Ads by Google Ads by Google

Fonotaga lona valu - 2 Samoa Soifua Maloloina - Savaii Samoa


O se vaaiga i nisi o sui usufono mai Amerika Samoa i le fonotagata o le soifua maloloina Samoa e lua o lo’o faia i le vaiaso lenei i le Amoa Hotel i le motu o Savai’i i Samoa. [ata: Leua Aiono Frost]

Minisita o le Soifua Maloloina a Samoa, Tuitama Dr. Leao T. Tuitama, i le fonotagata o le soifua maloloina Samoa e lua o lo’o faia i le vaiaso lenei i le Amoa Hotel i le motu o Savai’i i Samoa. [ata: Leua Aiono Frost]

SAVAII ISLAND, Samoa - E to'a 30 sui tofia mo Komiti Fa'afoe, le pulega ma le aufaigaluega a le Matagaluega o le Soifua Maloloina, ae maise i latou uma e tofu sao ma o lo'o galulue e soalaupule i ala e tineia ma taofia ai gasegase tuga tumau, o lo'o a'afia tagata Amerika Samoa, ua faatasi i le Ama Hotel i Savaii mo lea fonotaga faaletausaga.

 

O le susuga le Fa'afeagaiga EFKS Rev. Elder Kaleve Leifi sa tatalaina le fonotaga sa ia fa'ailoa ai, "O itutino uma e tofu ma lona sao ina ia mautinoa ua soifua le tagata ola. Ua fa'amaonia lea mai upu o le Tusi ua mae'a timataina ai i tatou uma. Peita'i e le mafai e le mata ona faia galuega a le vae, e le mafai fo'i e le vae ona faia galuega a le lima i lona atoaga. Ae a galulue fa'atasi itutino uma e fa'atino fe'au taua ua musuia ma mana'omia e le mafaufau ona fa'atino, ona maua lea o le galuega atoatoa ona fa'ataunu'u."

 

Sa ia matua fa'amamafa, "E le mafai fo'i e le isu ona fai atu i le mata e leai sona aoga, e le mafai fo'i e le vae ona fa'apea at i le vae ua leai sou aoga. O lona uiga, aua le fetotoa'i pe fa'atalale i lou aoga ma lou vaega e fa'atino ina ia atoatoa le faiva o togafitiga o gasegase o le atunu'u atoa o le atu Samoa."

 

"Ma'i pepesi, Ma'i Tumau ua a'afia ai le Atu Samoa" o le 'au'au lea o le fonotaga i lenei tausaga.

 

Saunoa le susuga le Minisita o le Soifua Maloloina a Samoa, Tuitama Dr. Leao T. Tuitama, e tima'ia i ala o galuega o lo'o nafa ma Foma'i Su'esu'e mo galuega e tausailia ai togafitiga mo nei gasegase e tele.

 

Sa ia fa'ailoa fo'i, e le tatau ona toe tu'ueseesea le va'ai lautele i ituaiga o gasegase e pepesi pe o gasegase tumau fo'i, ae ia mataituina tutusa lelei, ma isi fo'i ituaiga o gasegase ua alia'i mai lenei vaitau, e afua mai verusi, o mea ua sili ona faigata ona mailoa lona afuaga.

 

"Ua tatau ona tatou va'ai toto'a i mea uma, aua o mea tatou te le anoano i ai, ua avea ma mea e vaivai ai le tatou tautua ma le iloa o afuaga o gasegase tau verusi ua vave ma ua le vave maua lona afuaga. Ua aga tutusa fo'i ona a'afia i tatou uma i nei ituaiga o gasegase uma, gasegase pepesi, ua fa'apea fo'i i gasegase tumau ma le toe mafai ona e manuia a'ia'i mai ai pe a o'o ina a'afia ai, ae maise o le sofa'i mai nei o gasegase tau verusi, ua fou, ua le mautinoa lava lona afuaga, ma e vave fo'i ona a'afia ai le to'atele ae tuai ona maua togafitiga e taofia ma fa'aumatia ai,” o sina vaega itiiti lea o lana saunoaga.

 

Sa fa’ailoa foi e fa’apea o Dr. Caferreli o se tasi o foma'i na malaga mai ma ua fa'aipoipo i se tasi o tama'ita'i o Salafai ma ua fausia se tasi o faletalimalo i Savaii, peita'i sa saunoa Tuitama, ona o ia lea sa mafai ona ia tautuaina le motu o Savaii e ala i lona avea ma Foma'i i gasegase o i latou e alaala i afio'aga sili ona maotua nofoaga e soifua ai.

 

O lona totogi e na'o le $5,000 Tala Samoa i le tausaga atoa i le vaitau na galue. Sa fa'amatala foi le olaga sa tautua ai Dr Caffereli i Savaii ma Samoa atoa ma o lea ali’i e mai Roma.

 

O le fesili pe aisea ua ia o'o mai ai i Samoa, ona o lona agaga e fia fesoasoani i ni atunu'u e vaivai le tamaoaiga ae mana'omia ona i ai ni foma'i e togafitiga o latou gasegase. O le Amoa Hotel, o se tasi lea o fale a le ali’i fomai ma lona toalua Sammoa.

 

O le ulua'i folasaga a Samoa e fa'ailoa ai le ulua'i fa'ama'i pepesi na a'afia ai le soifua o le anoanoa'i o tagatanu'u o Samoa na soifua i le tausaga e 1918. Ua atoa nei le 100 tausaga talu ona o'o mai le Influenza i Samoa e ala i ali'iva'a na ma'i mai i luga o le vasa ma afea ai le uafu i Apia, ma aumai ai lava ma lea fa'ama'i pepesi matuia.

 

O iina fo'i na matua amata ai loa ona fa'amamafa atili le tautua a le Customs po'o le Ofisa o Tiute i luga o Uafu ma Malaeva'alele. O le tautua a le Port Health Services po'o le Quarrantine e ao ina matua faia i le fa'amaoni e tatau ai, ia mata'alia ma ia va'ai toto'a i o latou tiute tau'ave.

 

O lea folasaga sa fa'atulaga e le susuga Dr. Take Naseri, ma ua lafo atu i le sui o le Matagaluega o le soifua maloloina Lauasa Fotuali'i. O lo ua fa'ailoa mai ai, ua mana'omia lava fa'amaumauga uma tau so'o se tagatanu'u o Samoa e aumai e falelauasi, po'o le aumai fo'i e saili togafitiga i Samoa po'o Niu SIla ae uia ai Samoa. O nei faiva uma e aoga ai le tulafono malilie fa'atasi faavaomalo na mua'i pasia i tausaga ua te’a i le ma’i influenza.

 

Ua fa'ailoa mai, afai o oe o se tasi e malaga mai ma toe fo'i, pe o se tasi fo'i o uia so'o se tatou malo, e le mana'omia ona i ai se pepa tui fa'amaumau ua iloga ai ua mae'a faia ou tui puipuia mai so'o se malo sa e i ai mo sina taimi a'o le'i e malaga mai i Samoa po'o Amerika Samoa fo'i.

 

Sei vagana o oe o le a sau i Samoa na lua e nofo ma galue ai mo se taimi umi, ona tatau lea ona e umia fo'i se pepa tui po'o se fa'amaumauga mautu ua mae'a ona faia ou tui puipuia i fa'ama'i pepesi.

 

Mo se tasi o ala sa fa'aaogaina e Samoa ina ia mautinoa lava o lo'o mafai ona taofia pea le ulufale mai o nisi ma fa'ama'i pepesi, ua fagaina ai pasese a va'alele i so'o se taimi e tulaueleele ai i malae va'alele. Ua mafai ona maua uma nei faamaumauga i so'o se ala ua mae'a faia mo le puipuiga lautele i le Uepesite feso'ota'i fa'alaua'itele fa'avaomalo.

 

O le folasaga a Amerika Samoa sa faia e Onosa'i Aulava, e fa'ailoa se galuega fo'i o lo'o nafa ma i latou e ala i le tautua a le Port Administration ina ia tete'e lava i gasegase o lo'o tau ulufale atu i le atunuu.

 

O le fa'ama'i tele na a'afia ai Samoa i le 1918, na le a'afia ai Amerika Samoa ona o le te'ena mai e le ali'i Kovana i lena vaitau o se ulufale atu o so'o se ituaiga va'a i Pago Pago, le ali'i kovana o Poyer. Ma o ia lea sa fa'aigoaina ai le ulua'i a'oga maualuga i Amerika Samoa, Poyer School.

 

O le ali'i Kovana Poyer, sa avea ma se tasi e taofia atoa lea mala mai le o'o atu i laufanua o Amerika Samoa, o lo'o ua fa'aauau pea lea tulaga e le USCoast Guard, Port Administration, Customs, ma le Quarrantine i le taimi nei.

 

I le taimi nei, o so'o se fa'atamala i na vaitau, ua mae'a so'oso'o ai le tautua i lenei vaitau, ina ia lelei ma mautu atili aua le aga atu i le lumana'i. O le folasaga ua fa'amamafa atili ai, le feso'ota'i lelei, ia le mafai ona motusia lea so'otaga fa'apa'aga. Soso'o le tala mai Samoa i le lomiga a taeao.