Ads by Google Ads by Google

Fuafua siitaga totogi o tautua a le Ofisa Immigration


[ata: foa'i]

Ua fa'ailoa e le ofisa o le Loia Sili a le malo, fuafuaga mo le si'itaga o le totogi o nisi o tautua a le Ofisa o Femalaga'iga ma ua fa’amoemoe e fa’amalosia lea si’itaga ia Aukuso 1, 2019.

 

O le a si'itia le totogi o le pemita e ulufale mai ai i le atunu’u tagata mai fafo, talosaga nofomau i le teritori, fa'apea fo'i ona si'itia le totogi o le CI mai le $50 i le $10 ae ua fa'aumi atu fo'i le taimi e aoga ai le CI mai le ono masina i le tasi le tausaga.

 

I le amataga o le vaiaso lenei sa fa’alauiloa ai e le loia sili, Talauega Eleasalo Ale, fuafuaga a lona ofisa mo le si’itia o totogi mo nisi o tautua a le ofisa.

 

E aofia ai i lenei si'itaga, talosaga mo i latou uma e fia maua le Permanent Residence {nofo ma faamautu] i Amerika Samoa o le a si’i i le $100.

 

Ua suia ai fo'i ma le umi o fa'aaogaina pea lona pepa fa'ailo lea sa na'o le tolu tausaga, ae ua fa'afouina i le ta'i fa tausaga. A fa'apea ae tuai ona fa'afouina lou pepa fa'ailo mo i latou ua nonofo fa'amautu ma ua pasi le 60 aso e le'i fa'afouina lava, o le a toe fa'aopoopo le isi $100 e fa'afou ai lou Pepa Fa'ailo po'o le ID.

 

O so'o se Pepa Fa'ailo lava e silia ma le tasi le tausaga e le'i toe fa'afoua, o le a le toe fa'aaogaina lana iugafono sa mua'i pasia, ma ua fa'amauina lea sui, o le tagata ua nofo sala, e leai ni pepa i le teritori o Amerika Samoa pe ua ta'ua ovasiteia. O lona uiga ua tatau loa ona fa'afo'ia i lona malo pe tipoti i upu ua matele ina fa'aaogaina.

 

O isi Pepa Fa'ailo uma lea e tai tausaga ma fa'afouina, o le a si'itia lea le totogi i le $75 mai le $30 o lo'o i ai nei. O le isi suiga, afai o le a talia le nofo ma fa'amautu lelei o le tagata mai fafo i Amerika Samoa, o lana tupe na totogi e fa'aigoaina o le Pone, ua le toe mafaia ona fa'afo'ia mai. O le a fa'aaogaina lea tupe i tu’u i totonu o teugatupe a le malo.

 

Mo Pemita e ulufale mai ai so'o se tagatanu'u mai fafo i Amerika Samoa, sa fa'atulaga le pemita mo le 30 aso i le na'o le $40 peita'i o lea ua si'itia nei i le $50.O pemita mo aumalaga ua fa'atulaga mo le aumalaga e to'a 10 e o'o i le 20 e ao ina totogia le $200. O Aumalaga e ta'i 21- 30 e $300 a'o le 51-100 ua fa'atulaga le $400. mo lena pemita.

 

Mo isi aumalaga e sili atu le to'atele nai lo le 100 ua fa'atulaga ai le $500. mo le latou pemita, ma le isi $5 e fa'asili mo so'o se isi e sili atu ai i le 200 sui malaga mai mo le tausaga atoa.

 

Mo le pemita e 14 aso mo tagatanu'u o Samoa, e ulufale mai ai mo faalavelave tau aiga, po'o  ekalesia ma ta'aloga fo'i, o le totogi e ta'i $10 a le tagata e to'atasi. O i latou uma e fa'aaogaina nei pemita e ao lava ina usita'ia tulafono mo le malaga mai i le teritori, e aofia ai ma le pasese e toe foi ai i Samoa.

 

O se tasi o suia mo le Ofisa o femalagaiga, o le avatua lea o se faamaoniga e ulufale mai ai se tasi o lo'o umia le Sitiseni Amerika. O nisi fo'i o le tatou atunu'u o lo ua fia toe fo'i mai ae ua leai ni pepa fa'amaonia o umia. O le taimi nei o lo'o totogia e i latou le $50 mo le OK Board lea, peita'i ua fa'apa'u nei i le na'o le $20.

 

Mo le polokalama lea ua lisia ai atunu'u e le ulufale mai se tasi i se pemita totogi, o le a mafai ona ulufale mai i latou ua sitiseni i atunu'u ua lisia, ma nonofo ai iinei mo le na'o le 30 aso. O le a nafa le Ofisa o le Loia Sili ma le fa'atulagaga o lea polokalama mo e mafai ona ulufale mai e aunoa ma se pemita e totogia.

 

O i latou uma e ulufale mai ina ia avea ma tagata fagogota i va'a fagota o le a le aofia i lena ituaiga pemita lea e leai se totogi.

 

O le CI mo tagata na soifua a'e i Amerika Samoa, o le a aoga mo le tausaga atoa e tasi, ma o le totogi mo le CI e $100. Afai e talosaga CI ae toe tolu aso e malaga ese atu pe fa'aaoga ai, o le a fa'aopoopo le isi 25 ina ia vave ai ona faia le CI.

 

Ua mafai ona e maua se kopi o lenei lisi o suiga o totogi o tautua a le Ofisa o Femalaga'iga mai le Ofisa o le Loia Sili i le EOB i Utulei Fogafale tolu, a'o i latou o lo'o maua so'otaga fa'ainiteneti e mafai ona e maua i le tuatusi: legalaffairs.as.gov/noticesdownloads i le ASG Website, AG's Office.

 

Ua mafai ona fa'aulu atu sou manatu tusitusia i le Ofisa o le Loia sili i lenei si'itaga, ao le'i tapunia ofisa ia Iulai 17, 2019.