O le aso 15 o Oketopa, 2018 lea ua fa’atulaga e lau ai le fa’asalaga a le ali’i o Suilefaiga Toala, i le mae’a ai lea ona ta’usala o ia e le Fa’amasinoga Maualuga i le moliaga mamafa o lona umia fa’asolitulafono o vaega o le pauta fa’asaina o le aisa.

O le aso Gafua o le vaiaso nei na tula’i ai Toala i luma o le fa’amasinoga mo le tolaulauina o le latou maliliega ma le malo ua mae’a ona sainia. O le ali’i loia tua ia Marcellus T. Uiagalelei na tula’i mo ia, ae o le ali’i loia sili lagolago ia Jason Mitchell na tula’i mo le malo.

Ina ua valaau le mataupu a Toala, na talosaga lana loia i le fa’amasinoga mo se avanoa latou te talanoa fa’atasi ai ma le loia a le malo, ona o loo i ai se talosaga faapitoa a Toala e ao ona silafia e ali’i fa’amasino. Na talia e le afioga i le ali’i Fa’amasino ia Elvis P. Patea le talosaga, ma faia ai loa se fonotaga faapitoa a loia ma fa’amasino mo se taimi e silia laititi lava ma le 2 minute.

Ina ua mae’a lea talanoaga puupuu, na faia ai loa se malologa faapitoa a le fa’amasinoga.

O le mae’a ai o lea malologa, na fa’atonu ai loa e Patea ia loia ina ia faitau le maliliega i luma o le fa’amasinoga.

E le i mafai ona manino poo le a le talosaga faapitoa a Toala na faaleo e lana loia i luma o ali’i fa’amasino i le taimi o le latou fono faapitoa, peita’i e talitonu le Samoa News, sa i ai le faanaunauga o Toala ina ia faitauina tuutuuga o le latou maliliega ma le malo i totonu o le fa’amasinoga e aunoa ma le auai o Tusitala, ona o se tasi o mataupu sa ia manatu e fa’ailoa i le fa’amasinoga. E le o mafai ona iloa poo le a lea mataupu.

Ae talitonu le fa’amasinoga, o se tasi o fesili e le o mafai ona taliina i le taimi nei talu mai le aso na taofia faapagota ai e Leoleo ia Toala, o le fia iloa lea poo ai e ana le ato fa’a fafa lea sa maua i totonu o lana ta’avale, lea sa maua ai i totonu se vaega tele o le pauta fa’asaina o le aisa e tusa ma le 8g le mamafa.

Na ulua’i tu’uaia e le malo ia Toala i moliaga mamafa e 2, le moliaga o le umia faasolitulafono o vaega o le pauta o le aisa ma le fa’amoemoe e tulei ma fa’atau atu, atoa ai ma le umia fa’asolitulafono o le aisa.

Ae i lalo o le maliliega lea ua sainia e Toala ma le malo, ma ua talia fo’i e le fa’amasinoga, ua tali ioe ai le ua molia i le moliaga lona 2 lea ua toe teuteu e le malo, ina ia fa’ailoa ai le moliaga o le umia faasolitulafono o le pauta faasaina o le aisa.

I le tali ioe ai o Toala i le moliaga e pei ona ta’usala ai o ia e le fa’amasinoga, sa ia ta’utino ai e fa’apea, i se taimi o le aso 16 Me, 2018 i Amerika Samoa, a o ia fa’afoeina se ta’avale pikiapu lanumoana, sa ia umia faasolitulafono ai vaega o le pauta o le aisa. O loo taofia pea Toala i le toese i Tafuna ina ua le mafai ona ia totogi le $20,000 na fa’atulaga e tatala ai o ia, e fa’atali ai le aso e lau ai lana fa’asalaga.

E pei ona fa’aalia e le malo i le latou tagi e fa’apea, e to’atolu ali’i sa i totonu o le ta’avale e aofia ai ma Toala i le taimi na taofi ai e Leoleo i le po o le aso 16 o Me, ina ua maitauina e Leoleo tulaga fa’aletonu i se tasi o moli o le ta’avale.

Ina ua taofi e Leoleo le ta’avale, sa maitauina ai, o Toala o loo aveina le ta’avale, fa’atasi ai ma isi ali’i e to’alua sa latou malaga fa’atasi, o Foketi Misi Siua, lea sa nofo i le nofoa o le pasese, o iina fo’i lea sa maua ai le ato fa’afafa sa i ai vaega o le pauta fa’asaina o le aisa, ma le ali’i o Pio Atonio sa i tua o le pikiapu.

Na su’e e Leoleo le ato ma maua ai fualaau fa’asaina. Na fesili Leoleo ia Toala poo ai e ana le ato fa’afafa, na tali le ua molia, “ou te le iloaina.”

Na saili e Leoleo le tino o Toala ae pau mai ai se tama’i pepa iila sa i ai vasega o le aisa. Na sailia fo’i totonu o lana ta’avale ma maua ai se paipa tioata o loo i ai le aisa i totonu. Na fesili Leoleo ia Toala poo ai e ana le paipa, e lei tali le ua molia sei vagana ai le fa’amimigi o ona tau’au, e atagia mai ai lona le iloa o le tali.

Na faailoa e Toala i Leoleo e fa’apea, na alu i Vaitogi e momoli le afafine o lona uso, ae ina ua toe fo’i mai, sa ia pikiina mai ai loa Siua ma Atonio i le auala i Vaitogi. E le i vaai fo’i ia Siua o oso atu i totonu o le ta’avale ma se ato.