Ads by Google Ads by Google

Fuafua le si’itia o tautua a le Ofisa o le Lesitala a le malo


[ata: foa'i]
ausage@samoanews.com

E maualuga totogi ua fuafua le Ofisa o le Lesitala (Territorial Registrar’s Office) e si’itia ai i luga le taui mo lana auauaga, e pei ona fa’amaonia mai i se pepa o fa’amatalaga na tuuina mai e le afioga i le Loia Sili a le malo i le amataga o le masina nei, e fa’alauiloa ai fuafuaga a le Ofisa mo le si’itia lea i luga o le totogi o ana tautua.

 

E pei ona silafia e le atunu’u, o le Ofisa o le Lesitala, o se tasi lea o Lala o le Ofisa o le Loia Sili, lea o lo o i lalo o le fa’amalu a Talauega Elesalo Ale.

 

O si’itaga fou mo tautua a le Ofisa o le Lesitala, ua fa’amoemoe e tatau ona faaoo atu i ai finagalo fa’aalia o le mamalu lautele o le atunu’u a o le i ma’ea le aso 1 o Oketopa, 2018. O le aso 22 o Oketopa lea ua fa’amoemoe e tatau ona aloaia ai loa siitaga fou ua fuafuaina.

 

E pei ona taua e Talauega i se pepa o fa’amatalaga e fa’apea, o siitaga fou i totogi o tautua a le Ofisa o le Lesitala, o lo o fa’atulaga mai e le Tulafono le tatau lea ona faia ni gaioiga ina ia suia ma si’itia ai totogi o tautua mo le atunu’u lautele.

 

O finagalo fa’aalia uma a le atunu’u, e tatau ona fa’atuatusi uma i le Lesitala o le Ofisa, ia aofia ai le suafa atoa o le tagatanu’u e ana le finagalo fa’aalia, o le tuatusi faapea ai ma le numera o le teleofni. E tatau ona matua manino i le finagalo fa’aaila o tagata ta’ito’atasi o latou tulaga, atoa ai ma le si’itaga o lo o aga’i i ai lona finagalo fa’aalia.

 

O si’itaga e pei ona taua i le pepa o fa’amatalaga, o le lesitalaina o fanua, o le a si’itia mai i le $12 o lo o i ai i le $100. O le lesitalaina o suafa matai, o le a si’itia mai i le $5 o lo o i ai i le $500, ma le lesitalaina o se maliliega faaletulafono (Deed), o le a si’itia mai i le $5 o lo o i ai i le $100.

 

O le totogi mo le lesitalaina o lisi o fanua poo le lisi fo’i o se maota, o le a tumau i le $100.