi sa faimeaalofa. O le Matagaluega o le Vaomatua ma le Gataifale sa latou fa'ameaalofaina le tele o fa'ailoga o le Tauvaga Faigafaiva lea, ae maise o le Komisi o le Western Pacific Fisheries Regional Council sa latou foa'ia le Kesi mo va'a fagota, o se polokalama fa'afoea lava e le DMWR. O le ali'i o Dustin Snow, lea ua fa'atautaia le Maketi o I'a i le Maketi i Fagatogo, sa ia foa'ia mai le 'aisa ua mae'a nutia mo le au faifaiva e tu'u fa'alelei i ai latou fagotaga.

 

E lua vaega o le tauvaga lea. O i'a e masani ona fagotaina mo le fofoga taumafa, po'o le vaega o Bottom Fish ma le vaega o I'a tetele e fa'aaogaina ai le afaafa loloa e matau mai ai.

 

I le vaega o i'a mo le fofoga taumafa na fua fa'atasi uma fagotaga na maua i le lua aso o le faigafaiva fa'atauva na maua lea e le Taisamasama lll, e aotelega i le 59.8 pauna le mamafa o lona faiva na maua.

 

A'o le aotelega o le faiva o i'a lapopo'a na maua lea e le vaa o le ali'i kapeteni o Clint Ilaoa, lea na malaga ai Snow o lana soa, ma maua ai le la Ulua 53 pauna le mamafa. Maua fo'i e i la'ua le fa'ailoga o le i'a sili ona lapo'a ma mamafa i le tauvaga afaafaloloa.

 

Peita'i e malo le Fo'isia i le tauvaga atoa i le aotelega o pauna o ia na maua e 268 ana pauna i'a.

 

O le I'a masimasi  na maua lea e le va'a o Lady Taiaopo e 26.4 pauna le mamafa o le la'ua i'a lea.

 

O le I'a Wahoo e to'alua na maua lea i'a ma sa maualuga pauna a le Sa fagota o Fau Sai 23.2 pauna le mamafa o le la'ua Wahoo, ae lona lua i ai le va'a mai Ta'u e 23 pauna le mamafa o le la'ua Wahoo na maua.

 

Yellow Fin Tuna na maua lea e Clint Ilaoa e 11.2 pauna le mamafa o le la'ua i'a na maua.

 

O le totogi na ulufale ai va'a i le tauvaga e $150 peita'i o lea vaega tupe sa toe faia ai fo'i ma latou fa'ailoga tupe.

 

Ua i'u fo'i i le latou fonotaga, e fa'aauau pea lenei fa'amoemoe, i le tausaga lenei, vaiaso a'o loma mai le Kerisimasi 2019, e toe soso'o ai le fau ma le fau i lea tauvaga.

 

Peita'i mo le Asosi o le Au Faifaiva i Ta'u ma Faleasao, ua fa'ailoa mai, pe afai o le a mae'a fo'i ona fa'aleleia o latou Sa Fagota ua alo atu nei i ai le ali'i Fauva'a o Maselino Ioane, o le a faia fo'i le latou Faigafaiva fa'atauva faapea e sami ai lea galuega po'o le masina o Aperila po'o Me 2019. Peita'i o le a logo mai fo'i le vaega fa'asalalau mo se atoaga o lena fa'amoemoe.

 

O galuega fa'apenei e fa'amautu atili ai lea fo'i measina a Tautai o le atunu'u, ua tau mou atu le fiafia i le fagota mai o se i'a mo le fofoga taumafa o aiga.