Koluse Mumu - kosi CPR & isi galuega tautua mo tagata lautele
O lo'o fa'aauau pea ona tautuaina le atunu'u e le Koluse Mumu i ala eseese ae maise lava pe a lutia se saogalemu ma le to'afilemu i ni fa'alavelave fa'afuase'i.
Kosi "Hands Only CPR"
Fe’afeso’otai le Ofisa Tutotonu o le Koluse Mumu i Amerika Samoa, e tusia lou suafa i le kosi CPR lea ua fa'aa'oa'oina i so'o se tasi, ina ia mafai ona fesoasoani i se tasi e mana'omia ona toe fa'amanava pe a matapogia pe ua oso fo'i se ma'i ma le toe manava ai.
O lenei kosi o lo'o fa'atautaia e sui ua mae'a taua'aoina tusi pasi o lea tomai, ma sa to'atele fo'i nisi ua fesoasoani i ai o ia.
“Pe afai e te i ai, ae pa'u se tasi ua matapogia ua le toe manava, e te silafia lelei, masalo o oe ua i ai le meaalofa taua, o le toe fa'amanava o lea sui e fa'aauau ona toe soifua,” o se tala lea a le ali'i faia'oga King mai le kamupani suau'u a le Pacific Energy. "Pe e te iloa le sui ua matapogia pe leai, e le fa'atuaoia lou taumafai e toe fa'aola mai o ia, o se auaunaga e tatau ona faia ma lou to'a lelei."
O le igoa o le kosi a le Koluse Mumu o le "Hands Only CPR" o le fa'aaogaina tatau o ou lima e toe pamu ai le fatu o le tagata matapogia ina ia toe manava. E te le tau manava i ai i lona gutu e pei ona faia i le tele o kosi fa'afoma'i, ae ua suia nei i le na'o le pamu tonu lava o le fatafata o lo'o maua sa'o i ai le fatu o le tagata.
O le aso ananafi na fa'atulaga ai le kosi e amatalia i le itula e 11:00 i le taeao mo nisi, ae o le itula e 3:00 i le afiafi mo nisi. E mana'omia ona fa'ata'ita'ia e sui uma e auai i lea Kosi ona fa'atino le pamuga o le fatu o le tagata, ia mautinoa fo'i ona iloa lelei le vaega o le fatafata o le tagata e tu'u tonu i ai ou lima e lua ina ia pamu sa'o le vaega o lo'o i ai le fatu, lea ua le tata.
O nei vasega ua vala'auina le Matagaluega o A'oga, Public Works, ASPA ma le ASTCA. Ua o'o atu se tasi o tina talavou mai le ECE i Tafuna, o ia lea ua ia filifili e fia iloa e ia lea fo'i tomai, aua o lo'o galulue i latou ma fanauiti.
Ua fa'atulaga fo'i le aso Tofi o le vaiaso a sau e masi'i uma ane ai le a'oga A'oa'o e igoa o le TMI a le Ekalesia Aso Fitu Samoa e aoaoina ai.
E le o tau fa'avasegaina so'o se tasi e ulufale atu ma fia auai i lea kosi, ua vala'auina le mamalu lautele aua, ua to'atele tagata ua matapogia ona o le vevela tele o le la, ua le mafai ona manava lelei ai, ua atili ona maualuluga ai toto, ua atili ai ona vave mataogia nisi i nofoaga faitele o lo'o feoa'i solo ai tagata.
"A tutupu mea fa'apena, aua e te fefe ae fai le faiva ua e agava'a ai, pe a maua lelei lou tusi pasi lenei, ua mae'a ia te oe le kosi a le Koluse Mumu, ua mafai ona e toe fa'amanavaina mai se tasi sa matapogia,” o se tala fa'amalosi'au lea a King i lana vasega o le taeao ananafi.
Fa'apipi'i Fa'ailo o Mu i Maota & Laoa
O isi galuega a le Koluse Mumu o lo'o fa'atautaia pea, o le faapipi'iga lea o Masini Fa'ailo o Mu i totonu o maota ma laoa o le mamalu o le atunu'u, ma ua fautuaina i latou e le Ofisa o Leoleo, e galuea'ina mai afio'aga tu tuamauga ma taumamao mai ma le falema'i poo Ofisa o Leoleo, lea e mafai ona talosagaina mai ai se Ta'avale a le EMS e aumaia ai nisi, ua a'afia ona ua mu se latou falenofo.
Ua mae'a mai la le itu i sisifo mai Malaeloa e o’o i le fa'atausi'usi'uga i Fagamalo ma Fagali'i. Peita'i ua taofia la le itu Tutotonu o Tutuila, se'ia galueaina mai le itu i sasa'e mai Onenoa, Tula, Alao, Amouli, Auasi, Aunu'u, Utumea i Sasa'e se'ia o'o mai i Fagaitua. Ua fa'atulaga nei o le a soso'o le fa'apipi'iga pe a mae'a le Fu'a ia Masausi, Sa'ilele, Masefau, Aoa, Vatia, Afonotele ma Aua.
"O le iloa ua amata mu se fale, e mafai ai ona vave gaoioi le aiga ina ia fa'asaoina le maota ae tineia lava e i latou le fale. A leai, ae ua vave ona fa'asaoina le soifua pe afai ua fa'afaigata ona fa'asao meatotino ma le falenofo. O le aoga lea o lena poloketi,” o se tala lea a le ali'i ta'ita'i i lea itu o le auaunaga, le susuga Lipea.
Tane Vai - Suavai Timu mo A'oga
O le isi galuega fa'atino e le Koluse Mumu, ae ua fa'apa'aga nei ma le Ekalesia a Iesu o le Au Pa'ia o Aso e Gata Ai, e fa'atutu tane e tali ai le suavai Timu i totonu o A'oga.
O Tane nei ua saunia e le "Tank Guy of Pago Pago" ma o le latou tetele e 1250 Kalone i le tane vai e tasi.
O aoga ua i ai tane-vai o Fagaitua High; Aua Elementary; Lauli'i Elementary; Masefau Elementary; Fagasa Le'atele Elementary, Siliaga Elementary; ma Matafao Elementary.
Ua mae'a fa'atalanoa fo'i isi a'oga, ina ia fa'atutu ni a latou tane vai, ma ua galulue i latou ma latou PTA ina ia fesoasoani i le fa'atupega o lea galeuga.
MANA’OMIA PEA NIS E OFO ATU LE TAUTUA
Ua mana'omia pea lava le to'atele o nisi e ofo atu i latou e tautuaina le Koluse Mumu.
Ua fa'ailoa mai fo'i e le susuga Lipea, "O le to'atele o nisi e ofoina mai o latou tau'au ma agava'a mo galuega fa'atino a le Koluse Mumu, o le lelei fo'i lea o le vaega tupe e toina mai e le Fa'auluuluga i San Diego mo le tatou lala i Amerika Samoa nei. O i latou uma fo'i e tautua mo le Koluse Mumu iinei, e fa'amaumauina o latou itula ua faigaluega ai, ina ia avea o se tautua e fa'ailo ai le naunau o Amerika Samoa e faia galuega alofa mo o latou lava tagata i le tatou atunu'u nei."
O lo'o i ai pea lea avanoa, pe afai o lo'o i ai sou taimi o paganoa e leai se mea e faia ai, ia o'o ane i le Ofisa i Tafuna o le Koluse Mumu e fa'atumu ai lau talosaga e avea oe ma sui Volenitia mo le Koluse Mumu i nai ou itula e 10 pe lima i le vaiaso e tasi.