Ua i ai nei se fuafuaga a le Matagaluega o Feta’atauaiga a le malo e toe fa’alelei ma lipea atoa le Fale Laumei - Gov. Rex Lee Auditorium - i Utulei i le amataga o le tausaga fou 2019.

Ina ua fesiligia e le Samoa News lea mataupu sa fa’ailoa mai e le fa’atonusili o le Matagaluega ia Keniseli Lafaele e fa’apea o lo’o galulue nei lea ofisa o le malo ina ia fa’amautu se alagatupe e fa’afoeina ai le toe fa’alelei o lenei fale tele o le malo ona ua amata ona i ai tulaga fa’aletonu.

O lo’o fa’amoemoe le Matagaluega ina ma’ea le toe fa’aleleia o le Fale Laumei ae le’i o’o i le vaitaimi o le tausaga fou lea e talimalo ai Amerika Samoa i le fonotaga a ta’ita’i o atumotu Polenisia - le Polynesian Leaders Group.

Sa fa’amanino mai e Lafaele e fa’apea, o lenei fale o le malo ua fa’aaogaina mo le tele o fonotaga, sauniga o maliu, o ‘aiga o fa’aipoipoga, koneseti, ae maise fuafuaga a ekalesia. O le mea lea e tatau ai i le malo ona fa’atumau le tulaga lelei o le Fale Laumei, o se tasi o fale ua leva i Amerika Samoa.

Ua i ai le fa’amoemoe o le Matagaluega, e pei ona fa’amalamalama e Lafaele, e amata galuega toe fa’alelei o le Fale Laumei i le masina o Ianuari 2019. Ma o lo’o galulue i latou ina ia fa’amautu se alagatupe e fa’atupeina ai lea galuega. A maua loa se alagatupe, ona sailia lea o se konekarate mo lea poloketi, ma e tuua i ai i le konekerate le ono masina e fa’aleleia ai le Fale Laumei.

O le taimi mulimuli sa tele ai le toe fa’aleleia o le Fale Laumei o le tausaga e 2009, ma o lea galuega sa fa’atupeina e vaega tupe mai le fetarale.

Talu mai ona tu’u i lalo le fale tuai o le Fono Faitulafono, o galuega uma a le Maota o Sui - e aofia ai ana tauaofiaga ma iloiloga a komiti - o lo’o fa’aaoga ai le itu i matu (North Wing) o le Fale Laumei. O le itu lea o lo’o fa’afesaga’i ma le fale o le KVZK-TV ma le ofisa autu o le Matagaluega o Aoga i Utulei.

Sa fesiligia le afioga i le fa’atonusili pe mata o galuega fuafua a le Matagaluega e aofia ai le North Wing, lea e fa’aaogaina e le Maota o Sui, ae sa tali mai Lafaele e fa’apea, o fuafuaga fa’atoto i le taimi nei e aofia ai le Fale Laumei atoa, ae fa’atoa iloa atoa le ata pe a ma’ea ona tagai totoa i latou i le ata atoa o le galuega.

O le aso 3 o Ianuari 2019, ae le’i taina le itula e 12 i le aoauli, e fa’atautoina ai faipule o le Maota o Sui o le nofoaiga fou lona 36 a le Fono Faitulafono a Amerika Samoa. A ma’ea le fa’atautoina o faipule, ona soso’o ai lea ma le palota ina o le Fofoga Fetalai ae maise le failautusi o le Maota o Sui.

I e nofoaiga lona 35 a le Fono Faitulafono ua mavae atu, o le afioga ia Savali Talavou Ale o lo’o umia le tofiga Fofoga Fetalai e o’o mai lava i le taimi nei. E le o mailoa i le taimi nei pe o ai nisi o faipule e fa’amoemoe e tauva mo le tofiga o le taitai o le Maota o Sui.

O lo’o fa’ailoa mai i le kalena o polokalama a le faigamalo e fa’apea o le Fale Laumei ua fuafua e tatala aloaia ai i le aso 14 Ianuari 2019, the nofoaiga fou lona 36 a le Fono Faitulafono. O lea tauaofiaga e so’ofa’atasi a le Maota o Sui ma le Senate, e saunoa aloaia ai le afioga i le Kovana Sili, Lolo Matalasi Moliga.

O lo’o taua i le Fa’avae o Amerika Samoa, e fa’apea o le amataga o tausaga ta’itasi e saunoa fa’apitoa ai le afioga i le kovana sili i le tauaofiga a le Fono Faitulafono. O lea saunoaga e fa’ailoa ai tulaga o le malo ma le teritori i le tausaga ua te’a ae maise fuafuaga a le malo i le tausaga fou. O le taimi foi lea e iloa ai le tulaga o le tupe fa’asoasoa a le malo, ae maise ni tulafono tau fa’aofi o lo’o fuafua le faigamalo e tuuina atu i le Fono Faitulafono e iloilo ma faia i ai sa latou fa’aiuga.